Pritshmëritë nuk ishin veçanërisht të larta për samitin e mbajtur në Pekin midis Presidentit Kinez Xi Jinping, Presidentes së Komisionit Evropian Ursula von der Leyen dhe Presidentit të Këshillit Evropian Antonio Costa. Pas buzëqeshjeve dhe shtrëngimeve rituale të duarve të shkëmbyera midis udhëheqësve të gjigantit aziatik dhe Kontinentit të Vjetër, agjencia britanike e lajmeve Reuters raporton një samit të tensionuar të shënuar nga dallime opinionesh, veçanërisht për çështjet tregtare. Megjithatë, duke pasur parasysh turbulencat ndërkombëtare, fakti që Evropa dhe Kina po flasin nuk është çështje e vogël. Gjatë samitit, i cili u mbajt për të festuar 50 vjetorin e marrëdhënieve diplomatike midis Brukselit dhe Pekinit, Von der Leyen u takua gjithashtu me kryeministrin kinez Li Qiang, të cilit i tha se “Evropa gjithmonë ka besuar në fuqinë e tregtisë së lirë për të promovuar prosperitetin dhe se konkurrenca duhet të jetë e drejtë”.
“Ne e dimë që sot marrëdhënia jonë tregtare ka nevojë për një ekuilibër më të madh”, vazhdoi Presidentja e Komisionit. ” Ribalancimi është një domosdoshmëri dhe është gjithashtu në interes të një marrëdhënieje më të fortë midis nesh “. Një marrëdhënie që, siç specifikoi ajo, ka arritur “një pikë kthese”. Von der Leyen shpjegoi se arritja e ribalancimit kërkon “rritje të aksesit në tregun kinez për kompanitë evropiane, kufizimin e ndikimit të jashtëm të kapacitetit të tepërt dhe zvogëlimin e kontrolleve të eksportit”. Nga ana e tij, presidenti kinez i kërkoi Brukselit që “t’i përmbahet bashkëpunimit të hapur dhe të menaxhojë në mënyrë të përshtatshme dallimet dhe fërkimet”. “Sfidat aktuale me të cilat përballet Evropa nuk vijnë nga Kina”, theksoi ai.
