Juristi i njohur, Kreshnik Spahiu ka zbuluar dy dosjet më “të nxehta” që ka Prokuroria e Posaçme (SPAK”, sikundër janë “21 Janari” dhe “Gërdeci”. Ai thekson se vrasja e 4 protestuesve në Bulevard gjatë protestës së 21 janarit 2011 nuk mund të mbetet pa dënim. Spahiu paralajmëron se tolerimi i qeveritarëve të përfshirë në korrupsion dhe vrasje është i papranueshëm. Madje ai theksoi se dosjet janë aq të rëndësishme sa nuk ka precedent as në regjimet diktatoriale që krimet të kalohen me procedura të lehta. Sipas tij, thirrjet për protesta nga Sali Berisha lidhen pikërisht me këto çështje që kërkojnë drejtësi të plotë.
“Drejtësia sot ka dy çështje me rëndësi që janë Gërdeci dhe 21 janari. Tek 21 janari nëse ne tolerojmë qeveritar që vrasin ndëshkimin që ne i japim atyre që janë të korruptuar është zero. Dënimi që bënë për një zyrtar është zero nëse ti toleron dhe mbyll sytë përballë vrasjeve që bëhen në bulevard. Nuk ka ndodhur as në regjimet diktatoriale që para zyrës së kryeministrit të vriten qytetarë të pafajshëm, nëse do të kalohet me procedura të lehta është një pikëpyetje e madhe”, deklaroi ai.
Protestat e PD
Më tej juristi Kreshnik Spahiu, theksoi se Sali Berisha nuk mbledh dot njerëz në Bulevard për të bërë protesta të mëdha, teksa shtoi se duke mos realizuar dot këtë, kreu i PD zhvillon konferenca shtypi në Bulevard. “Unë kam dëgjuar që edhe 100 veta mund të jenë në protestë, po 100 ka atje ku bëhet protestë që mbrojnë mjedisin, bllokojnë rrugët, autostradat dhe ndërtojnë çadra dhe rrinë pa ngrënë dhe pa pirë. Po të dëgjosh një konferencë shtypi në natyrë. Foltorja është më ke dëgjuar në televizor dhe hajde më dëgjo në shesh. Protesta nuk nënkupton konferencë shtypi me një dimension më të madh”, u shpreh ai.
Po ashtu, Spahiu deklaroi se protesta që po bënë Berisha vjen pasi i erdhi fletëthirrja nga SPAK për 21 janarin. “Opozita humbi zgjedhjet 6 muaj më parë, për 6 muaj që ata thanë vjedhje madhështore, për 6 muaj nuk protestuan dhe filluan pasi erdhi fletëthirrja nga SPAK për 21 janarin. Askush sot s’ka dhënë shpjegime pse 6 muaj nuk kanë bërë asnjë protestë. Si ka mundësi që të përgatitesh për 6 muaj dhe të mblidhen një grusht mbështetësish”, tha ai.
Presionet ndaj prokurorëve
Ndërkohë juristi Kreshnik Spahiu, teksa ka komentuar funksionimin e sistemit të drejtësisë në vend, tha se nuk ka asnjë prokuror që të ketë denoncuar publikisht se ka presion politik. Në një lidhje skype për emisionin “Frontline” në “Report Tv”, juristi theksoi se është sukses që nuk ka pasur raste publike ku politika të ketë ushtruar presion ndaj prokurorëve apo gjyqtarëve përmes largimeve nga puna të familjarëve të tyre, një praktikë që në të shkuarën sipas tij ka ekzistuar.Megjithatë, sipas Spahiut, fenomeni më shqetësues mbetet fakti që shtimi i procedimeve penale dhe arrestimeve nuk ka sjellë ulje të korrupsionit, por sipas tij ka sjellë shtim. “Sot s’kemi një prokuror që të thotë kam presion për këtë çështje dhe ky është jo sukses por revolucion. Për 100 çështje pushtetarësh s’ka dalë që të thotë një prokuror që ka presion.
Pra të thuhet që filan politikan i bërë këtë presion një prokurori për këtë gjë. Pra unë këtë deri më sot nuk di ndonjë rast. Deri më sot s’kemi një prokuror as një gjyqtar që qeveria t’i ketë hequr një familjarë nga puna. Presionet janë të mëdha, në një farë mënyrë por ajo që dua të them është se s’ka një presion për të shkarkuar. Pjesa negative është se ka 3 standarde PS thotë s’do bëhem studio avokative për asnjë person dhe pastaj bëhet gjykatë dhe prokurori. Dhe kjo është e dukshme në raste të tjera. Problemi tjetër i PS është një rast i paprecedentë, sepse ne kemi 30 vite që kemi thënë ndëshkueshmëria do luftojë korrupsionin dhe tani po shohim që sa më shumë po ndëshkohen jo që s’po pakësohet korrupsioni por është shtuar edhe më shumë. Ky është problem shqiptar”, nënvizoi Spahiu.
