Category: Lajme

Paga mesatare në sektorin financiar, në fund të viti 2024 arriti në 163 mijë lekë. E ndjekur nga sektori informacion/ komunikacion ku paga mesatare arriti në 121 mijë lekë në muaj bruto.

E thënë ndryshe paga në banka, kompanitë e sigurimit apo institucione të tjera financiare është sa dyfishi i pagës mesatare.

Të dy këta sektorë po udhëheqin rritjen e pagave në tregun e punës, duke u bërë që të jenë të vetmit që ofrojnë të ardhura për një jetesë dinjitoze.

Për ekspertët dy janë arsyet pse këto sektor ofrojë pagesa të tilla

“Së pari lidhet me aktivitetin e sektorëve. Bankat, kompanitë e sigurimeve, ekspertët e IT kanë qenë dhe vijojnë të jenë profesione të mirëpaguara. Sektorët e kanë marzhin e fitimit më të lartë se të tjerët. Ndërkohë faktori i dytë lidhet me modelet e menaxheriale. Menaxherët e kompanive të tilla janë të huaja të cilat adaptojnë dhe zbatojë modele si në vendet evropiane”, thotë Erion Muça, ekspert punësimi.

Sektori i tretë që po ofron paga konkurruese është administrata publike. Sipas statistikave paga mesatare arriti 100 mijë lekë në muaj bruto. Ndërkohë privati mbetet ende me ritme të ngadalta të rritjes së pagave.

“Shohim që edhe në fund të viti që lamë, privat nuk po i përgjigjet me të njëjtin ritëm rritjes pagave si administrata publike. Me këtë ecuri pagat në shtet po bëhen gjithnjë e më konkurruese duke u krahasuar edhe me vendet përreth”, shton eksperti.

Në fund të vitit 2024, paga mesatare bruto në privat 76 mijë lekë në muaj. Por kjo shifër merret me rezerva për shkak të informalitetit në tregun e punës.

Akuzë e re për kryebashkiakun e Tiranës Erion Veliaj?

Gazetarja Klodiana Lala ka zbardhur detaje nga marrja në pyetje e kryebashkiakut të arrestuar të Tiranës Erion Veliaj nga prokurorët e SPAK.

Veliaj u paraqit paraditen e kësaj të enjte në Prokurorinë e Posaçme ku u mor në pyetje për rreth një orë e gjysëm dhe më pas u nis sërish drejt qelisë së paraburgimit të Durrësit.

Veliaj është marrë në pyetje si i pandehur në lidhje me akuzat që rëndojnë ndaj tij, ndërkohë që gazetarja Lala thotë që ndaj kryebashkiakut është ngritur një akuzë e re.

Sipas Lalës dyshohet se Veliaj ka futur sende të ndaluara në qëlinë e paraburgimit të Durrësit. Veliaj është marrë në pyetje në prani të avokatëve të tij.

Një përplasje e ashpër duket se ka nisur mes Edi Ramës dhe Erion Veliajt, për drejtimin e Bashkisë së Tiranës, pasi kryebashkiaku ndodhet në qeli që prej 10 Shkurtit.

Ashtu siç u raportua më herët, përmes një shkrese që mbante datën 18 Mars, Erion Veliaj, kishte firmosur nga qelia e paraburgimit të Durrësit vendimin për largimin nga detyra e kryebashkiakes në detyrë të të besuarës së Ramës, Anuela Ristanit dhe emërimin në vend të saj të të besuarës së tij, Sara Goxhaj.

Veliaj kundër Ramës, firmos shkarkimin e Anuela Ristanit/ Përplasje e fortë në Bashkinë e Tiranës
Kjo e fundit, ka qenë më parë shefe kabineti e kryetarit të Bashkisë së Tiranës, Erion Veliaj, përpara se të emërohej në detyrën e nënkryetares së Bashkisë.

Por, Edi Rama, pasi u vu në dijeni të kësaj shkrese, mbrëmjen e djeshme ka shkuar vetë në Bashkinë e Tiranës dhe i ka kërkuar Anuela Ristanit, që të mos e zbatojë vendimin e Veliajt, si dhe ka urdhëruar Protokollin që të mos protokollojë urdhrin e nxjerrë nga Veliaj, për marrjen e detyrave të kryetarit të Bashkisë nga Sara Goxhaj.

Jo vetëm kaq, por Edi Rama i ka kërkuar Anuela Ristanit, që të firmosë dhe shkarkimin e Alban Dokushit nga posti i Sekretarit të Përgjithshëm të Bashkisë dhe në vend të saj të emëronte Jonida Halilin.

Por, mediat raportojnë se Veliaj nga burgu ka urdhëruar Policinë Bashkiake, që të mos i lejojë Halilit hyrjen në godinën e Bashkisë.

Puna në këtë institucion është paralizuar, me punonjësit që nuk dinë cilat urdhra të zbatojnë, ato të kryebashkiakut nga burgu apo të kryeministrit.

Pas aksidentit të rëndë që ndodhi në Fushë-Prezë, ku humbën jetën katër të rinj, autoritetet kanë arrestuar shoferin e betonieres, Aleksandër Krrashi. Ai akuzohet për “shkelje të rregullave të qarkullimit rrugor”, “drejtim të mjetit në mënyrë të parregullt pa leje drejtimi” dhe “largim nga vendi i aksidentit”.

Gjithashtu, policia ka shoqëruar në komisariat menaxherin e firmës “Hel Jon” shpk, Danjel Qemal Koxha, i cili po hetohet për disa vepra penale, përfshirë “shkelje të rregullave të qarkullimit rrugor”, “shkelje të rregullave në punë”, “punësim të paligjshëm” dhe “fshehje të ardhurave dhe tatimeve”.

Ndërkohë, bëhet me dije se është shpallur në kërkim administratori i firmës “Hel Jon” shpk, Saimir Rruzhdi Hoxha. Ai po kërkohet për të njëjtat akuza, duke përfshirë “shkelje të rregullave të qarkullimit rrugor”, “shkelje të rregullave në punë”, “punësim të paligjshëm” dhe “fshehje të ardhurave dhe tatimeve”.

Hetimet po vijojnë për të zbardhur përgjegjësinë ligjore të të gjithë personave të përfshirë në këtë ngjarje tragjike, e cila ka tronditur mbarë opinionin publik.

Më 20 vite burg është dënuar 23-vjeçar Mikea Zeka, i cili vrau me armë zjarri bashkëkombësin shqiptar, Kasem Kasmi, duke e qëlluar me dy plumba në zemër dhe mushkri dhe la të plagosur tre të tjerë që ishin me viktimën.

Prokuroria kishte kërkuar të dënohej me 30 vjet burg, (20 për vrasjen me dashje, 3 vjet për secilën nga tre tentativat për vrasje plus 1 vit tjetër për mbajtjen pa leje).

Dënimi iu zbrit me një të tretën e reduktimit të lejuar nga gjykimi i shkurtuar, në 20 vjet. Dhe, nëse i pandehuri nuk apelon, ai mund të marrë një ulje të mëtejshme prej 1/6.

Zaka akuzohej se kishte qëlluar të paktën gjashtë të shtëna nga pistoleta e kalibrit 7.65 që mbante në mënyrë të paligjshme në drejtim të Kasmit, i cili vdiq, ndërsa tre të tjerët, vëllai i viktimës, Ervin Kasmi dhe vëllezërit Klevin dhe Alvider Hidraliu, u plagosën rëndë.

NGJARJA

Ngjarja ka ndodhur në mars të vitit 2024. Mikea Zaka ka qenë në Shake Bar me disa miq kur është arritur nga grupi i viktimës, Kasem Kasmi. 27-vjeçari kishte parkuar dysh makinën dhe ishte nisur drejt tavolinës së djalit me tre persona të tjerë.

Ata filluan të debatonin dhe në një pjesë të sekondës Zaka nxori armën, duke gjuajtur drejt tyre dhe duke lënë të vrarë Kasem Kasmin.

Menjëherë pas vrasjes, grupi u largua, por u ndalua nga oficerët e Policisë së Frosinone.

Mikea Zaka më vonë u dorëzua. Ai tha se kishte qëlluar për vetëmbrojtje dhe se në të kaluarën kishte patur konflikte me Kasemin sepse kishte filluar të dilte me ish-in e viktimës.

Një stallë në fshatin Ravonik të Korçës u përfshi nga flakët mëngjesin e sotëm, rreth orës 07:50. Stalla, e cila është në pronësi të shtetasit V. F., u dëmtua rëndë, ndërsa dyshohet se zjarri ka nisur si pasojë e një shkëndije elektrike.

Flakët përfshinë shpejt ambientin, duke shkaktuar dëme të konsiderueshme. Për fat të keq, rreth 25 derra u dogjën, ndërsa një sasi e madhe ushqimi për ta u shkatërrua plotësisht.

Shërbimet zjarrfikëse mbërritën në vendngjarje dhe bënë të mundur shuarjen e zjarrit.

Ndërkohë, autoritetet po vijojnë hetimet për të sqaruar rrethanat e ngjarjes dhe për të konfirmuar shkakun e zjarrit.

Apeli i Gjykatës së Posaçme, ka vendosur të lërë në burg Safet Bajrin, Behar Bajrin dhe Astmer Bilalin. Të tre janë arrestuar në lidhje me përfshirjen e dyshuar të tyre në vrasjen e Fatbardh Licit, ngjarje e ndodhur në vitin 2018.

Sipas Prokurorisë së Posaçme (SPAK), vrasja e Fatbardh Licit, u krye në kushte të grupit të strukturuar kriminal, me dyshimin se Ibrahim Lici, i afërmi i tij, ishte përgjegjës për vrasjen e ish-policit Boran Bërçana më 15 korrik 2018.

Më 10 gusht 2018, Fatbardh Lici, u ekzekutua me breshëri automatiku, ndërsa ndodhej në një lokal në lagjen Kiras të Shkodrës.

Një person zbriti nga një automjet tip “Benz” pa targa dhe e qëlloi atë, duke e lënë të vdekur.

Një 60-vjeçar është gjetur i shtrirë në rrugë me dëmtime në kokë, në fshatin Balldre.

Rreth orës 12:00, banorët e zonës konstatuan shtetasin S. S., i cili dyshohet se është rrëzuar aksidentalisht ndërsa kulloste bagëtitë.

Ai u transportua menjëherë në spital dhe ndodhet nën kujdesin e mjekëve.

Grupi hetimor po punon për sqarimin e plotë të rrethanave të ngjarjes.

Është publikuar fotoja e Andi Laçit, 22 vjeç i cili mbeti viktimë e aksidentit fatal në Fushë-Prezë.

4 të rinjtë, Enejd Laçi, Erild Laçi (vëllezër), Enrikejd Kurti dhe Andi Laçi u dogjën brenda automjetit tip “Benz” pasi makina e tyre shpërtheu në flakë pas aksidentit.

Automjeti u përplas me një betoniere në fshatin Fushë-Prezë rreth orës 23:50 dhe si pasojë humbën jetën 4 të rinj.

Makina tip “Benz” me të cilën udhëtonin të rinjtë drejtohej nga 25-vjeçari Enejd Laçi. Pas përplasjes me një betoniere, “Benzi” shpërtheu në flakë dhe të rinjtë u dogjën brenda mjetit.

Në vendin e ngjarjes kanë mbërritur edhe zjarrfikës nga Kamza, por nuk është shmangur dot ngjarja fatale.

Shoferi i betonieres, 24 vjeç, Aleksandër Krrashi fillimisht u largua nga vendi i ngjarjes, por më pas blutë informojnë se e kapën dhe e shoqëruan në Komisariat.

Kryebashkiakut Erion Veliaj iu është shtuar një akuzë e re nga Prokuroria e Posaçme Antikorrupsion.

Gazetarja Klodiana Lala raporton se Erion Veliajt iu është komunikuar nga prokurorët e posaçme akuza për futjen e sendeve të ndaluara në qelitë e paraburgimit.

Kryebashiaku i Tiranës akuzohet edhe për veprat penale pastrim parash dhe korrupsion.

Erion Veliaj ka dalë përkohësisht nga paraburgimi i Durrësit ditën e sotme (20 Mars) dhe është dërguar në Prokurorinë e Posaçme ku mësohet se ka dhënë shpjegime për hetimet ndaj tij.

Seanca e marrjes në pyetje e kryebashkiakut Veliaj, në cilësinë e personit nën hetim, ka zgjatur rreth 1 orë e 30 minuta dhe më pas është dërguar sërish drejt Durrësit.

Marrja në pyetje e Erion Veliaj, i cili ndodhet në burg prej 10 Shkurtit, është bërë në prani të avokatëve të tij Ermir Beta dhe Artur Selmani.

Shkarkimi i kryetares së komanduar

Erion Veliaj, me një shkresë të firmosur më datën 18 Mars, ka shkarkuar Anuela Ristanin nga funksioni i kryetares në detyrë të Bashkisë Tiranë.

Erion Veliaj, në cilësinë e kryebashkiakut të Tiranës, ia ka deleguar këtë detyrë nënkryetares Sara Goxhaj.

“URDHËROJ: Znj. Sara Goxhaj, Nën/Kryetar i Bashkisë Tiranë, të kryej përkohësisht edhe detyrat e Kryetarit të Bashkisë Tiranë”, shkruhet në dokument.

“Periudha e ushtrimit të kompetencave të deleguara, fillon më datë 19.03.2025, deri në një urdhër të dytë”, shprehet Veliaj.

Postin e kryebashkiakut në detyrë të Tiranës e mbante nënkryetarja Anuela Ristani, të cilës Erion Veliaj i delegoi firmën pas arrestimit të tij më 10 Shkurt.

Vendimi u mor në prani të kryeministrit Edi Rama dhe kreut të Këshillit Bashkiak, pasditen e 11 shkurtit.

SHKRESA

“DELEGIMIT E DETYRAVE TË KRYETARIT” BASHKIA TIRANË”

Në mbështetje të nenit 8 pika 2, neni 59 pika “I”, pika “3” të ligjit 139/2015 “Për vetëqeverisjen vendore”, të ndryshuar, të neneve 22, 28 dhe 29 të ligjit nr. 44/2015 “Kodi i Procedurave Administrative të Republikës së Shqipërisë”, Rregullores me nr. 46111 datë 29.12.2022 për “Miratimin, Organizimin, Funksionimin, Detyrat dhe Përgjegjësitë e Strukturave të Institucionit të Bashkisë Tiranë”,

URDHËROJ:

Znj. Sara Goxhaj, Nën/Kryetar i Bashkisë Tiranë, të kryej përkohësisht edhe detyrat e Kryetarit të Bashkisë Tiranë.
Periudha e ushtrimit të kompetencave të deleguara, fillon më datë 19.03.2025, deri në një urdhër të dytë.
Urdhri nr. 366, datë 14.02.2025 “Për delegimin e përkohshëm të detyrave të kryetarit të Bashkisë Tiranë”, shfuqizohet.
Ngarkohet Sekretari i Përgjithshëm, Kabineti i Kryetarit, Drejtoria e Përgjithshme e Administrimit të Brendshëm, Drejtoria e Përgjithshme e Medias dhe Komunikimit me Qytetarët, për zbatimin e këtij urdhri.
Ky urdhër hyn në fuqi menjëherë dhe njoftohet në stendën e afishimeve publike të Bashkisë Tiranë.

KRYETARI Erion Veliaj