Category: Sport

Ermal Krasniqi ka lënë menjëherë shenjë me fanellën e Spartës së Pragës, pak kohë pasi iu bashkua kampionëve të Çekisë.

Sulmuesi i Kosovës, sot ka shënuar golin e tij të pore në ndeshje zyrtare me fanellën e këtij klubi, duke e ndihmuar në fitoren 4-1 në transfertë ndaj Teplice.

Krasniqi hyri në fushë kur shifrat ishin 2-1 për Spartën e Pragës, teksa nga fusha e lojës dilte pikërisht Qazim Laçi. Futbollist ofensiv ndihmoi ekipin e tij që në minutat e fundit të thellonte diferencën e të mos vinte në diskutim fitoren.

Pas një aksioni individual në minutën e pestë shtesë të ndeshjes në krahun e majtë, ai shmangu kundërshtarët dhe lëshoi një gjuajtje që kaloi mes mbrojtësve dhe përfundoi në rrjetë, duke vulosur suksesin 4-1.

Një gol të cilin ai e festoi duke shkuar drejt pankinës për të përqafuar pikërisht Qazim Laçin, një ndër më entuziastët për këtë gol të parë të Krasniqit.

⚽️ Premiérový gól ve sparťanském dresu si užil Ermal Krasniqi, který se tak podílel na výhře 4:1 nad Teplicemi! 🤩 #chanceliga pic.twitter.com/jHNIPIFFP2

— O2 TV Sport (@O2TVSportCZ) July 27, 2024

Luiza Gega nuk ka udhëtuar ende drejt Parisit për pjesëmarrjen në Lojërat Olimpike, ndaj nuk ka qenë në ceremoninë e hapjes së aktivitetit.

Por aty ajo ka parë me keqardhje se si delegacioni shqiptar është shfaqur duke valëvitur një flamur i cili nuk është zyrtar shqiptar, por një nga imitimet false që qarkullojnë.

Një ngjarje për të cilën ajo ka shprehur pakënaqësinë e saj dhe e ka cilësuar si të papranueshme që të parakalohej me atë që nuk është simboli kombëtar, ai për të cilin merret pjesë në gara të tilla.

“Ajo që nuk më pëlqeu është se vura re që flamuri ynë nuk ishte siç duhej, shqiponja nuk ishte shqiponja e vërtetë, pra ishte ai imitimi kinez dhe kjo nuk më pëlqeu, sepse mendoj që unë të paktën nuk do ta kisha pranuar kurrsesi. Duhet pasur një kujdes shumë i madh kur bëhet fjalë aq më tepër për flamurin, sepse kjo është arsye përse ne shkojmë aty, të prezantojmë kombësinë nga vijmë, ngjyrat e flamurit, etj”, tha Gega për TV Klan.

“Kush e ka përgjegjësinë për këtë flamur? Nuk e kam idenë të them të drejtën, vetëm e vura re nga rrjetet sociale dhe pashë… sepse e di shumë mirë sesi është shqiponja, qoftë tek kthetrat, qoftë tek sqepi, qoftë tek bishti. Po të kisha qenë flamurmbajtëse nuk do të kisha pranuar kurrsesi që të parakaloja me një flamur që nuk është i duhuri”, theksoi atletja shqiptare.

Kosova ka parakaluar me sportistë e saj mbi varkën në lumin Sena, në hapjen zyrtare të Lojërave Olimpike ‘Paris 2024’.

Hapja zyrtare u bë sot më 26 korrik dhe do të vazhdojnë deri më 11 gusht 2024 në Paris të Francës.

Kosova parakaloi me sportistët e saj dhe përfaqësuesit e trajnerët, duke valëvitur flamurin shtetëror që mbahej nga Akil dhe Nora Gjakova, vëlla e motër, dy xhudist botëror. Tetë ishte numri i sportistëve që parakaluan, pasi boksierja Donjeta Sadiku nuk ishte e pranishme.

Kosova merr pjesë me gjashtë sportistë të kualifikuar, pesë nga xhudo dhe një nga boksi, si dhe tre sportistë me ftesë; dy nga noti dhe një nga atletika. Distria Krasniqi, Nora Gjakova, Laura Fazliu, Akil Gjakova dhe Loriana Kuka vijnë nga xhudo. Boksin do ta përfaqësojë Donjeta Sadiku, teksa atletikën Gresa Bakraqi. Hana Beiqi dhe Adell Saboviq përfaqësojnë notin.

Luis Hasa ka debutuar me skuadrën e parë të Juventusit, në miqësoren që bardhezinjtë zhvilluan kundër Nuremberg.

20-vjeçari shqiptar u aktivizua në 45 minutat e para në disfatën 3-0 që “Zonja” mori përballë skuadrës gjermane.

Ky është një hap i madh për Hasën, i cili prej kohësh luante me ekipet e reja të Juventusit dhe gjithashtu me skuadrën Juventus-U23 në Serie C.

Hasa është rritur në moshat e Italisë, i cili u shpall dhe Kampion Europe në vitin 2023 për moshat nën 19 vjeç.

Ernest Muçi mund të bëjë shumë shpejt realitet ëndrrën e tij për të luajtur në kampionatin anglez të futbollit.

Mediat turke raportojnë se më në fund klubi i Besiktas ka marrë oferta zyrtare nga dy klube të Premier League, të cilat janë të gatshme të nënshkruajnë me futbollistin shqiptar.

Raportohet se oferta e parë që i ka ardhur klubit turk është nga një klub i cili ka ofruar 15 milionë euro për Muçin dhe një rrogë prej 3 milionë eurosh në sezon për vetë futbollistin për ta bindur.

Besiktas ishte gati të pranonte këtë ofertë, kur brenda ditës i ka ardhur edhe një tjetër, ajo e Aston Villës e cila kërkonte Muçin si “paketë” bashkë me Semih Kiliçsoj. Për Kiliçsoj, klubi anglez është gati të paguajë 30 milionë euro, ndërsa vlerëson Muçin 12 milionë euro.

Negociatat mes palëve vazhdojnë, por duket se Besiktas është shumë i interesuar për të shitur Muçin duke parë lëvizjet që ka bërë në merkato dhe planin që ka për të kthyer përsëri brazilianin Talisca në ekip.

U përfol se te Rubin Kazani nuk do t’i besonin një fanellë për sezonin e ri, pas atij incidenti në fund të ndeshjes me Kroacinë ku këndoi në kor me Tifozët Kuqezi vargje kundër maqedonasve.

Por, Mirlind Daku jo vetëm që mori fanellë me numrin 10, por edhe e nisi kampionatin si titullar me skuadrën ruse pas pjesëmarrjes në Euro 2024 me Shqipërinë.

Sulmuesi nga Gjakova zbriti në fushë në sfidën hapëse të Premier Ligës ruse, në transfertë kundër Pari NN dhe gjeti rrugën e rrjetës në minutën e ‘5.

Goli i Dakut barazoi sfidës pasi për vendasit shënoi Ze Turbo që në minutën e 3-të të sfidës. Rubini shënoi edhe dy herë të tjera në minutat 33 dhe 42 për të mbyllur pjesën e par në avantazhin e dy golave. Bomberi kuqezi ishte protagonist edhe në golin e dytë, teksa asistoi Zotov.

Daku e nis kështu me këmbë të mbarë sezonin, ndërsa vitin e kaluar u rendit në vend të shtatë të listës së golashënuesve, me 10 gola dhe 4 asist në 28 ndeshje.