Elvis Shkambi, autori i dyshuar i vrasjes së gjyqtarit Astrit Kalaja, së bashku me xhaxhain e tij, Gjon Shkambi, dhe rojen e sigurisë së Gjykatës së Apelit në Tiranë, Banush Koxhaj, do të dalin sot para Gjykatës së Shkallës së Parë në Tiranë për t’u njohur me masën e sigurisë.
Seanca gjyqësore do të mbahet me dyer të mbyllura në Dhomën Penale të Gjykatës.
Prokuroria e Tiranës ka kërkuar masën e sigurisë “arrest me burg” për të tre të arrestuarit, të përfshirë në ngjarjen e rëndë të ndodhur të hënën, ku mbeti i vrarë gjyqtari Kalaja dhe u plagosën babë e bir, Rakip dhe Ervis Kurtaj.
Elvis Shkambi, 30 vjeç, përballet me tre akuza të rënda, Vrasje e funksionarëve publikë, Vrasje në rrethana cilësuese kundër palëve të përfshira në proces, kryer në bashkëpunim dhe mbetur në tentativë, Mbajtje pa leje e armëve dhe municioneve luftarake.
Në lidhje me xhaxhain e tij, Gjon Shkambi, organi i akuzës dyshon se Gjoni kishte dijeni për planin e nipit të tij për të sulmuar palën kundërshtare në çështjen gjyqësore.
Prokuroria ngriti dyshime se Gjon Shkambi ka pasur rol nxitës në tentativën për të vrarë babë e bir, me të cilët është në konflikt për një pronë në Shkodër.
Ndërkohë, punonjësi i sigurisë, Banush Koxhaj, akuzohet për shpërdorim detyre, pasi ai nuk ka reaguar edhe pse detektorët sinjalizuan praninë e metaleve gjatë hyrjes së Elvis dhe Gjon Shkambit në ambientet e gjykatës. Ai nuk ka kryer kontroll fizik ndaj tyre dhe as nuk ka bërë regjistrimin në librin e protokollit, ashtu siç është detyrim për çdo qytetar që hyn dhe del në institucion.