Category: Lajme

Reshjet e dendura të shiut kanë përfshirë këtë të premte gjithë vendin tonë, teksa stuhia e fortë e shoqëruar me erë të fuqishme ka shkaktuar probleme në qytete e rrugë nacionale.

Rruga e Arbrit ishte thuajse e pakalueshme për dy orë për shkak të vërshimit të ujit dhe dherave me drejtuesit e mjeteve që janë përballur me bllokime në shumë pika të kësaj rruge.

Për shkak të mungesës së kanaleve kulluese anësore i gjithë uji i shiut ka rënë në asfalt duke marrë me vete edhe dhera e gurë.

Ndërkohë uji është futur edhe brenda tuneleve në fshatin Shkallë. Po ashtu uji ka përmbytur urën e fshatit Fshat për shkak të mosfunksionit të sistemit kullues mbi urë dhe kanaleve që vijnë nga tunelet 2 dhe 3 në anën e fshatit Shkallë.

Drejtuesve të mjeteve që do të përdorin këtë aks rrugor në orët në vijim iu këshillohet të tregojnë kujdes pasi reshjet parashikohet të vazhdojnë. Policia Rrugore do të jetë në monitorim të trafikut në këtë aks rrugor për të këshilluar drejtuesit e mjeteve në lidhje me rreziqet që mund të përballen gjatë udhëtimit në drejtim të Tiranës e anasjelltas.

Ndërkohë, rënie gurësh ka patur edhe në aksin tjetër nacional nga Burreli në Skuraj.

Stuhia “Ciaran” që ka përfshirë edhe vendin tonë ka qenë dhe shkak i aksidenteve nëpër rrugët e Shqipërisë.

Një aksident me vdekje ka ndodhur në aksin Morin-Kukes, ndërsa një tjetër ka mbetur i plagosur rëndë.

Drejtuesi i mjetit është përplasur me murin anësor të aksit rrugor në rrugën e Kombit.

Viktima nga Kukësi. I plagosuri është nisur drejt Tiranës. Kushtet meterologjike dhe lagështira e madhe në rrugë mendohet të jetë shkaku i aksidentit.

‘Rreth orës 13:50, në autostradën Morinë-Milot, shtetasi E. M., duke drejtuar automjetin tip “Volkswagen”, ka humbur kontrollin dhe për pasojë automjeti është përplasur me bordurat në rrugë. Nga aksidenti ka humbur jetën drejtuesi i automjetit, shtetasi E. M., banues në Kukës, si dhe është dëmtuar pasagjeri, shtetasi S. H., banues në Kukës, i cili është dërguar për mjekim në Spitalin e Traumës, Tiranë. Grupi hetimor po punon për përcaktimin e shkaqeve të aksidentit.’- njofton policia.

Stuhia “Ciaran” që ditët e fundit goditi disa shtete, ditën e sotme ka përfshirë edhe Shqipërinë.

Në Tirana shiu i dendur dhe era e fortë shkaktoi probleme në disa zona, ndërsa më e prekura është ajo te “Pallati me Shigjeta’.

Përvesh problemeve me përmbytjen e rrugëve dhe disa bizneseve dhe godinave në katet e para, është shkëputur dhe një pjesë suvaje nga një pallat.

Si pasojë, janë dëmtuar 6 automjete të parkuara pranë.

Për fat të mirë nuk raportohet për njerëz të lënduar.

Prej disa orësh Shqipëria është “mbërthyer” nga moti i keq, ku për shkak të stuhive të forta të shiut dhe erës, i gjithë vendi duket i aralizuar.

Por meteorologët kanë lajme të këqija, pasi stuhia Cianar e cila goditi Europën perëndimore gjatë 24 orëve të fundit, tashmë po godet Ballkanin.

Sipas meteorologëve orët në vijim do të kenë mot të përkeqësuar, ku pritet stuhi shiu dhe erëra të forta.

Ndërkohë që orët në vijim do të sjellin dhe ulje me disa gradë të temperaturave sa i përket vlerave maksimale.

Pritet që moti i keq të vijojë deri të shtunën mbasdite, më pas do të kemi një normalizim.

Policia e Shtetit ka dal në gatishmëri pas shkak të motit të keq që ka prekur vendin.

Në një deklaratë për mediat, forcat e rendit bëjnë me dije se janë ngritur grupe pune ne çdo bashki për t’u ardhur në ndihmë drejtuesve të automjeteve.

Policia ka nxjerrë dhe disa nga rrugët interurbane, nga Tirana, Durrës e deri në Lezhë, ku nuk ka munguar dhe apeli për shoferët që të moderojnë shpejtësinë dhe të ruajnë distancën.

“Nisur nga situata e krijuar nga moti i keq, Policia e Shtetit ka kaluar në gatishmëri në të gjithë vendin, për t’iu ardhur në ndihmë drejtuesve të mjeteve dhe qytetarëve në rast nevoje për ndihmë, dhe për të menaxhuar trafikun rrugor.

Në DPPSH dhe në çdo Drejtori Vendore të Policisë, janë ngritur grupe drejtimi të cilat kanë kaluar në gatishmëri.

Policia e Shtetit apelon për drejtuesit e automjeteve që të moderojnë shpejtësinë dhe të ruajnë distancën e sigurisë, me mjetet e tjera në rrugë.

Zonat me risk më të lartë janë:

Lezhë, rrugët urbane dhe rrugët interurbane lidhëse;

Fushë Krujë, rrugët në zonën urbane dhe rrugët lidhëse interurbane;

Tiranë, rrugët urbane dhe ato interurbane;

Durrës. rrugët urbane dhe rrugët interurbane lidhëse me Tiranën dhe me pjesën tjetër jugore;

Elbasan, rrugët në zonën urbane dhe rrugët interurbane lidhëse.

Gjithashtu, Policia e Shtetit apelon për qytetarët që të mos qëndrojnë në vende të pasigurta, duke qenë se për shkak të reshjeve dhe erës, mund të rrëzohen pemë ose mund të bien sende të forta nga lartësitë.

Për çdo rast nevoje për ndihmë, drejtuesit e automjeteve dhe qytetarët të telefonojnë numrin pa pagesë 112”, thekson Policia e Shtetit.

Një aksident tragjik ka ndodhur pak minuta më parë në aksin rrugor Fier-Seman.

Një automjet ka humbur kontrollin dhe ka përfunduar në kanal.

Për pasojë ka humbur jetën një person.

Në vendngjarje ka shkuar policia, që po kryen ekspertizën për të zbardhur detajet dhe shkaqet e këtij aksidenti.

Jani Zoto u burgos në vitin 2014, kur bashkëjetuesja e tij rumune Aciu Flopjca-Aurica u gjet e masakruar në vaskën e shtëpisë së tyre në ishullin Kos të Greqisë.

Mirëpo vetëm pas 9 vitesh, është zbuluar se autor i krimit ka qenë fqinji i tyre, me origjinë nga Pakistani. Ngjarja e rëndë asokohe bëri shumë bujë në shtetin fqinj, teksa tashmë, Jani është shpallur i pafajshëm.

I ftuar në “Shqipëria LIVE”, Jani Zoto ka treguar gjithçka ka ndodhur atë ditë, duke treguar që nga momenti kur gjeti bashkëjetuesen e tij të masakruar, e deri në procesin ku ai u dënua padrejtësisht.

“Bashkëjetonim me shoqen time, punonim bashkë prej 2-3 vjetësh. Atë ditë, shkoj në shtëpi për ta marrë për në punë siç e kishim lënë. E gjej të masakruar. I tmerruar dhe i alarmuar hap derën për të lajmëruar policinë. Porta e shtëpisë ishte e mbyllur me çelës në fillim, kishim dhe një çelës rezervë. Unë kur shkova në punë nuk kisha nevojë për ta marrë çelësin. Ajo nga një vesh nuk dëgjonte mirë dhe kishte një sinjal që bënte gjithmonë zhurmë kur unë ngjisja shkallët. Kur hyra, sinjali ishte pas derës, plerat ishin po ashtu aty. Unë e gjeta me sy mbyllur në vaskë, e masakruar. E preka por ajo kishte vdekur. Të tillë vrasje nuk kam parë as në filma.

Fillimisht nuk kishte asnjë provë përveç dëshmisë së fqinjve. Policia e bëri dhe ekspertizën. Mua më mbajtën për 2-3 ditë, edhe pse u thosha jam i pafajshëm përfundova në paraburgim. Pas 25 ditësh vjen ekspertiza mjeko-ligjore por mua nuk më thanë gjë, përveç se në thonjtë e gishtave të saj ishte gjetur ADN e një personi tjetër. Pas një muaji e gjysmë kam bërë gjyqin e parë, por para kësaj, aty vinte një prokurore më dha ok që nuk isha unë fajtori. Në një vizitë që bënte në burg, unë i thashë që ju më dhatë ok pse jam akoma në burg. Ajo më tha ‘zoti Jani nuk është në dorën time të të nxjerr, por shoqja jote ka luftuar për jetën dhe është gjetur adn e dikujt tjetër’. Por në gjyq nuk u morr asgjë parasysh. Unë u dënova me burgim të përjetshëm plus 3 vjet e gjysmë dhe gjobë. Shenjat e gishtave të autorit ishin në pllakat e banjës, në trupin e viktimës dhe në një peshqir. Në një emision grek, që mua më ndihmoi për të dalë nga burgu, njerëzit e familjes, treguan se ajo kisthe marrë 500 goditje në trup.

Unë atë pakestinezin nuk e njoh. As bashkëjetuesja nuk e njihte, nuk e di as çfarë ka thënë për vrasjen. Di që jetonte në të njëjtin pallat me ne dhe pastaj ishte arratisur. Ai u arrestua pasi vodhi një dyqan elektrik në Gjermani dhe ai e ka prnauar vetë që e kishte vrarë, pa e pyetur njeri.”- tha ai.

Orët e fundit Tirana është përfshirë nga një stuhi e fortë me reshje të shumta

Prej më shumë se një ore një stuhi e fuqishme ka përfshirë kryeqytetin duke sjellë vështirësi në qarkullimin e mjeteve në rrugë dhe trafik shumë të rënduar.

Kryebashkiaku, Erion Veliaj u ka bërë apel qytetarëve që të minimizojnë lëvizjet pas stuhisë së shiut.

Përmes një postimi në Facebook, Veliaj siguron se ekipet e Bashkisë janë terren, ndërsa bën thirrje që për çdo emergjencë të telefonojnë në numrin 112.

“KUJDES – MOT I RËNDUAR. Orët e fundit Tirana është përfshirë nga një stuhi e fortë me reshje të shumta shiu, e ngjashme me stuhinë Ciara që ka goditur Firencen dhe Toskanën gjatë natës. Ju lutem tregoni kujdes në 24 orët në vijim dhe ulni lëvizjet e panevojshme gjersa situata të normalizohet! Ekipet tona janë aktualisht në terren për çdo emergjencë. Ndihmoni fqinjët e moshuar në rast nevoje. Mirënjohje për mirëkuptimin! Tel: 112 për emergjencat. Bashkë. Pa panik e me solidaritet”, shkruan Veliaj.

Edhe vendi ynë është goditur mesditën e sotme nga stuhia “Ciaran”, që më herët ka prekur Evropën Veriperëndimore dhe kryersisht Italinë, Francën dhe Belgjikën.

Departamenti amerikan i Shtetit ka vendosur në listën e sanksioneve Nexhat Krasniqin, ish-drejtorin e Departamentit të Prokurimit në Ministrinë e Tregtisë dhe Industrisë, për shkak të përfshirjes në korrupsion të madh.

Sipas njoftimit, atij do t’i ndalohet hyrja ë SHBA.

“Si zyrtar publik përgjegjës për mbikëqyrjen e kontratave të prokurimit, Krasniqi ka abuzuar me postin e tij publik duke pranuar ryshfet në këmbim të dhënies së kontratës për lejimin e ndërtimit të parkut industrial në komunën e Drenasit nga kompania Eltoni”, u tha në njoftim.

Sipas DASH-it, veprimet e sotme të SHBA-së dëshmojnë se Uashingtoni qëndron me ata në Kosovë që kërkojnë përgjegjësi nga zyrtarët e korruptuar publikë.

“Ky vendim riafrimon përkushtimin e SHBA-së për luftimin e korrupsionit që dëmton interesat publike, pengon prosperitetin ekonomik të shteteve dhe zvogëlon aftësitë e qeverive për t’iu përgjigjur në mënyrë efektive nevojave të shtetasve të tyre”.

Po ashtu, nën sanksione janë vendosur edhe fëmijët e Krasniqit, Aulona dhe Olti Krasniqi të cilëve po ashtu nuk do t’iu lejohet hyrja në SHBA.

Një aksident me vdekje ka ndodhur ditën e sotme në Kukës.

Sipas informacioneve paraprake, si pasojë e aksidentit është shënuar 1 viktimë dhe 1 person tjetër është në gjendje të rëndë për jetën.

Mësohet se kushtet meteorologjike dhe lagështia e madhe në rrugë janë bërë shkak për ngjarjen e rëndë.

Nga pamjet e siguruara nga Klan News, shihet se makina e përfshirë në aksident tip “Volkswagen Passat” ka pësuar dëme të konderueshme materiale.

Në vendin e ngjarjes ndodhen forca policore e po ashtu zjarrfikëse.

Detaje të tjera priten në vijim.