Bota e artit u trondit këtë javë nga ndarja e parakohshme nga jeta e Shpat Kasapit. Këngëtari, i cili ishte ndër më të dashurit për publikun, u nda nga jeta në moshën 40-vjeçare, pas një arresti kardiak.
Lajmi bëri xhiron e rrjetit, duke lënë të habitur dhe tronditur edhe publikun që e njihte Shpatin vetëm nga këngët e tij. Muajt e fundit, artisti kishte qenë në qendër të vëmendjes, pikërisht për shkak të jetës së tij private.
Vetëm pak muaj më parë, ai dhe bashkëshortja e tij pranuan publikisht ndarjen. Shpesh kemi shkruar edhe për problemet që kishte ky çift, duke çuar edhe në ndarjen e tyre. Ka qenë vetë Selvija, që në rrjetet sociale fliste për problemet që kishte martesa me këngëtarin, duke u shprehur se tashmë do të jetonte vetëm për veten dhe për djalin që ka nga martesa me Shpatin. Por kur situata dukej sikur nuk kishte rikthim, çifti ishte bashkuar.
Në mes të pikëllimit dhe dhimbjes që solli lajmi i ndarjes, është zbuluar edhe ribashkimi i dyshes. Ka qenë vetë Selvija që në rrjetet sociales, pas dhimbjes, ka zbuluar edhe këtë ribashkim. Në postimin e ndjerë që bëri pak orë pas humbjes së jetës së partnerit të saj, ajo zbuloi se në fakt, në Itali kishin qenë së bashku dhe se Shpati kishte vdekur në krahët e saj. Duket se jeta e re e çiftit pas ribashkimit do të ishte Italia. Dyshja ishte duke bërë dokumentet që të nisnin një jetë të re në Itali, ku synimi ishte të kuronin edhe djalin e tyre. Por duket se planet u prenë në mes, pas humbjes së jetës së Shpatit.
“Sa të lumtur ishim që më në fund Roelit po i bëheshin dokumentet në Itali, që të mund ta çonim sa më shpejt te logopedët më të mirë. Sa jemi lodhur, sa jemi stresuar… dhe askush nuk e di! Sa të afërt kemi qenë, sa bashkëpunues në privatësinë tonë, duke shijuar rritjen dhe zhvillimin e Roelit. Nuk prite ta dëgjoje duke të thirrur ‘babi’… nuk prite, Shpat. U lodhe dhe na le këtu vetëm, pa ty. E le Roelin jetim, o Shpat… Në kohën kur më së shumti kishte nevojë për ty. Në kohën kur duart e tua duheshin më shumë se kurrë. Si t’ia shpjegoj Roelit që babi nuk është më? Më thoje gjithmonë se do të më doje deri sa vdekja të na ndante… por pse u ndave nga jeta në krahët e mi, pse ma këpute zemrën kështu, o jetë? Inshallah takohemi në Xhenet… Allahu të deshi pranë vetes, por unë mezi pres të zgjohem nga gjumi dhe të jesh këtu për ne”, – shkroi Selvija në postimin e saj rrënqethës.
