Një ngjarje tragjike ka ndodhur mbrëmjen e djeshme në Alpet Shqiptare, ku një turist holandez ka humbur jetën pasi ka rënë në një humnerë në shtegun malor mes Thethit dhe Valbonës, në zonën e Qafës së Valbonës.
Sipas informacioneve paraprake, viktima ishte pjesë e një grupi turistësh të huaj që po udhëtonin pa guidë të organizuar. Ngjarja ndodhi rreth orës 19:00, kur miqtë e tij njoftuan shërbimet e emergjencës pas rrëshqitjes së tij nga një shkëmb në një terren të thepisur.
Menjëherë pas alarmit, u mobilizuan Policia e Shtetit, ekipet e kërkim-shpëtimit malor, staf mjekësor si dhe një helikopter nga Tirana, për të lehtësuar ndërhyrjen në zonën e vështirë malore.
Në operacion morën pjesë edhe specialistë nga Shqipëria dhe Kosova, si pjesë e bashkëpunimit rajonal për situata emergjente. Federata Shqiptare e Alpinizmit dhe Turizmit Malor dërgoi një ekip profesionistësh nga Valbona, ndërsa në ndihmë u angazhua edhe një ekip nga Federata e Bjeshkatarisë së Kosovës.
Për shkak të terrienit të vështirë dhe kushteve të natës, operacioni zgjati disa orë dhe trupi i pajetë u arrit të nxirrej vetëm në orët e para të mëngjesit të sotëm.