Ish-manjati i naftës, Mikhail Khodorkovsky, tregon pse Rusia do t’i duhen dekada për të kapërcyer “narrativat imperialist-ushtarake” që shtyn Moska…
Kritiku kryesor i Kremlinit, Mikhail Khodorkovsky, e paralajmëroi Evropën të përgatitet për një konfrontim afatgjatë me Rusinë, pavarësisht se si do të zhvillohet lufta e Moskës kundër Ukrainës.
“Duhet të presim që një lloj Lufte e Ftohtë të zgjasë të paktën dhjetë vjet”, parashikoi këtë javë ish-manjati i naftës Khodorkovsky në një aktivitet privat në Bruksel.
Sipas biznesmenit në mërgim, e vetmja pengesë kundër agresionit të mëtejshëm rus kundër Evropës gjatë asaj periudhe do të jetë bindja e Presidentit Vladimir Putin se Perëndimi përbën një kërcënim të besueshëm ushtarak.
Gjatë Luftës së Ftohtë, e cila zgjati pothuajse gjysmë shekulli, Bashkimi Sovjetik dhe Perëndimi punuan për të minuar njëri-tjetrin pa rrezikuar konflikt të hapur në Evropë dhe një luftë të mundshme bërthamore.
Zyrtarët e lartë evropianë dhe të NATO-s aktualisht argumentojnë se Rusia po ringjall politikën e saj të rraskapitjes, duke përdorur taktika të luftës hibride për të destabilizuar Perëndimin dhe për të mbjellë përçarje.
Khodorkovsky, i cili kaloi dhjetë vjet pas hekurave në sistemin burg të Putinit dhe tani jeton në Londër, minimizoi efektivitetin e sanksioneve perëndimore në ndikimin e Kremlinit, duke thënë se ato po “krijonin njëfarë presioni mbi ekonominë ruse, por asgjë dramatike”.
Ai ishte po aq skeptik se fushata e gjatë me dronë e Ukrainës kundër rafinerive ruse të naftës do ta paralizonte makinën e luftës së Kremlinit.
“Edhe droni më i fuqishëm, madje edhe një raketë Tomahawk, mund të godasë më së shumti rreth dy hektarë”, shpjegoi Khodorkovsky, ish-pronari i gjigantit të naftës Yukos dhe dikur njeriu më i pasur i Rusisë.
“Një strukturë tipike në Siberi zakonisht shtrihet në një sipërfaqe prej 1,500 hektarësh. Dëmi që shkaktohet është i barabartë me shkeljen e këmbës së dikujt”, tha ai.
Në realitet, argumentoi Khodorkovsky, i vetmi moment kur kontrolli i pushtetit i Putinit mund të ishte thyer realisht ishte gjatë dy viteve të para pas fillimit të pushtimit të tij në shkallë të plotë, nëse Rusia do të kishte pësuar një disfatë vendimtare ushtarake në Ukrainë.
Ai tha se kjo dritare tani është mbyllur.
Por, shtoi ai me ironi, “ne kemi një traditë [në Rusi] që diktatorët tanë kanë tendencë të largohen diku midis moshës 70 dhe 80 vjeç.”
Putin mbushi 73 vjeç këtë tetor.
Muajin e kaluar, autoritetet ruse hapën një çështje të re penale kundër
Khodorkovsky-t, duke e akuzuar atë për udhëheqjen e një “organizate terroriste” dhe komplotimin e një pushtimi të dhunshëm me ndihmën e paraushtarakëve ukrainas.
Në deklaratën e tij, Shërbimi Federal i Sigurisë (FSB) listoi gjithashtu 22 persona të tjerë të lidhur me Komitetin Rus Kundër Luftës të Khodorkovsky-t, një grup rusësh në mërgim me mendje opozitare.
Disa nga ata që janë përmendur kanë vuajtur tashmë dënimin me burg në Rusi ose janë përballur me kërcënimin e ndjekjes penale për aktivitetet e tyre politike. Por lista përfshin edhe akademikë dhe biznesmenë.
Vetë Khodorkovsky kaloi një dekadë në një koloni penale siberiane përpara se të falej në vitin 2013, në një rast historik që shihet gjerësisht si akti hapës i fushatës së Putinit për të shtypur disidentët.
Eshe pse çështja u përqendrua në evazionin fiskal dhe akuza të tjera financiare dhe rezultoi në shpronësimin e Yukos, ajo u konsiderua kryesisht si një paralajmërim politik për kritikët e Kremlinit.
Akuzat e reja kundër Khodorkovsky-t dhe aleatëve të tij erdhën vetëm dy javë pasi Asambleja Parlamentare e Këshillit të Evropës deklaroi se do të krijonte një “platformë për dialog” me forcat opozitare demokratike ruse.
Duke folur në Bruksel, Khodorkovsky tha se reagimi i fortë i Kremlinit tregoi “sa i shqetësuar është Putini nga ideja e forcave demokratike ruse që fitojnë legjitimitet, qoftë edhe simbolikisht”.
Edhe pse personat e emëruar nga FSB-ja tashmë jetojnë jashtë vendit dhe janë përtej mundësisë së menjëhershme ligjore të Kremlinit, disa prej tyre kanë raportuar se kanë probleme me bankat evropiane dhe thonë se akuzat për terrorizëm mund ta ndërlikojnë udhëtimin nga frika e ekstradimit në Rusi.
Khodorkovsky i tha Politico-s se ishte i bindur se një ditë do të kthehej në një Rusi post-Putin, por paralajmëroi se do të duheshin dekada më shumë që vendi të çlirohej nga “narrativa imperialist-ushtarake” që e portretizon Rusinë si të rrethuar nga armiqtë dhe justifikon pushtimin e fqinjëve të saj.
“Brezi im nuk do të jetojë për të parë ditën kur shoqëria ruse të kthehet në një gjendje normaliteti”, tha ai.
I pyetur nëse e konsideronte këtë perspektivë dekurajuese, Khodorkovsky buzëqeshi.
“Kur punon në industrinë e rëndë, mësohesh të fillosh procese që do të të zgjasin më shumë. Nga eksplorimi i një fushe nafte deri në prodhim mund të duhen 15 vjet ose më shumë”, u përgjigj ai.
“E ardhmja është po aq reale për mua sa e tashmja, dhe më motivon”. /Përshtatur nga Politico/
