Shqiperia Ime

Category: Sport

  • “Panik” për Kombëtaren shqiptare, kapiteni Gjimshiti dëmtohet pas shënimit të golit në Champions

    “Panik” për Kombëtaren shqiptare, kapiteni Gjimshiti dëmtohet pas shënimit të golit në Champions

    Berat Gjimshiti ishte një nga protagonistët e fitores së Atalantës në Ligën e Kampionëve, ku mundi me rezultatin 0-3 Shakhtar Donetsk, me kapitenin e Kombëtares shqiptare që realizoi golin e parë të sfidës.

    Gjithsesi, pas përfundimit të pjesës së parë, 31-vjeçari nuk u hodh më në fund, duke u zëvendësuar nga Pasalic.

    Siç raporton “Sky Sport”, Gjimshiti ndjeu dhimbje të lehta në ije, me trajnerin Gasperini që preferoi mos ta rrezikonte atë.

    Kjo gjë ka sjellë panik në kampin shqiptar, vetëm një ditë përpara publikimit të listës nga Sylvinho për duelet me Republikën Çeke dhe Gjeorgjinë në Ligën e Kombeve, të cilat do të luhen më 11 dhe 14 tetor.

    Gjimshiti nuk ishte pjesë e dy ndeshjeve të para me Ukrainën dhe Gjeorgjinë, sërish për shkak të një dëmtimi që mori vetëm pak ditë përpara grumbullimit dhe nëse kjo gjë ndodh sërish, atëherë do të jetë një problem tejet i madh për Sylvinhon dhe stafin e tij, i cili duhet të bëjë pa një nga pikat kyçe të skuadrës.

  • Gjimshiti shënon në Champions, kalon në avantazh Atalantën (Video)

    Gjimshiti shënon në Champions, kalon në avantazh Atalantën (Video)

    Berat Gjimshiti ka gjetur golin në Champions League, duke kaluar Atalantën në avantazh.

    Pas një krosi në zonë, Gjimshiti ka arritur ta çojë topin në rrjetë.

    Aktualisht Atalanta udhëheq me rezultatin 0-1 ndaj Shakhtar Donetsk.

  • Tifozët i ngatërrojnë të ëmën me gruan, sulmuesi shqiptar bëhet hit në rrjetet sociale

    Tifozët i ngatërrojnë të ëmën me gruan, sulmuesi shqiptar bëhet hit në rrjetet sociale

    Një foto e sulmuesit shqiptar Leon Dajaku në rrjetet sociale, ka krijuar një ngatërresë të pazakontë mes ndjekësve të futbollistit. Ai shfaqej në atë foto me një bionde, që shumëkush mendoi se ishte e dashura e tij.

    Por në fakt, ajo është Blerta, e ëma e futbollistit 23-vjeccar i cili tashmë luan në Kroaci me fanellën e Hajduk Split, teksa më parë ka qenë pjesë e Bajern Mynih dhe Sandërlend.

    Blerta u bë një emër i njohur në rrjetet sociale në Kroaci pas transferimit të të birit atje, duke grumbulluar me mijëra ndjekës në faqen e saj në Instagram.

    Dhe estetistja me prejardhje nga Kosova, nuk ngurron të postojë herë pas here për ndjekësit e shumtë foto nga udhëtimet e saj si Dubai, Ishujt Maldive, Parisi apo edhe Anglia, ku ka ndjekur nga afër të birin.

    Duke komentuar në rrjetet sociale në foton në fjalë, një tifoz shkroi “Kjo është e ëma e tij, jo gruaja. Jam absolutisht i mahnitur”. Ndërsa një tjetër shtoi “Ai duket më i plakur se e ëma”, për foton që është bërë virale jo vetëm në Kroaci, por edhe në media më të njohura ndërkombëtare.

  • Mori topin në Champions pas tripletës, sulmuesi i Dortmundit falenderon në gjuhën shqipe

    Mori topin në Champions pas tripletës, sulmuesi i Dortmundit falenderon në gjuhën shqipe

    Karim Adejemi ishte padyshim lojtari i ndeshjes në fitoren mbrëmë të Dortmundit përballë Sëlltik. 7 me 1 fitoi klubi gjerman në Ligën e Kampioneve dhe 3 gola u shënuan pikërisht prej Adejemit.

    Pas fitores fitoi dhe çmimin “Lojtari i Ndeshjes” nga UEFA. Bashkë me të dhe topin e ndeshjes, për shkak të tripletës së shënuar. Nuk mund të mungonte më pas një foto me topin e marrë.

    “Flm o bir”, shkruan Adejemi në postimin e tij ku një prej firmave shoqërohet me “Ta ha zemrën”.

    Sigurisht që lidhja e tij me shqipen nuk është e rastësishme, por vjen për shkak të partneres së tij shqiptare, këngëtarja Loredana.

  • Albina Drazhi, argjend në mundje: Synoj medalje në Europian dhe Botëror

    Albina Drazhi, argjend në mundje: Synoj medalje në Europian dhe Botëror

    Albina Drazhi mori medaljen e parë në një turne të rëndësishëm ndërkombëtar të mundjes. 26-vjeçarja u rendit e dyta, duke merituar argjendin në aktivitetin e zhvilluar këtë fundjavë në Kroaci. Çdo garë për të vlen për t’u përmirësuar.

    “Sa më shumë kampionate ndërkombëtare bëjmë të rritet vetëbesimi, sepse e provon veten si je me kundërshtaret e tjera.”

    Synimi është një medalje në Europian apo Botëror, ku presioni dhe ana emocionale është më e fortë.

    “Duhet akoma më shumë punë dhe përmirësim për të arritur medalje në Europian apo Botëror pasi janë më shumë shtete, ka më shumë presion. Edhe nëse do të përballesha me të njëjtët kundërshtarë, presioni është më i lartë në Europian apo Botëror.”

    Gara e radhës për Albina Drazhin do të jetë Botërori që do të mbahet në fund të Tetorit në Tiranë.

  • Goli i dytë në 2 ndeshje radhazi, sulmuesi shqiptar shkëlqen në Superligën zviceriane (Video)

    Goli i dytë në 2 ndeshje radhazi, sulmuesi shqiptar shkëlqen në Superligën zviceriane (Video)

    Labinot Bajrami ka gjetur golin e dytë në Superligën zviceriane këtë sezon. Sulmuesi shqiptar shënoi në ndeshjen e dytë radhazi që aktivizohet titullar me Uinterthur.

    Kësaj here viktima e 19-vjeçarit ishte Lugano, teksa më parë e kishte pësuar Jong Bojs. Fatkeqësisht për skuadrën e tij ishte goli i vetëm, ndërsa të dyja ndeshjet u humbën 1-4 dhe 2-1.

    Bajrami po jep sinjale të mira. Tek Uinterthur është në huazim, pasi kartonin e tij e zotëron Zyrih.

    Goli i Labinot Bajramit: (VIDEO)

  • Sporti italian në zi, gjendet pa shenje jete futbollisti i njohur

    Sporti italian në zi, gjendet pa shenje jete futbollisti i njohur

    Ish-lojtari i Kaljarit, Andrea Kapone, është gjetur pa shenja jete në moshën 43-vjeçare këtë mëngjes në qytetin e Kaljarit.

    Është vënë re një plagë e madhe në kokë, që tregon se ka qenë viktimë e një aksidenti, ndoshta një rënje me pasojë fatale për jetën.

    Organet përkatëse po punojnë aktualisht për zbardhjen e ngjarjes, ndërsa kanë mundur vetëm të tregojnë për vdekjen e tij fillimisht.

    43-vjeçari ishte një mesfushor në karrierën e tij. Gjithçka e nisi me Kaljarin, teksa veshi po ashtu fanellën e Sorës, Trevisos, Grosetos, Vicencas dhe Salernitanas.

  • Lajm i hidhur për futbollistin e Kombëtares shqiptare, mbrojtësi humb nga jeta njeriun e shtrenjtë

    Lajm i hidhur për futbollistin e Kombëtares shqiptare, mbrojtësi humb nga jeta njeriun e shtrenjtë

    Futbollisti i Kombëtares shqiptare, Kastriot Dermaku ka humbur nga jeta nënën e tij.

    Për këtë lajm të trishtë ka reaguar edhe presidenti i FSHF-së, Armand Duka. Ai i shpreh ngushëllimet mbrojtësit dhe familjarëve të tij.

    Postimi i plotë

    Mësova me hidhërim të thellë lajmin e ndarjes nga jeta të nënës së futbollistit të Kombëtares sonë, Kastriot Dermakut. Në një moment të vështirë si ky për Kastriotin dhe familjen e tij, dëshiroj t’u përcjell ngushëllimet e mia dhe të Federatës Shqiptare të Futbollit për humbjen e njeriut të tyre të dashur. U prehtë në paqe!

  • Njeriu i golave të shpejtë/ Bajrami vendos rekord për Rangers në Europë, nuk ndodhte që nga…1998

    Njeriu i golave të shpejtë/ Bajrami vendos rekord për Rangers në Europë, nuk ndodhte që nga…1998

    Nedim Bajrami ishte padyshim ylli i fitores së Rangers përballë Malmo në Ligën e Europës, duke shënuar brenda 55 sekondave.

    Ky ishte goli i parë i fantazistit shqiptar me fanellën e skocezëve dhe i pari që nga goli historik që shënoi përballë Italisë në Europian, pas vetëm 24 sekondave.

    Jo vetëm njeriu i golave të shpejtë, por Bajrami është dhe njeriu i rekordeve, me 25-vjeçarin që theu një “tabu” që nuk ndodhte që nga viti 1998.

    Përpara 26 viteve, ishte Gennaro Gattuso që shënoi në minutën e parë për Rangers në një kompeticion europian, gjë që u përsërit sërish nga Nedim Bajrami mbrëmjen e djeshme.

  • Nuk ka dyshim! Nedim Bajrami “Lojtar i Ndeshjes”, shikoni notat dhe statistikat në Ligën e Europës

    Nuk ka dyshim! Nedim Bajrami “Lojtar i Ndeshjes”, shikoni notat dhe statistikat në Ligën e Europës

    Nedim Bajrami është “Lojtari i Ndeshjes”, Malmo – Rejnxhërs, që u fitua nga këto të fundit me rezultatin 0-2.

    Mesfushori i Kombëtares shqiptare shënoi në minutën e parë të takimit në favor të skocezëve, teksa mori dhe notën më të lartë të takimit.

    Pikërisht 8.8 është vlerësimi që “Sofascore” i jep Bajramit pas paraqitjes mbresëlënëse. Bajrami luajti 84 minuta, për t’u zëvendësuar pasi kishte kryer misionin e tij.

    Ra në sy për 4 goditjet e tij, 3 prej të cilave në portë. Mesfushori ia doli të driblojë saktësisht 1 herë. Krijoi 3 shanse të mëdha, ndërsa 4 ishin pasime kyçe.