Dioqeza e Sapës është në zi pas ndarjes nga jeta të Ipeshkvit të saj, Imzot Simon Kulli. Kreu kishtar, 52 vjeç, ka ndërruar jetë mëngjesin e së shtunës, si pasojë e një arresti kardiak.
Imzot Kulli lindi më 14 shkurt 1973 në fshatin Pistull të Dioqezës së Sapës, rreth 20 kilometra larg Shkodrës, ku kreu edhe arsimin fillor e të mesëm. Më 2 shkurt 1992 ai hyri në Seminarin Ndërdioqezan Shqiptar “Zoja e Këshillit të Mirë” në Shkodër, duke ndjekur dy vite përgatitje para studimeve filozofike e teologjike.
Në vitin 1994 nisi studimet në Filozofi dhe dy vite më pas vijoi me ato në Teologji. Më 14 shtator 1999 u shugurua diakon në Katedralen e Shkodrës, ku shërbeu fillimisht pranë famullitarit Dom Lucjan Avgustini. Nga janari deri në qershor të vitit 2000 shërbeu në Dajç të Zadrimës me Dom Injac Dema, Vikar i Përgjithshëm i Dioqezës.
Më 29 qershor 2000, në vitin Jubilar, u shugurua meshtar po në Katedralen e Shkodrës nga Imzot Angelo Massafra, së bashku me katër meshtarë të tjerë shqiptarë. Ky ishte grupi i parë i shugurimeve meshtarake pas 46 viteve të regjimit komunist.
Pas shugurimit, Dom Simoni u emërua menjëherë në Dajç të Zadrimës si ndihmës famullitar dhe Sekretar i Ipeshkvit të atëhershëm të Sapës, Imzot Dodë Gjergji. Në vitin 2002 ai mori detyrën e Kancelarit dioqezan.
Nga viti 2006 shërbeu si Famullitar i Katedrales “Shën Tereza e Kalkutës” në Vau-Dejës, ndërsa paralelisht mbajti një sërë detyrash të rëndësishme në strukturat e dioqezës, mes tyre edhe atë të Drejtorit dhe më pas Delegatit të Caritasit Dioqezan (2001–2012), si edhe të Vikarit të Përgjithshëm e Ekonomit të Dioqezës së Sapës.
Pas ndarjes nga jeta të Ipeshkvit Imzot Lucjan Avgustini, më 25 maj 2016, Dom Simon Kulli u zgjodh Administrator Dioqezan i Sapës nga Këshilli i Konsultorëve.
Lajmi i ndarjes së tij nga jeta ka sjellë trishtim të thellë në komunitetin katolik dhe më gjerë, teksa pritet që Dioqeza e Sapës të japë njoftime të mëtejshme për ceremonitë mortore.
