Të tjera detaje dalin në dritë nga rasti i dyshuar i abuzimit të 19-vjeçares nga oficeri Jetmir Uta në Dibër.
“Nuk e njihja, më shkroi në whatsupp një person me këtë numër (që i përket policit), ku më thotë ‘kam video dhe foto të tuat’, nëse nuk më takon, do t’i publikoj”, ka dëshmuar e reja, raporton gazetarja Anila Hoxha.
Kjo është arsyeja pse u nda me të motrën dhe hipi në makinën e efektivit, i cili shërbente si oficer në patrullën e përgjithshme të policisë Dibër.
Dy ditë para abuzimit, vajza është paraqitur me të ëmën, (e cila kishte mbushur 18 vjeçe në tetor), dhe ka kryer denoncimin.
Prokurorja e çështjes nuk ka vendosur ende se kur do të kërkojë masën e sigurisë, që pritet të mbahet në fillim të javës. Kujtojmë se deri më tani Uta ka refuzuar të flasë zyrtarisht.
Kujtojmë se ditën e djeshme, një efektiv policie është arrestuar nga Agjencia e Mbikëqyrjes Policore në Dibër, pasi dyshohet se ka kryer marrëdhënie seksuale me dhunë me një të re. Hetimet nisën pas kallëzimit të qytetares me inicialet L. H., e cila ka deklaruar se punonjësi i policisë e ka detyruar nëpërmjet shantazhit dhe kërcënimit.
Në pranga ka rënë punonjësi i policisë Jetmir Uta, i cili në kohën e kryerjes së veprës penale ushtronte detyrën “Ndihmës/Specialist i Patrullës së Përgjithshme”.
Punonjësi i policisë ishte larguar drejt Kosovës, por dje është bërë e mundur ndalimi i tij në momentin e rikthimit në territorin shqiptar. Ai e ka kanosur të renë që të mos bënte kallëzim në polici.
