Një ditë pas aksidentit të rëndë me pasojë vdekjen e një 33-vjeçari në Roskovec pas përplasjes së trefishtë të mjeteve në rrugë, Policia Rrugore e Fierit ka vënë në pranga dy nga shoferët e përfshirë.
Burime zyrtare njoftuan sot (3 nëntor) se në vijim të informacionit mbi aksidentin e djeshëm, në aksin rrugor Strum-Roskovec, ku si pasojë e përplasjes së motomjetit, humbi jetën drejtuesi i tij Klajdi Hoxha.
“Motomjeti fillimisht u përplas me automjetin me drejtues shtetasin B. C., dhe më pas me automjetin me drejtues shtetasin F. D., teksa humbi jetën 33-vjeçari. Specialistët e Sektorit të Qarkullimit Rrugor kryen arrestimin në flagrancë të shtetasve B. C., 70 vjeç, banues në Roskovec dhe F. D., 37 vjeç, banues në Berat, për veprën penale “shkelja e rregullave të qarkullimit rrugor”, njoftohet zyrtarisht nga policia vendore.
Procedurat e tjera hetimore i kanë kaluar Prokurorisë së Fierit, për zbardhjen e plotë të dinamikës dhe rrethanave të aksidentit fatal.
