Pesë shtetas shqiptarë janë dënuar me burg, pasi janë zbuluar nga autoritetet belge duke punuar në një shtëpi pari në Belgjikë.
Shtëpia e barit u zbulua në mënyrë të rastësishme nga një zjarr që përfshiu godinën.
Mediat vendase kanë zbardhur emrat e shqiptarëve të dënuar, dinamikën e ngjarjes si dhe rolin e secilit prej tyre në grup.
Si u zbulua shtëpia e barit
Shërbimet e emergjencës u nisën me shpejtësi më 22 korrik të vitit të kaluar, rreth orës 15:00, drejt një zjarri të madh që kishte përfshirë katin e tretë të një ndërtese apartamentesh në rrugën Kaaistraat në Ostende. Një person 35-vjeçar u detyrua të hidhej në çatinë e fqinjëve për t’i shpëtuar flakëve dhe pësoi djegie të rënda. Zjarri mendohet se kishte shpërthyer gjatë mbushjes së një bombole gazi dhe shkaktoi dëme të mëdha në ndërtesë.
Gjatë shuarjes së zjarrit, zjarrfikësit ndjenë një erë të fortë kanabisi. Në një mur të apartamentit në katin e parë, ata zbuluan një vrimë të fshehur që i çoi në një magazinë pas ndërtesës, ku gjetën tetë tenda kultivimi me gjithsej 595 bimë kanabisi. Plantacioni ishte i pajisur me ndriçim profesional, ventilim dhe ngrohje, ndërsa energjia elektrike merrej përmes një lidhjeje të paligjshme nga garazhi.
Kush janë shqiptarët e arrestuar dhe roli i tyre
Në vendngjarje, policia arrestoi Ervin B., një 22-vjeçar shqiptar. Ai pranoi se kishte mirëmbajtur plantacionin që nga shkurti 2024, pas një oferte nga një bashkatdhetar në Bruksel. Sipas fjalëve të tij, ai merrte 100 euro në ditë për punën e bërë. “Vetëm kur shkova atje e kuptova se bëhej fjalë për kanabis,” pohoi ai.
Hetimet e mëtejshme zbuluan se Xhuljo B. (38 vjeç), një kriminel shqiptar, kishte përdorur një kartë identiteti të rreme italiane për të marrë me qira apartamentin. Ai u arrestua më 28 nëntor 2024 në Itali. Xhuljo mohoi se ishte udhëheqësi i grupit dhe pretendoi se kishte punuar si punëtor në plantacion për të paguar kalimin e tij drejt Mbretërisë së Bashkuar. Sipas tij, më vonë ia kishte lënë detyrën Ervinit.
Magazina rezultoi se ishte marrë me qira që më 1 qershor 2022 nga shqiptari Leonard M. (41 vjeç), nën petkun e një kompanie greke fiktive. Hetuesit arritën gjithashtu të lidhin me plantacionin edhe me Kevin C. (36) nga Ostende dhe Angelo C. (35) nga Middelkerke. Të dy kujdeseshin për bimët në këmbim të kanabisit falas.
Kevin C. tregoi se e kishte njohur Xhuljo B. dy vjet më parë, kur ky i fundit ishte fqinj i tij poshtë banesës. Ai pohoi se ishte kërcënuar prej tij: “Nuk duhej t’i tregoja asgjë policisë, përndryshe do të më rrëmbenin fëmijët,” – deklaroi ai.
Dënimet
Gjykata e Bruges dënoi Xhuljo B. dhe Leonard M. këtë javë me nga tre vjet burg efektiv. Ervin B. mori dy vjet burg efektiv, ndërsa Angelo C. u dënua me një vit burg efektiv. Kevin C. mori tetëmbëdhjetë muaj burg, gjysma me kusht.
Përveç kësaj, banda duhet t’i paguajë rrjetit të energjisë “Fluvius” plot 173.000 euro si dëmshpërblim për energjinë e vjedhur.
