SPAK ka çuar për gjykim shtetasin Astrit Vladi dhe avokaten Erida Lazimi, të akuzuar për ushtrim ndikimi të paligjshëm ndaj një gjyqtari.
Sipas akuzës së SPAK, zanafilla e ngjarjes lidhet me sekuestrimin në Portin e Durrësit të shumës prej 3.4 milionë eurosh të fshehura në dy makina “Toyota Yarsi”, ku Astrit Vladi i ka kërkuar avokates ndërhyrjen te gjyqtari i çështjes, me qëllim favorizimin e palëve të përfshira.
“Në Gjykatën e Shkallës së Parë Tiranë, më datë 14.09.2020, është zhvilluar seanca paraprake për gjykimin e kërkesës për dërgimin në gjyq të procedimit penal nr. 71, viti 2020, të Prokurorisë pranë Gjykatës së Shkallës së Parë Tiranë, në ngarkim të shtetasve Alfred Vladi, Elvis Vladi dhe Alban Mollaymeri, të akuzuar për veprën penale ‘Mosdeklarim në kufi i të hollave dhe sendeve me vlerë’, e kryer në bashkëpunim, të parashikuar nga nenet 179/a dhe 25 të Kodit Penal”, thuhet në njoftimin e SPAK.
Sipas SPAK, nga hetimet ka rezultuar se Astrit Vladi i ka kërkuar avokates Erida Lazimi të ushtrojë ndikim të paligjshëm te gjyqtari i seancës paraprake, me qëllim favorizimin e Alfred Vladit dhe personave të tjerë të përfshirë në çështje.
SPAK thotë se avokatja Erida Lazimi i ka premtuar dhe siguruar Astrit Vladit se kishte aftësinë për të ndërhyrë te gjyqtari, kundrejt një përfitimi të parregullt në formë monetare, për të ndikuar në rezultatin e vendimmarrjes.
Njoftimi i plotë i SPAK
“SPAK dërgon në gjyq çështjen për ushtrim ndikimi të paligjshëm ndaj një gjyqtari
Prokuroria e Posaçme kundër Korrupsionit dhe Krimit të Organizuar ka përfunduar hetimet dhe më 24.7.2025, ka dërguar për gjykim procedimin penal, nr.26/1/1 viti 2025 në ngarkim të të pandehurve:
Astrit Vladi, i akuzuar për veprën penale “Ushtrim i ndikimit të paligjshëm ndaj personave që ushtrojnë funksione publike”, i parashikuar nga neni 245/1, paragrafi (1) të Kodit Penal (sipas përmbajtjes së kësaj dispozite para ndryshimeve të kryera me ligjin nr.43/2021).
Erida Lazimi, e akuzuar për veprën penale “Ushtrim i ndikimit të paligjshëm ndaj personave që ushtrojnë funksione publike”, e parashikuar nga neni 245/1, paragrafi (2) i Kodit Penal (sipas përmbajtjes së kësaj dispozite para ndryshimeve të kryera me ligjin nr.43/2021).
Ky procedim penal është ndarë nga ai i mëparshëm me nr.26/1, datë 26.12.2024, për veprat penale: “Ushtrim i ndikimit të paligjshëm ndaj personave që ushtrojnë funksione publike”, “Korrupsion pasiv i gjyqtarëve, prokurorëve dhe funksionarëve të tjerë të organeve të drejtësisë”, “Trafikim i narkotikëve”, “Pastrim i produkteve të veprës penale ose veprimtarisë kriminale”, të parashikuara nga nenet 245/1, 319/ç, 283/a dhe 287 të Kodit Penal.
Nga veprimet hetimore të kryera për këtë procedim penal janë mbledhur provat e nevojshme të cilat provojnë se:
Në Gjykatën e Shkallës së Parë Tiranë në datën 14.09.2020 është zhvilluar seanca paraprake për gjykimin e kërkesës për dërgimin në gjyq të procedimit penal nr.71 viti 2020 të Prokurorisë pranë Gjykatës së Shkallës së Parë, Tiranë në ngarkim të shtetasve Alfred Vladi, Elvis Vladi dhe Alban Mollaymeri, të akuzuar për veprën penale “Mosdeklarim në kufi i të hollave dhe sendeve me vlerë”, e kryer në bashkëpunim, të parashikuar nga nenet 179/a dhe 25 të Kodit Penal.
Nga hetimet e kryera është provuar se i pandehuri, Astrit Vladi i ka kërkuar të pandehurës, Erida Lazimi, e cila ushtron profesionin e avokates, të ushtrojë ndikim të paligjshëm te gjyqtari i seancës paraprake, me qëllim për të favorizuar shtetasit, Alfred Vladi etj.
E pandehura Erida Lazimi i ka premtuar dhe i ka siguruar të pandehurit, Astrit Vladi aftësinë për të ushtruar ndikim të paligjshëm te gjyqtari i seancës paraprake, kundrejt përfitimit të parregullt në formë monetare, me qëllim për të favorizuar përsonat, për të cilët ishte kërkuar dërgimi i çështjes në gjyq në atë procedim penal.
Prokuroria e Posaçme kundër Korrupsionit dhe Krimit të Organizuar po vijon hetimet paraprake për episode të tjera të kryerjes së veprave penale të korrupsionit aktiv dhe korrupsionit pasiv të gjyqtarëve, prokurorëve dhe funksionarëve të tjerë të drejtësisë, si dhe rrethanave dhe fakteve të tjera që kanë dalë nga hetimet e kryera lidhur me këtë procedim penal.
Sqarim: Çdo person prezumohet i pafajshëm derisa nuk vërtetohet fajësia e tij me vendim gjyqësor të formës së prerë”, thuhet në njoftimin e SPAK.
