“Vetëm copa të ka bërë 2 mijë €”, Manja debat me Berishën për çmimet e kostumeve: Altin Hajrit i the ‘dua 500 mijë euro dhe një çantë Louis Vuitton’

Ish-kryeministri Sali Berisha dhe ish-ministri i Drejtësisë Ulsi Manja janë përplasur në Parlament, mes batutave por edhe akuzave ndaj njëri-tjetrit.

Fillimisht Berisha ka ngritur pyetjen nëse kryeministri Edi Rama e ka kërcënuar prokurorin e SPAK-ut që po heton Belinda Ballukun përmes telefonit të Manjas, një pretendim i ngritur po nga Berisha disa ditë më parë.

Më pas, Berisha e ka shndërruar pyetjen drejtuar Manjas në fakt të kryer duke iu drejtuar atij: “I ke dhënë telefonin Ramës që të flasë me prokurorin”.

Debati mes tyre në sallën e Parlamentit kaloi më pas në akuza të ndërsjellta, për çmimin e kostumeve. Berisha aludoi se Manja ka kërkuar nga personazhi i njohur i botës së krimit, Altin Hajri, dy kostume.

Manja u përgjigj duke hequr xhaketën e kostumit të tij dhe duke treguar markën në sallë. “Vetëm copa e kostumit tënd ka kushtuar 2 mijë euro”, i tha ai Berishës.

Kreu i PD-së iu përgjigj duke thënë se përveç kostumeve dhe parave, Manja i ka këruar – sipas tij – Hajrit edhe një çantë Louis Vuitton.

“Përveç 500 mijë eurove, i the edhe një çantë Louis Vuitton. Për kë e do çantën? t’u përgjigj ai. Kaq po them nuk flas më”, i tha Berisha.