Sipas deklaratës së zëdhënëses së Antikorrupsionit, Genta Vangjeli, një dokument zyrtar i publikuar nga gazetari Osman Stafa tregon se, për shkak të tejkalimit të buxhetit të caktuar për koncesionarët privatë që menaxhojnë shërbimet laboratorike në Qendrën Spitalore Universitare ‘Nënë Tereza’ (QSUNT), analizat laboratorike për pacientët janë ndaluar.
Përmes një emaili të brendshëm të QSUNT-së, bëhet e ditur se pacientët nuk mund të marrin analiza bazike shëndetësore nëse është arritur ‘tavani financiar’ i përcaktuar në kontratën koncesionare.
Përveç kësaj, dokumenti konfirmon se, nga data 25 Gusht deri në 1 Shtator, shërbimi laboratorik do të ofrohet vetëm për rastet urgjente dhe shumë të rënda.
Partia Demokratike kërkon me urgjencë ndërprerjen e praktikave që kufizojnë aksesin në shërbime shëndetësore për arsye financiare dhe një hetim të plotë për këtë skandal.
Deklarata e zëdhënëses së Antikorrupsionit në PD, Genta Vangjeli:
Sistemi shëndetësor publik ndodhen prej kohësh në një situatë alarmante.
Skandali më i fundit publikuar nga gazetari Osman Stafa vjen pikërisht nga Qendra Spitalore Universitare ‘Nënë Tereza’ (QSUNT), ku një urdhër zyrtar konfirmon ndalimin e analizave laboratorike për pacientët, për shkak të tejkalimit të buxhetit mujor të koncesionarit privat që menaxhon këtë shërbim.
Dokumenti zyrtar, dëshmon qartë se pacientët nuk mund të marrin analiza bazike shëndetësore nëse është arritur ‘tavani financiar’ i përcaktuar në kontratën koncesionare.
Sipas emailit të brendshëm të QSUNT-së:
‘Tarifat e shërbimeve të pagueshme të koncesionarit kanë arritur 100% të tavanit buxhetor mujor. […]
Prandaj që prej datës 25 Gusht deri 1 Shtator do të ofrohet shërbim laboratorik vetëm për rastet urgjente dhe shumë të rënda.’
Ky precedent i rrezikshëm tregon qartë se në sistemin aktual shëndetësor shqiptar, jeta e pacientëve është kushtëzuar nga kufizime financiare, të imponuara nga kontrata të dyshimta publike-private.
Dhe ky nuk është rast i izoluar, por një shembull i qartë i degradimit të sistemit shëndetësor në vend.
Prej kohësh janë raportuar mungesa të theksuara në barna, pajisje, dhe shërbime bazike, ndërkohë që fondet publike vazhdojnë të shpërdorohen në projekte luksoze dhe tendera të dyshimtë.
PD kërkon me urgjencë:
Të ndërpriten menjëherë praktikat që kufizojnë aksesin e qytetarëve në shërbime shëndetësore për arsye financiare.
Të mbahet përgjegjësi institucionale dhe ligjore për këtë skandal dhe pasojat që mund të ketë për shëndetin e pacientëve.
Të ri-orientohet buxheti publik drejt shëndetësisë dhe mbrojtjes së jetës së qytetarëve, jo drejt projekteve të panevojshme apo klienteliste.
Në një shtet normal, shëndetësia është prioritet.
Ndërsa në Shqipëri, jeta e qytetarëve po vendoset në rrezik nga një sistem i paaftë, i korruptuar dhe i kapur nga interesat private.
