Të tjera detaje dramatike bëhen publike për mediat në lidhje me ekzekutimin mafioz të Gilmando Danit dhe shoferit të tij, agjentit të AMP-së, Muçi Shaljani.
Pamjet e tjera të siguruara nga “shteg.org” tregojnë se vetëm pak sekonda pas atentatit, një autokolonë prej 4 makinash të një delegacioni zyrtar, kalojnë pikërisht pranë vendit ku ndodhi ngjarja.
Në fund të videos dallohet makina e policisë e cila prin autokolonën dhe makinat e tjera të delegacionit që e shoqërojnë.
Ky moment tregon se sa i rëndë ka qënë ekzekutimi mafioz i kryer në një prej zonave më të sigurta të vendit, ku plumbat e lëshuar breshëri me kallashnikov mund të mos kishin kursyer as kalimtarët e thjeshtë, por as delegacionet e vendeve partnere.
Sipas videos së publikuaranga “shteg.org”, atentati ndaj Gilmando Danit, një emër i njohur për lidhjet e tij me botën e krimit, ka ndodhur rreth orës 14:20 të 11 nëntorit 2025.
Persona të paidentifikuar hapin zjarr me breshëri kallashnikovi, në drejtim të automjetit ku ndodhej viktima, i sapoardhur nga Spanja.
Pamjet tregojnë se ndaj mjetit është qëlluar në tre momente të ndryshme, ndërsa autorët, të maskuar dhe të veshur me uniforma që ngjajnë me ato të policisë, e kanë ndalur makinën në vend.
Njëri prej tyre shihet teksa zbret, rimbush armën dhe qëllon sërish në drejtim të Danit, i cili ndodhej në sediljen e pasagjerit.
