Personi që shihni në foton meposhtme, krah kryebashkiakut komedian Erion Isai, është punonjësi i Bashkisë së Kolonjës, Muharrem Tartari, të cilit i është falsifikuar firma. Më konkretisht bëhet fjalë për një firmë në projektimin e rrugës Korçës-Ersekë.
Në dosjen e SPAK thuhet se Autoriteti Rrugor Shqiptar (atëherë DPRR, sot ARRSH) kishte hartuar një projekt për ndërtimin e rrugës Korçë-Ersekë, Loti II. Projekti parashikonte ndryshime të konsiderueshme, me rreth 30% të gjatësisë në gjurmë të re dhe 70% në gjurmën ekzistuese. Por, ky projekt kalonte në zona të banuara dhe sillte dëmtime të mëdha nga ana mjedisore, urbane dhe rrëshqitje në fshatrat Mollas, Qinam, Selenicë. Parashikoheshin 5 ura të mëdha dhe vepra të tjera të artit (tombino, mure mbajtëse, pritëse, etj).
10 vjet më pas Bashkia Kolonjës vendosi të kërkonte hartimin e një projekti të ri, me argumentin se nuk kishte staf teknik apo burime financiare për hartimin e një projekti të përmasave të tilla. Në pamundësi kapcitetesh, por dhe fondesh, iu drejtua kompanive private që ta realizonin në formë donacioni. Nga 3 kompania të cilave Bashkia Kolonjë u kërkoi shërbim, vetëm kompania “A & E Engineering” e Entela Çanos dha përgjigje pozitive.
Pas kësaj, më 3 Prill 2020, Bashkia Kolonjë lidhi kontratën e sponsorizimit/shërbim me kompaninë “A & E Engineering”, në pronësi të Entela Çanos. Kontrata u nënshkrua nga kryebashkiaku Erion Isai, ndërsa për kompaninë firmosi administratorja Entela Çano.
Më 1 Qershor 2020, kompania “A & E Engineering” dorëzoi pranë Bashkisë projekt-zbatimin, i cili u mor në dorëzim përmes një komisioni të ngritur me urdhër të kryebashkiakut Erion Isai. Komisioni përbëhej nga Muharrem Tartari (kryetar), Erjon Cenko dhe Engjëll Dine.
Në procesverbalin e hartuar për marrjen në dorëzim, rezulton se në emër të komisionit dokumenti u nënshkrua nga vetë administratorja e A & E Engineering, Entela Çano, dhe u miratua nga kryebashkiaku Isai. E njëjta kompania që e projektoi (A & E Engineering) ishte edhe ajo që mbikëqyri punimet.
Në dosje thuhet se përmes ekspertimit grafik me urdhër të SPAK, rezultoi se firma e Muharrem Tartarit ishte falsifikuar, pra ai nuk kishte marrë pjesë në marrjen në dorëzim të projektit, ndonëse në dokument ishte paraqitur si i pranishëm.
Hetimet zbuluan se falsifikimi ishte kryer nga anëtarët e komisionit Erjon Cenko dhe Engjëll Dine, në bashkëpunim me administratoren e kompanisë Entela Çano, të cilët kishin sajuar procesverbalin duke përfshirë në mënyrë fiktive firmën e Tartarit.
Kujtojmë se bashkë me Erion Isain, të pandehur në SPAK janë marrë edhe 6 punonjës të Bashkisë së Kolonjës, si dhe pronarja dhe njlkohësisht dhe administratorja e kompanisë “A & E Engineering”, Entela Çano.
Nga hetimet ka rezultuar se ata kanë abuzuar dhe kanë paracaktuar fituesit e katër tenderave me vlerë 70 milionë euro, të cilat janë fituar nga kompania “A & E Engineering”. Më konkretisht, bëhet fjalë për prokurimet publike:
1.Procedura e prokurimit për projektin me objekt: Ndërtimi i rrugës Korçë-Ersekë, Loti 2 (Pjesa e parë)
2. Procedura e prokurimit me objekt “Supervizim punimesh për ndërtimin e rrugës KorçëErsekë, loti i 2
3.Procedura e prokurimit me objekt “Ndërtim i Ujësjellësit Ersekë dhe të disa fshatrave Faza e dytë nga burimet e Kozelit”
4.Procedura e prokurimit me objekt “Loti Nr.2 Mbikëqyrje Punimesh Ndërtim i Ujësjellësit Ersekë dhe të disa
fshatrave Faza e dytë nga burimet e Kozelit”.
