Gjykata Themelore në Prizren ka shpallur fajtor Dibran Hoxhën, i njohur publikisht si “Kobra”, duke e dënuar me 24 vjet burgim për veprën penale të vrasjes së rëndë, që ndodhi në ambientet e lokalit të tij, “Kobra City”.
Ngjarja tronditëse ndodhi në janar të vitit 2023 në Prizren, kur një person mbeti i vrarë pas një konflikti të dhunshëm brenda lokalit. Pas një hetimi të gjatë dhe një procesi gjyqësor të ndjekur nga publiku dhe mediat, gjykata vlerësoi se Dibran Hoxha kishte përgjegjësi të drejtpërdrejtë për aktin fatal.
Dënimi me 24 vite burgim vjen si një mesazh i qartë për ashpërsinë me të cilën po trajtohen rastet e dhunës dhe krimit të organizuar në Kosovë. Rasti “Kobra” ka qenë një nga më të komentuarit në opinionin publik, për shkak të profilit të lartë të të pandehurit dhe rrethanave të rënda të ngjarjes.
Ndërsa i akuzuari tjetër, Roland Susuri, është dënuar me 7 vjet burg për tre vepra penale, 1 vit e 6 muaj për pjesëmarrje në rrahje, 4 vjet e 6 muaj për manipulim me prova dhe 1 vit e 6 muaj për armëmbajtje pa leje.
