Presidenti serb Aleksandar Vuçiç shprehu zhgënjim me vendimin e Rusisë për të ofruar një marrëveshje gazi vetëm deri në fund të vitit, megjithëse Serbia kërkoi një kontratë tre-vjeçare. Vuçiç hodhi poshtë sugjerimet për shtetëzim të NIS, të kontrolluar nga Gazprom Neft i Rusisë, për të anashkaluar sanksionet e SHBA-së.
Vuçiç kërkoi të përfundonte një kontratë trevjeçare me Gazprom pas dy takimeve këtë vit me presidentin rus Vladimir Putin. Ai sugjeroi që vonesa ishte për shkak të sanksioneve të SHBA-së kundër rafinerisë Naftna Industrija Srbije (NIS), të cilat hynë në fuqi më herët këtë muaj pasi skaduan disa përjashtime të përkohshme.
Sipas tij, Serbia ka rezerva të mjaftueshme për tre muajt e ardhshëm dhe hodhi poshtë sugjerimet se Beogradi mund të shtetëzojë NIS, i cili kontrollohet nga kompania ruse Gazprom Neft, për të anashkaluar sanksionet.
Amerikanët më thanë: “Z. President, nënshkruajeni këtë, nuk do të ketë sanksione, vetëm na tregoni se ju duhet kohë për të shtetëzuar industrinë tuaj të naftës.” Unë u thashë atyre: “Kjo është e papranueshme për mua. Vendi ynë nuk është komunist apo fashist dhe nuk na pëlqen të sekuestrojmë kapitalin dhe pronën e të tjerëve.”
Publikimi shton se çdo mungesë gazi këtë dimër mund të rrisë presionin mbi Vuçiçin, i cili po përballet prej kohësh me trazira të brendshme. Serbia planifikonte të nënshkruante një marrëveshje trevjeçare me Rusinë për importin e 2.5 miliardë metrave kub gaz natyror në vit. Vendi tashmë merr gaz nga Azerbajxhani dhe Rusia, dhe gjithashtu ka rezerva të konsiderueshme në objektin e saj të magazinimit të gazit.
SHBA-të vonuan për një javë vendosjen e sanksioneve kundër kompanisë serbe të naftës NIS, e cila është në pronësi të Rusisë dhe operon rafinerinë e vetme të naftës në Serbi.