Kryeministri Edi Rama dhe zv.Kryeministrja dhe ministrja e Infrastrukturës, Belinda Balluku, ishin sot prezent në prezantimin e projektit “OSHEE Charge”.
Pas këtij aktiviteti, Rama dhe Balluku kanë shkuar në godinën e Kryeministrisë, ku janë parë duke hyrë bashkarisht, ndërsa diskutojnë mes tyre.
Në ditët e fundit, zv.Kryeministrja Balluku ka qenë në qendër të vëmendjes, ndërsa SPAK ka nisur hetimet duke ngritur edhe akuzën për “Shkelje e barazisë së pjesëmarrësve në tendera apo ankande publike”.
“Në kuadër të hetimit të këtij procedimi penal, sot, më 31.10.2025 i është njoftuar akuza të pandehurës Belinda Balluku, me funksionin e lartë shtetëror, Ministër i Ministrisë së Infrastrukturës dhe Energjisë, akuzuar për kryerjen e veprës penale, “Shkelje e barazisë së pjesëmarrësve në tendera apo ankande publike”, në bashkëpunim”, thuhet në njoftimin e SPAK.
Pas kësaj në media ka pasur një seri aludimesh, ndërsa zv.Kryeministrja Balluku ka vijuar aktivitetet e saj në funksionin qeveritar, duke shmangur komentet për mediat. Gjithashtu Kryeministri Edi Rama ka shmangur çdo koment.
