Category: Lajme

Avokati Spartak Ngjela ka komentuar rikthimin e ekspertëve amerikanë të OPDAT në Prokurorinë e Posaçme (SPAK), duke e cilësuar këtë si një zhvillim të natyrshëm dhe të pritshëm.

“Unë isha i bindur që do t’i kthenin, sepse është domosdoshmëri marrëveshja që Amerika ka me shtetet dhe në Ballkanin Perëndimor, në raport me konfliktin që ka me Moskën,” tha Ngjela.

Sipas tij, Shqipëria ka një rëndësi të veçantë historike dhe gjeopolitike për SHBA-në, veçanërisht për shkak të pozicionit të saj strategjik.

“Shqipëria është vlerë e madhe historike, kështu ka qenë gjithmonë, edhe kur ishte e pushtuar. Pozicioni ynë gjeografik, sidomos ngushtica, e bën vendin tonë të rëndësishëm. Ndaj politika shqiptare duhet ta shfrytëzojë këtë në maksimum,” theksoi ai.

Ngjela argumentoi se rikthimi i ekspertëve të OPDAT në SPAK tregon se SHBA vazhdon të mbështesë fuqishëm drejtësinë shqiptare dhe luftën kundër korrupsionit.

“Ardhja e tyre na ngre përsëri aty ku ishim, sepse politika amerikane është në favor të interesit shqiptar,” përfundoi avokati.

Një ngjarje e rëndë ka ndodhur mbasditen e sotme në qytetin e Sarandës. Mësohet se një burrë ka plagosur me thikë bashkëshorten e tij.

Konkretisht ngjarja ka ndodhur në lagjen nr.4 të qytetit bregdetar, ndërkohë gruaja e identifikuar si Miranda Budini është qëlluar me thikë në bark.

Gjithashtu e plagosura është transportuar drejt spitalit të Sarandës ku po merr ndihmën e parë mjekësore dhe ndodhet jashtë rrezikut për jetën.

Ndërkohë policia po vijon kërkimet për kapjen e autorit.

Rayan Alwan dhe familja e saj palestineze e përbërë nga katër anëtarë, babai Fadi Alwan, nëna Rania Matar dhe vëllai jetonin në Liban në kushte shumë të vështira ekonomike. Në vitin 2018 në moshën 16-vjeçare Rayan u martua nga familja me një burrë që ia kishte gjetur nëna e saj dhe e kishte detyruar të martohej edhe pse Rayan nuk ishte dakord.

Në moshën 17-vjeçare Rayan u bë nënë për herë të parë ku lindi një djalë. Rayan kishte një bashkëshort agresiv dhe të dhunshëm, i cili dhunonte dhe abuzonte me të sistematikisht. Rayan kishte tentuar të ndahej, por nëna dhe babai nuk e lejonin.

Mes dhunës dhe terrorit në moshën 21-vjeçare Rayan bëhet sërish nënë dhe lind fëmijën e dytë e cila ishte vajzë. Dhuna dhe abuzimi nga bashkëshorti vijonte sërish, por traumën më të madhe Rayan e pësoi kur zbuloi se nëna e saj kishte një lidhje intime me bashkëshortin e saj dhunues.

Këtu nisën sërish konfliktet mes saj dhe nënës e cila e mbante nën presion që mos të tregonte të vërtetën, por Rayan vendosi të divorcohej. Bashkëshorti nuk e pranoi, por ajo u largua nga shtëpia dhe jetoi vetëm në Liban. Sipas ligjit të Libanit rregulli ishte që fëmijët do të qëndronin me ish-bashkëshortin e Rayan.

Në vitin 2023 nëna e saj Rania Matar sëbashku me vëllanë e Rayan largohen nga Libani dhe shkojnë si azilantë në Gjermani. Ndërsa Rayan vijonte të qëndronte në Liban e vetme, po ashtu edhe babai i saj. Nëna gjatë kësaj kohe kishte krijuar lidhje të dyshimta në Gjermani dhe dyshohet se punonte si punonjëse seksi.

Në vitin 2024 edhe Rayan dhe babai i saj largohen nga Libani për të shkuar në Gjermani te nëna dhe vëllai. Për shkak të kushteve të këqija të jetesës në Liban, ajo vendosi të largohej, me shpresën se gjërat do të ishin ndryshe diku tjetër.

Ajo udhëtoi në Turqi me babanë, më pas në Greqi ku qëndruan rreth 6 muaj dhe kur mori lejen e qëndrimit atje më pas u bashkua me nënën e saj në Gjermani në muajt e parë të vitit 2024. Në Gjermani qëndronin me pasaportën greke. Rayan filloi një jetë të re dhe jetonte e vetme në një kamp refugjatësh në Gjermani, ndërsa nëna dhe babai jetonin bashkë dhe jo me vajzën e tyre. Rayan filloi punë si kamariere në një restorant që e kishin disa arabë në Berlin. Ajo punonte për arabët sepse nuk dinte gjuhën. Rayan fitonte rreth 50 euro në ditë, por jetesa për të ishte e vështirë pasi paratë që fitonte nga puna ia merrte nëna dhe babai. Rinisën sërish konfliktet e saj me nënën, konfliktet me familjen u shtuan edhe më shumë kur Rayan u dashurua me një djalë të varfër nga Libani i cili punonte në një supermarket pranë restorantit ku punonte 24-vjeçarja në Gjermani.

Nëna dhe babai nuk ishin dakord me lidhjen e vajzës së tyre sepse djali që ajo dashuronte ishte i varfër. Rayan njohu shoqe dhe shokë në Gjermani të cilët i qëndruan afër. Drama e 24-vjeçares palestineze vijoi kur zbuloi që nëna e saj kishte punuar si punonjëse seksi, fakt të cilin babai i saj nuk e kishte zbuluar dhe nuk e besonte. Nisi një periudhë dhune ndaj Rayan nga familja e saj, ku babai i shtyrë nga nëna filloi të godiste vajzën e tij. Rayan dhe miqtë e saj bënë kallëzim në polici në shtator të vitit 2024. Babai e godiste sepse sipas shoqërisë së saj, babai dhe nëna pretendonin se ajo dilte shumë dhe donte një djalë të varfër, por familja donte që ajo të punonte dhe t’u jepte para atyre. Nëna donte që Rayan të lidhej me një person të pasur që t’u siguronte të ardhura gjithë familjes.

Pas kësaj situate dhune, Rayan fillimisht e ka ndaluar babanë që të afrohet me të, por pas disa ditësh ai i ka kërkuar falje. Meqenëse e donte babanë e saj, ajo e fali atë. Por nga ky moment nëna bllokoi çdo lëvizje të Rayan duke i marrë pasaportën. 24-vjeçarja nuk mbante asnjë dokument me vete sepse ia kishte marrë nëna, po ashtu edhe paratë. E vetmja gjë që Rayan mbante me vete ishte celulari i saj dhe një foto e dy fëmijëve të saj. Këtë foto Rayan e mbante pranë saj gjithmonë kudo që ishte me shpresën se një ditë do bashkohej me dy fëmijët e saj.

Kohët e fundit Rayan po kërcënonte nënën e saj se do të shkonte në polici nëse nuk do t’i jepte pasaportën dhe do t’i tregonte të atit gjithçka ajo kishte bërë. Miqtë e Rayan thonë se babai i Rayan kishte frikë nga nëna e saj Rania Matar dhe ajo kishte kontroll mbi të. Nëna nuk ia jepte pasaportën sepse Rayan mund të largohej. E mbajti peng vajzën e saj deri sa thuri edhe planin për eleminimin e saj. Shoqëria e Rayan në Gjermani thonë se ajo u vra me kërkesë të nënës së saj, Rania Matar, për t’i mbyllur gojën për veprimet imorale të saj. Rania Matar bindi bashkëshortin e saj se ekzistonte një video ku Rayan ishte në momente intime dhe se personat që e kishin bërë videon kishin shantazhuar nënën e Rayan. Gjithçka ishte e stisur nga nëna deri sa bindi Fadi Alwan që të vrisnin vajzën e tyre.

Rayan donte lirinë si çdo vajzë tjetër dhe jetonte vetëm në një strehë refugjatësh. Ajo nuk iu bind urdhrave të nënës së saj, prandaj ajo e bindi atë që ta largonte dhe të shkonte në kampin në Liban. Sipas ligjit libanez, ushtria libaneze nuk mund të hyjë në kampet e refugjatëve palestinezë, duke e lejuar atë të jetojnë paqësisht atje pa asnjë problem.

Dhe Rayan besoi se do ta dërgonin në Liban për të parë fëmijët e saj, por ata kishin një plan tjetër, ta hiqnin qafe. Rayan donte vetëm të kthehej në Liban dhe te fëmijët e saj.

“Ajo nuk donte të qëndronte këtu; ajo nuk mund të përshtatej për të qenë larg fëmijëve të saj, nuk mund të jetonte këtu dhe nuk dinte gjuhën.”, shprehen miqtë e Rayan në Gjermani.

Pasaportën të cilën ia mbante peng dhe letra false kosovare nëna ia dha babait të Rayan dhe i thanë asaj që do shkonin tranzit nga Shqipëria për të shkuar në Liban. Ryan ka një pasaportë greke, por nuk mund të udhëtojë nga Gjermania sepse nuk ka leje qëndrimi gjermane, por vetëm status azili.

Ndërkohë që Shqipërinë nëna dhe i ati e kishin planifikuar si vendin ku do të kryhej vrasja e vajzës së tyre. Pyetja që bëjmë të gjithë është pse vendosën ta eleminonin vajzën e tyre në Shqipëri.

Miqtë e Rayan dyshojnë se nëna e saj nëpërmjet punëve të pista në Gjermani mund të ketë krijuar njohje me shtetas nga Shqipëria apo Kosova, të cilët mund t’i kenë sugjeruar vendin tonë si vendin perfekt për të kryer një krim dhe për t’i shpëtuar. Një detaj ishin edhe dokumentet false kosovare që kishin me vete Fadi Alwan dhe Rayan që sipas shoqërisë së 24-vjeçares i kishte siguruar nëna, Rania Matar.

Rayan i besoi prindërve të saj dhe u nis me babanë me shpresën që do të shkonte në Liban te fëmijët e saj. Kontakti i saj i fundit ishte i dashuri i saj libanez në Gjermani me të cilin komunikoi për herë të fundit teksa ishte në aeroport.

Më datë 19 shkurt i dashuri i shkruan në whats app Rayan se ishte shumë i shqetësuar për të pasi një ditë më parë ajo nuk i ishte përgjigjur. Rayan i thotë se është në aeroport dhe se po ikën në Liban. Ajo i thotë se një ditë më parë nuk mund t’i shkruante sepse nëna e saj donte që ajo të largohej dhe ajo nuk mund të flasë me të më. I thotë të ketë kujdes. Ky ishte komunikimi i fundit i Rayan dhe që aty ajo humbi çdo gjurmë me shoqërinë e saj. Që prej datës 19 shkurt deri më datë 29 mars shoqëria e saj nuk dinte asgjë për Rayan.

Nëna dhe babai kishin planifikuar gjithçka me detaje për të kryer krimin makabër të vrasjes së vajzës së tyre. Babai pas krimit u largua nga Shqipëria dhe përfundoi në Liban, ndërsa nëna vijoi zbatimin e planit për të fshehur të vërtetën. Ajo fiku numrin e saj dhe mbylli çdo kontakt pasi doli lajmi në mediat shqiptare se vajza e saj është vrarë në Shqipëri dhe policia shqiptare kontaktoi atë gjermane dhe lajmëruan nënën. Që aty ajo u zhduk, përveç kësaj vijoi deri në fund planin djallëzor duke përhapur lajmin në Liban se vajza e saj kishte vdekur në një aksident në Gjermani më datë 29 mars është publikuar në mediat libaneze.

Lajmi njofton ndarjen nga jeta të së resë, Rayan Fadi Alwan, si pasojë e një aksidenti në Gjermani. Aty thuhet se ajo do të varroset në Liban. Lajmi gjithashtu përmend se një tubim ngushëllimi për gratë do të mbahet në kampin Nahr al-Bared të shtunën, më 29 mars 2025.

E gjitha kjo e stisur nga nëna e Rayan. Miqtë e Rayan filluan të kërkojnë në faqet e internetit derisa gjetën raportin e policisë shqiptare për ngjarjen.

Fakti që nëna dhe familja e Rayan nuk tërheqin trupin e saj për ta varrosur vërtetojnë se krimi u krye në bashkëpunim nga nëna dhe babai.

“Ajo po ia fsheh krimin të gjithëve, por ne kemi zbuluar të vërtetën. Thjesht duam që të gjithë ta dinë se nëna dhe babai i saj ishin ata që e vranë. Ne duam vetëm trupin e saj që ta varrosim ne.”, shprehen shoqëria e Rayan në Gjermani.

Kjo është historia tronditëse me fundin makabër e 24-vjeçares palestineze, e cila u vra nga dy prindërit e saj, duke lënë pas dy fëmijë 7 dhe 3 vjeç.

Autoritetet spanjolle kanë shkatërruar një grup kriminal shqiptar që kultivonte dhe shpërndante marijuanë në Katalonjë.

Hetimi nisi vitin e kaluar kur policia katalanase zbuloi një plantacion në një magazinë industriale në Cervera, e më pas një tjetër në Manlleu.

Gjatë operacioneve policore u arrestuan 10 persona dhe u sekuestruan 844 bimë marihuanë, 75 kg sytha gati për treg, 25 gramë kokainë dhe 10,900 euro para të gatshme. Vlera e drogës së kapur llogaritet rreth 482,500 euro.

Gjithashtu, grupi kishte manipuluar instalimet elektrike për të shmangur faturimin.

Pas paraqitjes në gjykatë, të gjithë të arrestuarit u urdhëruan të mbahen në burg, për shkak të provave të shumta dhe rrezikshmërisë së tyre.

Të paktën një herë në jetë të gjithë mund të kemi përjetuar ndjesinë e mpirjes së duarve. Mpirja e duarve është një ndjesi e çuditshme që mund të ndodhë në duar, gishta, ose ndonjëherë në gishta dhe krah, e cila shpesh përshkruhet si një ndjesi ‘nxehtësie’ ose ‘gjembash’, dhe mund të shoqërohet me humbje të ndjeshmërisë.

Kjo ndjesi shpesh mund të jetë e përkohshme, por në disa raste mund të jetë një shenjë e një problemi të shëndetit. Cilat janë disa nga shkaqet më të zakonshme që mund të shkaktojnë mpirjen e duarve? Nëse mpirja është përkohshme dhe kalon shpejt ajo mund të mos jetë shqetësuese, por nëse ajo përsëritet apo zgjat shumë mund të jetë sinjal i një problemi shëndetësor.

Pikërisht në lidhje me këtë temë, çfarë ‘fshihet’ pas mpirjes së duarve, flasim me specialistin e bimëve mjekësore Ylli Merja në “Rreze Dielli” në Report TV, i cili na tregon shkaqet që sjellin mpirje të duarve dhe disa trajtime natyrale.

Mpirja e duarve mund të ketë disa shkaktarë, thekson Merja, mund të vijë nga çervikalja, mund të vijë nga artriti apo nga borsiti. Por më së shumti shkaktari kryesor i mpirjes së duarve vjen nga ngushtimi i tunelit karpal.

“Kockat karpale të kyçit të dorës janë 8 kocka si gjysëm hëne që formojnë një tunel të ngushtë dhe të mbyllur, nëpër të cilin kalon nervi median dhe tendinat e lëvizjes së gishtave. Nëse ky tunel ngushtohet, shkakton dhimbje dhe mpirje në gishta dhe kyçin e dorës. Po kështu kockat karpale kanë përsipër dhe një ligament të trashë, kur tendina inflamohet shtyp nervat dhe për pasojë krijohet mpirja e duarve”, sqaron Ylli Merja.
Shkaktarët që ndikojnë në sindromën e tunelit karpal janë: përdorimi i shpeshtë i dorës dhe kyçit në punë fizike, tastiera e kompjuterit, instrumentet muzikore, etj. Një shkak tjetër janë lëndimet ose fraktura në kyçin e dorës, artriti reumatoid ose depozitime të kriprave në kyçin e dorës, retencioni i lëngjeve që zakonisht ndodh në shtatzëni ose në prani të sëmundjeve hormonale si hipertiroidizmi. Gjithashtu diabeti mund të dëmtojë nervat, por një tjetër faktor është dhe gjenetika, pasi disa persona kanë tunel karpal më të ngushtë në mënyrë natyrale.

“Simptomat tipike të ngushtimit të tunelit karpal janë mpirje ose ndjesi shpimi në gishta, dobësi në dorë veçanërisht e vështirë për të mbajtur peshë, dhimbje që përkeqësohen gjatë natës, vështirësi në lëvizjen e gishtave, por në disa raste dhe enjtje të dorës dhe kyçit të dorës” nënvizon Merja.

Mpirja e duarve nëse është e përsëritur, nuk duhet të neglizhohet ndaj duhet të bëhen ekzaminimet e nevojshme mjekësore.

“Nëse nga ekzaminimet përcaktohet sindroma e tunelit karpal, hapi i parë që çdo pacient duhet të ndjekë janë disa ushtrime tepër të thjeshta”, tregon biofarmacisti Merja.

Ushtrimet për Tunelin Karpal:

– Lutja, vendosim duart para gjoksit, bërrylat rrinë drejt me pëllëmbët, zbrit duart poshtë barkut. Mbajini për 20-30 sekonda dhe përsëriteni 3 herë.

– Përkulja ose shtrirja e kyçit të dorës, shtrini krahun me pëllëmbën poshtë dhe kapni gishtat e dorës tjetër për t’i tërhequr ngadalë nga vetja. Mbajeni për 15-20 sekonda dhe përsëriteni 3-4 herë.

– Ushtrimi i grushtit dhe hapjes së dorës, përsëritet 8-10 herë nga 15-20 sekonda.

– Ushtrimi i rrëshqitjes së nervit median, mbani krahun para me pëllëmbën për nga vetja. Bëjeni dorën grusht, hape dorën, zgjat gishtat pas, përkule dorën dhe rrotulloni dorën, në fund ngrijeni dorën lart drejt tavanit.

– Ushtrimi i rrotullimit të kyçit të dorës, bëni rrotullime të ngadalta të kyçit në drejtim të akrepave të orës dhe pastaj në anën tjetër. Bëni nga 10 rrotullime.

Por përveç ushtrimeve duhet të ndihmojmë organizmin dhe me disa çajra apo bimë, duke qenë se mund të kemi depozitime të kripërave. Pak shafran indie ose xhinxhër na largon inflamacionin në trup, ndërsa për një qarkullim të mirë të gjakut mund të konsumohet nga një luge supe në ditë boronica ose aronia. Gjithashtu uthulla e mollës nuk duhet të ndahet nga përditshmëria jonë, 1-2 lugë gjelle çdo ditë në gjellë apo sallatë.

“Lagni me uthull molle të tretur në pak ujë me kripë një napë dhe mbështillni kyçin e dorës. Lëreni 10-15 minuta, pasi hiqni garzën lyeni kyçet me vajin ose kremin Reumer, këtë veprim përsëriteni 2 herë në ditë. Gjithashtu pini 3 herë në ditë nga 1 gotë çaj kolestomer ose çaj reumer”, këshillon specialisti i bimëve mjekësore Ylli Merja, pa harruar të bëhen çdo ditë ushtrimet e rekomanduara.

Aksident zinxhir në autostradën Lushnjë-Vlorë, 7 makina të përplasura.

Si pasojë, kalimi i mjeteve është bërë i pamundur.

Policia ndodhet në vendin e ngjarjes dhe po dokumenton rrethanat e aksidentit.

Pritet që blutë të dalin me një informacion paraprak të ngjarjes.

Një ngjarje e dhimbshme është shënuar këtë pasdite në fshatin Rrenxë të Dibrës, ku një 31-vjeçar ka humbur jetën në rrethana tragjike, raporton noa.al.

Sipas informacioneve paraprake, shtetasi A. S., rreth 31 vjeç, ishte duke shtruar një linjë interneti kur dyshohet se ka rënë në kontakt me rrymën elektrike, duke humbur jetën në vend.

Grupi hetimor ndodhet në vendngjarje nën drejtimin e Prokurorisë, për të sqaruar plotësisht rrethanat e kësaj ngjarjeje që tronditi komunitetin lokal.

Hetimet vazhdojnë për të kuptuar nëse janë respektuar kushtet e sigurisë në punë. /noa.al

Kapen me 63 kg drogë në kufi me Greqinë – Në pranga çifti nga Fieri

Kakavijë – Operacioni policor i koduar “Modifikimi” ka çuar në pranga dy shtetas nga Fieri, Osman Kamberaj dhe Enkeleda Xhemali, të cilët tentuan të trafikojnë një sasi të madhe droge drejt Greqisë, përmes Pikës Kufitare Kakavijë.

Policia Kufitare, pas kontrolleve të shtuara dhe inteligjencës policore, arriti të parandalojë trafikun e 63.2 kilogramëve Cannabis Sativa, të ndara në 60 pako, të cilat ishin fshehur në mënyrë profesionale në parafangot dhe shasinë e automjetit me të cilin udhëtonin të dy personat.

Në pranga ka rënë drejtuesi i automjetit, O. K., 44 vjeç, dhe pasagjerja E. Xh., 45 vjeçe, të dy banues në Fier. Gjatë kontrollit fizik, atyre iu gjetën edhe 1890 euro, ndërsa si provë materiale u sekuestruan lënda narkotike, automjeti dhe tre celularë.

Operacioni u krye në bashkëpunim mes DVP Gjirokastër, DVP Fier dhe Prokurorisë së Gjirokastrës. Hetimet vijojnë për të identifikuar persona të tjerë të përfshirë në rrjetin kriminal, raporton noa.al.

Të arrestuarit do të përballen me akuzën për “Trafikim të lëndëve narkotike”, kryer në bashkëpunim, ndërsa materialet procedurale i janë referuar Prokurorisë pranë Gjykatës së Juridiksionit të Përgjithshëm Gjirokastër. /noa.al

Dyfishohen sëmundjet alergjike në Shqipëri.

Sipas mjekëve alergologë, jo vetëm luhatjet e temperaturave në vend duke përjetuar ditë të ngrohta dhe të ftohta brenda të njëjtit muaj, për shkak të ngrohjes globale, por edhe faktorë të tjerë ambientalë si ndotja e ajrit, kanë bërë që në vend të rritet numri i pacientëv eme probleme alergjike.

“Në përditshmërinë tonë është dyfishuar numri i pacientëve që vijnë me probleme alergjike në të gjitha grupmoshat. Në përgjithësi janë sëmundje kronike, një pjesë e mirë e tyre”, shprehet alergologia Eris Mësonjësi.

Ajo që shihet me shqetësim nga mjekët është zgjatja e sëmundjeve alergjike në kohë si dhe prekja nga më shumë se një alergen duke e bërë të vështirë edhe trajtimin për pacientët.

“Ekspozimi i mëtejshëm apo më i zgjatur i fëmijëve në ambiente të mbyllura, ekspozimi më i zgjatur me mace, me qenin me alergenin e tyre i bën më të ndjeshëm. Ndotja ambientale që i bën polenet më agresive alergjitë stinore. Dhe pjesa e ngrohjes deri diku. Kemi shpërthimin e disa poleneve njëkohësisht dhe bëjnë sëmundjen më agresive dhe të vështirë për ne për të diferencuar nëse është shkaktar poleni i barit apo pemës tek ky pacient”, thotë Mësonjësi.

Bluzat e bardha thonë se ka një shtrirje të moshës së pacientëve që prej fëmijëve dhe deri tek të moshuarit. Një alergji e patrajtuar rrezikon kalimin në një asmë bronkiale.

“Alergjitë respiratore mbartin gjithmonë riskun për të bërë problemin e astmës bronkiale”, thekson alergologia.

Për këtë rasye mjekët rekomandojnë kontaktin me alergologun për sëmundjet alergjike.

Rreth orës 12:40, në Levan, shtetasi F. M., rreth 68 vjeç, duke lëvizur, dyshohet se aksidentalisht është goditur nga shkalla e fundit e trenit të mallrave Fier-Vlorë, i cili ndodhet në spital, në kujdesin e mjekëve.

Grupi hetimor po punon për zbardhjen e rrethanave të ngjarjes.