Kryeministri Edi Rama, duke iu përgjigjur qytetarëve në rubrikën e tij ‘Sy m’sy’ në Facebook, sqaroi disa akuza të opozitës lidhur me udhëtimet e tij jashtë vendit.
Rama tha se nëse do të kishte mundësi, do t’i “këpuste me thikë” udhëtimet, duke i minimizuar sa më shumë, por, sipas tij, ato janë të domosdoshme për detyrat e tij si kryeministër.
Ai theksoi se të gjitha udhëtimet e tij janë për arsye pune dhe se udhëton kryesisht në klasin ekonomik, përveç atyre udhëtimeve të gjata në Shtetet e Bashkuara.
“Udhëtimet, nëse do kisha mundësi t’i këpusja me thikë, do t’i minimizoja me qejf. Janë udhëtime pune, jo për kënaqësi. Më vjen zor kur njerëzit flasin për broçkulla, si ‘mori avionin privat’ apo ‘fluturime luksi’. Të gjitha fluturimet private që bëj me familjen janë në klasin ekonomik, si të gjithë të tjerët. Fluturimet për punë janë thjesht për të kursyer kohë. Fluturimet në SHBA, të gjitha janë të gjata dhe është normale që të udhëtohet në klasin biznes. Por për udhëtimet brenda Evropës, të gjitha janë në klasin ekonomik”, tha Rama.
Për më tepër, ai shpjegoi se marrëveshja për avionin me të cilin udhëton nuk i kushton asnjë lek më shumë shtetit sesa çfarë është shpenzuar në mesatare çdo vit nga kryeministrat. Sipas tij, deri kur nuk ishte në përdorim ky avion, politika e tij ka qenë që anëtarët e qeverisë të mos udhëtojnë me klasin ‘biznes’ për fluturimet brenda Evropës, përjashtuar udhëtimet e gjata, si ato në SHBA.
“Me marrëveshjen që kemi për atë avion, nuk shpenzojmë asnjë lekë më shumë për shtetin, sesa çfarë është shpenzuar në mesatare çdo vit nga kryeministrat. Deri kur nuk ishte avioni, rregulli në qeverinë time, ka qenë dhe mbetet, anëtarët e qeverisë, përfshirë edhe mua nuk udhëtojnë në biznes, përjashtuar udhëtimet në SHBA, që janë të gjata dhe është normale. Për çfarë flisni? Kë dëgjoni? Si mund të merreni me këto muhabete pa lidhje? Kur vjen puna te jeta e secilit, të jemi shumë të kujdesshëm”, tha Rama.
