Ndonjëherë, fati ndërhyn në mënyrat më të paimagjinueshme. Për Bhoomi Chauhan, një gruaje cila jetonte në Londër dhe vizitoi Indinë pas dy vitesh, një vonesë 10-minutëshe u bë vija ndarëse midis jetës dhe vdekjes.
Chauhan kishte prerë një biletë me fluturimin AI-171 të Air India – Boeing 787 Dreamliner, i cili vetëm pak minuta pas nisjes u rrëzua dhe humbën jetën mbi 200 pasagjerë
“I jam mirënjohëse Zotit që më shpëtoi”, tha Bhoomi për mediat vendase, me zërin që i dridhej teksa qëndronte jashtë shtëpisë së familjes së saj, duke u përpjekur ende për të kuptuar se çfarë kishte ndodhur.“Trupi im është duke u dridhur akoma. Nuk po flas dot. Mendja ime është plotësisht bosh tani pasi dëgjova të gjitha ato që kanë ndodhur”, ka thënë ajo më tej.
Ditën e fluturimit, Bhoomi ishte duke udhëtuar për në Aeroportin Ndërkombëtar Sardar Vallabhbhai Patel kur u bllokua në trafik. Ajo mbërriti në terminal vetëm pak minuta para nisjes së planifikuar.
“E humba fluturimin vetëm 10 minuta”, tregoi ajo, me sytë me lot. “U luta, por nuk më lejuan të hipja në aeroplan pa printimin e dokumentit. U nisa nga aeroporti rreth orës 13:30. Fluturimi u nis rreth orës 13:38. U rrëzua vetëm disa minuta më vonë. Nuk di si ta shpjegoj se çfarë ndiej”.
Chauhan kishte ardhur në Indi për pushime të shkurtra, udhëtimi i saj i parë për në shtëpi pas dy vitesh. Ajo kshte planifikuar të kthehej në Londër vetëm, ku e priste burri i saj. “E kisha pritur me padurim këtë udhëtim, për të parë familjen, për të thithur përsëri ajrin e vendit tim”, tha ajo ndër të tjera.