Një grup të rinjsh të “Go Outdoor Berat”, të gjithë guida të certifikuara në rafting, ndërmorën një nismë solidariteti për t’u ardhur në ndihmë familjeve të prekura nga prurjet e larta të lumit Osum, pas rreshjeve të dendura të ditëve të fundit.
Me varkat e tyre, ata u futën në rrjedhën e lumit duke përshkruar zonat pranë brigjeve, për të ofruar ndihmën e parë në rast nevoje dhe për të monitoruar situatën nga afër.
Por ky mision humanitar nuk është mirëpritur nga strukturat e rendit.
Të rinjtë janë shoqëruar në ambientet e Drejtorisë Vendore të Policisë Berat, me pretendimin se kanë shkelur rregullat e sigurisë dhe nuk kanë marrë autorizim për hyrjen në rrjedhën e lumit në kushte të rrezikshme.
Aktualisht, 5 të rinj së bashku me gazetarin Grisel Zenuni i cili ishte duke raportuar mbi këtë nisëm po mbahen prej disa orësh në ambientet e Komisariatit të Policisë, ndërsa vetë ata pretendojnë se nuk janë njoftuar për ndalimin e lundrimit në Osum.
Ata e konsiderojnë këtë veprim të papritur si një “goditje nga konkurenca”, duke nënkuptuar se operatorë të tjerë të rafting-ut mund të kenë ushtruar presion për ndalimin e tyre.
