Category: Sport

Tre të dhëna përbëjnë një fakt, fakt është që Liga e Kombeve kthehet në mallkim për Berat Gjimshitin. Për herë të tretë radhazi, kapiteni kuqezi humbet grumbullimin me ekipin përfaqësues duke mos zbritur për asnjë minutë në këtë turne. Kjo është një humbje e madhe për Sylvinho-n pasi prezenca e tij është thjesht e pazëvendësueshme, pavarësisht formës së lojtarëve të tjerë.

Gjimshiti doli i dëmtuar nga takimi kundër Udinesës ndërsa këtë të hënë iu nënshtrua edhe ekzaminimeve mjekësore më të detajuara. Për fat të mirë nuk bëhet fjalë për një thyerje të kaviljes, por sërish goditja e pësuar nuk e lejon të jetë në dispozicion të ekipit përfaqësues për dy takimet e fundit të fazës së grupeve në Ligën e Kombeve.

Mediat italiane bëjnë me dije se gjendja e Gjimshitit do të monitorohet në vazhdimësi, për të gjitha bashkohen në një pikë, qendërmbrojtësi nuk do të udhëtojë drejt Tiranës për t’iu bashkuar Shqipërisë, por do të qëndrojë në Bergamo për të nisur fazën e riaftësimit.

Keidi Bare është kthyer pas shumë kohësh në listën e Kombëtares shqiptare, me trajnerin Silvinjo që e ka përfshirë mes emrave të përzgjedhur për sfidat e muajit nëntor ndaj Çekisë dhe Ukrainës. Por prania e mesfushorit është në dyshim për shkak të një dëmtimi që ka pësuar prej dy javësh e që vazhdon ta mbajë larg fushave të lojës

Trajneri Silvinjo e pranoi se situata e Bares ishte nën vëzhgim, por tashmë zbulohet se ka një kërkesë zyrtare që ai të mos jetë i grumbulluar më Shqipërinë për shkak të dëmtimit të pësuar së Spanjë.

Klubi i Saragozës ka kërkuar që Bare të mos jetë i pranishëm në listën e kuqezinjve për këto ndeshje, duke argumentuar se nuk është ende i riaftësuar nga dëmtimi për të zhvilluar stërvitje normalisht, arsye pse gjatë gjithë këtyre ditëve ka bërë vetëm ushtrime veçmas grupit.

Klubi spanjoll shpreson që Silvinjo të pranojë këtë kërkesë dhe të lërë të lirë Baren që të mos udhëtojë drejt vendit tonë për t’u verifikuar nga stafi mjekësor kuqezi, për të vazhduar rikuperimin e tij në Spanjë. Vetëm të hënën do të mësohet vendimi i Silvinjos dhe stafit të tij sa i përket grumbullimit apo jo të mesfushorit, i cili ishte një nga mungesat e mëdha në Euro 2024 edhe pse po kalonte një formë shumë e mirë me klubin e tij.

Armando Broja ka hedhur pas krahëve dëmtimin, që e mbajti atë jashtë që nga muaji Korrik. Sulmuesi shqiptar është rikuperuar plotësisht dhe këtë të mërkurë u shfaq në stërvitjen e Everton.

23-vjeçari u transferua te skuadra angleze në fund të merkatos nga Chelsea, në huazim me të drejtë blerje, por ende nuk e ka bërë debutimin.

Broja vuante nga një problem në tendinë dhe ka qenë jashtë për disa muaj. Megjithatë, duket se makthi i dëmtimit ka kaluar dhe lojtari po përgatit rikthimin në fushë.

Everton zbuloi këtë të mërkurë se Broja është stërvitur me pjesën tjetër të skuadrës. Lojtarit do i duhen kohë për të kapur formën dhe tek anglezët nuk duan të nxitohen, pasi do të rrezikonin një tjetër dëmtim.

Broja nuk pritet të jetë pjesë e grumbullimit të Shqipërisë për dy ndeshjet e Ligës së Kombeve, ndaj Çekisë dhe Ukrainës, pasi nuk ka kapur ende ritmin.

“Pushimeve” të stafit të ekipit kombëtar po u vjen fundi.

Silvinjo dhe ndihmësit e tij kanë filluar të përpilojnë listën e futbollistëve që do të grumbullojnë këtë muaj dhe mes shumë pengesash dhe pritje, ata duhet të formojnë një grup lojtarësh që do të duhet të fitojë me Çekinë dhe Ukrainën, dy ndeshjet që Kombëtarja shqiptare luan në shtëpi, më 16 dhe 19 nëntor për kompeticionin e Ligës së Kombeve.

KUMBULLA MUNGON Në dy ndeshjet e shtatorit Marash Kumbulla luajti shumë mirë, ndërkohë performanca e tij erdhi në rënie gjatë takimit në Çeki, duke detyruar Silvinjon që me Gjeorgjinë të aktivizonte Ajetin. Aktualisht të gjithë mbrojtësit e qendrës janë të gatshëm, përveç Marashit, i cili ka pësuar një dëmtim në muskujt aduktorë të këmbës së majtë dhe për këtë do të humbasë ndeshjen e radhës kundër Valencias. Ky ishte konfirmimi i klubit të Espanjolit për situatën e mbrojtësit. Megjithatë, me rikthimin e kapitenit Gjimshiti dhe Ismajlin krah tij, alternativat në stol nuk mungojnë me Ajetin dhe Mihajn, që po luajnë rregullisht dhe japin garanci në këtë repart.

MANAJ-ASLLANI “Tërmet” e quajtën mediat turke njoftimin për mungesën e Rei Manajt në ndeshjen e fundit për Sivasporin, vetëm dy orë përpara se takimi të fillonte. Kur të gjithë e prisnin sulmuesin titullar, klubi njoftoi për dëmtimin e tij muskulor. Nuk dihet koha e rikuperimit të Manajt, por një dhimbje koke ka nisur për Silvinjon, duke qenë se ai shihet si sulmuesi kryesor te kuqezinjtë. Nëse në sulm braziliani i stolit mund të gjejë një “pykë”, situata e Kristjan Asllanit është edhe më shqetësuese. Mesfushori mbetet truri i ekipit dhe përveçse nuk ka marrë asnjë minutë nga ndeshja në Gjeorgji ku shënoi golin e fitores, po has edhe një shqetësim në gju, çka ka detyruar Interin që ta lërë pushim në ndeshjen e së dielës me Venecian. Edhe për të nuk dihet nëse do të jetë gati deri javën tjetër.

BARE-DAKU Nëse në tetor Silvinjo kishte llogaritur Keidi Baren në listë (u shpreh vetë në konferencë), ai dëmtim i mesfushorit nuk mundësoi përfshirjen e tij në ekip. Por, mesa duket e njëjta situatë po vijon edhe këtë muaj. Bare është sërish jashtë për shkak dëmtimi dhe nuk dihet nëse do të jetë gati për Kombëtaren shqiptare në ndeshjet e nëntorit. Ndërkohë, një tjetër mungesë do të jetë vetëm për ndeshjen e parë, ajo e Mirlind Dakut, i cili ka plotësuar numrin e kartonëve të verdhë dhe nuk do të jetë në dispozicion. Ky është një fakt shqetësues sepse problemet në sulm janë evidente. Broja nuk është, Manaj në dilemë, Daku i pezulluar dhe Indrit Tuci i cili po ashtu ka qenë jashtë në dy ndeshjet e fundit, alternativat e vetme për qendrën mbeten Myrto Uzuni dhe Taulant Seferi. Të dy lojtarët shihen nga Silvinjo si sulmues krahu dhe spostimi i tyre në qendër për aq minuta sa u aktivizuan në ndeshjet e fundit, rezultoi i pasuksesshëm.