Berishës i është kërkuar në forma të ndryshme të rinovojë apo rifreskojë strukturat drejtuese të PD-së, ndërsa ka një përplasje sa në rrjetet sociale aq edhe në media ndaj klaneve apo grupimeve që duket se janë kristalizuar në këtë parti dhe që synojnë të fitojnë terren…
Kreu demokrat Sali Berisha nis këtë javë turin e “Foltoreve”, duke përsëritur në këtë mënyrë atë që bëri 4 vite më parë, kur zbarko në bazën e militantëve dhe mbështetësve të PD-së, për të marrë drejtimin e partisë.
Por në dallim me turin e parë, në këtë “Foltore2”, Berisha duket se do të synojë të qetësojë militantët, që po shfaqin revoltat e tyre pas humbjes në zgjedhjet e 11 majit, ndaj lidershipit të PD-së.Sinjalin e revoltës ia dha një zonjë nga Paskuqani, që nuk nguroi t’i kundërvihej Flamur Nokës, Sekretarit të Përgjithshëm në PD dhe një prej më të besuarve të Sali Berishës.
Po kështu një tjetër sinjal është apatia e treguar në pjesëmarrjen e demokratëve në ato që konsiderohen si ‘Parlamenti qytetar’, një formë proteste poshtë zyrës së Edi Ramës në bulevardin “Dëshmorët e Kombit”.
Por komentet dhe reagimet në rrjetet sociale janë një tjetër sinjal që duket se kreu demokrat ka marrë nga baza e PD-së, e zhgënjyer jo thjesht nga rezultati i 11 majit, por edhe mënyra se si lidershipi i forcës më të madhe opozitare, po menaxhon situatën pas humbjes.
Po kështu ka pasur kritika dhe akuza të forta për pazare, kur deputetët hynë në Kuvend, morën mandatet, ndonëse për javë e javë me rradhë deklarohej nga selia e PD se rezultati i farsës zgjedhore nuk do të njihej.
Berishës i është kërkuar në forma të ndryshme të rinovojë apo rifreskojë strukturat drejtuese të PD-së, ndërsa ka një përplasje sa në rrjetet sociale aq edhe në media ndaj klaneve apo grupimeve që duket se janë kristalizuar në këtë parti dhe që synojnë të fitojnë terren.
Por edhe vetë Berisha e ka pohuar se duhet një reformim, një afrim i figurave dhe emrave të rinj, por pa dhënë shpjegime se si mund të arrihet kjo, kur nuk shfaqet asnjë shenjë për spostimin e atyre që ka në krah. Kreu demokrat një ditë më parë i dha fund çdo hipoteze se ai mund të tërhiqej, mund të largohej nga drejtimi i PD-së, për të çelur rrugën e një gare, ndërsa tha se është me mision.
Dhe duket se kjo do të jetë teza që Berisha do të mbajë në ‘Foltoren2’. Ai do e paraqesë veten si një misionar që do të synojë përmbushjen e qëllimit: largimin e Edi Ramës dhe krijimin e kushteve për zgjedhje të parakohshme, dhe rikthimin e PD-së në pushtet.
Dhe po kështu Berisha do të përsërisë apelin drejtuar degëve të PD-së për afrimin e figurave të reja, për analiza, nxjerrje dhe mbajtje përgjegjësish, teza që pothuajse i thotë çdo ditë, por duket se nuk po ngjisin.
Berisha e ka të qartë se militantët i ka në krah, një minorancë ndoshta e papërfillshme mund të shprehë idenë që edhe ai duhet të largohet, por kur vjen puna te emrat e tjerë në kupolën drejtuese të PD-së, kritikat dhe pakënaqësitë janë të pafundme.
Ndaj dhe ajo që nuk dihet dhe mbetet për t’u parë është nëse kreu demokrat do të mundë të qetësojë militantët e tij për ata që i konsideron si ‘bashkëpunëtorët më të ngushtë’.
