Stuhia e fuqishme e një ditë më parë që goditi disa qytete të vendit, shkaktoi dëme materiale, përmbytje dhe lëndimin e 23 qytetarëve që ju drejtuan Traumës për ndihmë.
Sakaq sinoptikanët bëjnë thirrje për marrjen e masave pasi reshje priten edhe gjatë së dielës në disa qytetet të vendit.
Moti i keq i së shtunës nuk ka lënë pasoja të vogla. Era dhe shiu i rrëmbyeshëm kanë shkulur disa pemë duke krijuar jo pak probleme!
Një ditë pas stuhisë së fuqishme pasojat e saj vijojnë të ndihen. Era e fortë mori përpara karrige lokalesh, çadra, mbeturina dhe sende të tjera.
Si pasojë, 23 persona u lënduan dhe u dërguan në Spitalin e Traumës. Fluturimet në Aeroportin e Rinasit u vonuan ose u anuluan përkohësisht për shkak të kushteve atmosferike.
Stuhia u shoqërua me erëra të forta dhe stuhi rëre, edhe në qytetet te tjera të vendit. Policia e Shtetit dhe forcat e emergjencës ishin qenë në terren për t’u ardhur në ndihmë qytetarëve.
Sakaq Instituti i Gjeoshkencave njoftoi se stuhitë dhe reshjet pritet të vijojnë edhe gjatë së dielës në qarqet Lezhë, Durrës, Tiranë, Shkodër, Dibër, Elbasan, Vlorë, Fier dhe Gjirokastër.