Autoritetet italiane kanë hedhur dritë mbi vrasjen e një shtetasi shqiptar në Padova, ngjarje e ndodhur më 8 qershor të këtij viti. Burime nga hetimi bëjnë me dije se pista kryesore mbi të cilën po fokusohet Prokuroria është ajo e një akti hakmarrjeje të ndërlidhur me ngjarje të mëparshme në Shqipëri.
Sipas deklaratave të prokurores Maria d’Arpa, i ndjeri, 58-vjeçari Fatos Cenaj, dyshohet se është vrarë me paramendim. Një individ ndodhet nën hetim për këtë krim, ndërsa pamjet filmike dhe dëshmitë nga vendngjarja kanë nxjerrë në pah se bëhet fjalë për një atentat të planifikuar.
Hetuesit nuk kanë konstatuar asnjë shenjë konflikti gjatë jetesës së viktimës në Itali, duke përforcuar versionin se shkaku mund të jetë i lidhur me të kaluarën e tij në vendlindje. Hetimi është shtrirë edhe në Shqipëri, me bashkëpunimin e ngushtë të autoriteteve të dy vendeve për të identifikuar çdo të dhënë që mund të ndihmojë në zbardhjen e plotë të ngjarjes.
Në kuadër të hetimit janë marrë në pyetje persona të ndryshëm, përfshirë të afërm dhe fqinj të Cenajt. Edhe pse drejtuesit e çështjes janë të bindur se kemi të bëjmë me një vrasje të lidhur me ngjarje të shkuara, mbeten ende të paqarta motivet konkrete, periudha e përgatitjes së sulmit dhe identiteti i të gjithë të përfshirëve.
Ngjarja tragjike ndodhi në orët e para të mëngjesit, teksa viktima ishte nisur drejt vendit të punës. Fillimisht, u raportua për një incident të zakonshëm, por më vonë, pas kontrollit mjekësor në spital, u zbulua se Cenaj ishte qëlluar me armë zjarri në kokë. Ai nuk mundi t’u mbijetojë plagëve dhe ndërroi jetë tre ditë më pas.
Fatos Cenaj kishte punuar më herët në sistemin penitenciar në Shqipëri. Në Itali, jetonte prej dy vitesh në Fontaniva me bashkëshorten dhe vajzën e tij. Sipas të afërmve, ai ishte njeri i qetë dhe i respektuar. Pas ngjarjes, familja është larguar nga banesa për arsye sigurie.