Category: Lajme

Kryeministri Edi Rama, në podcastin e tij “Flasim”, ftoi 3 të rinj që mbajtën fjalime në Asamblenë e PS dhe Kuvendin Rinor ku një prej tyre u shpreh se ishin “petalet e trëndafilit të Partisë Socialiste”.

Kreu i qeverisë, gjatë fjalës së tij, u shpreh se njerëz pa tru dhe nga ana tjetër të informuar bashkohen në një pikë ku gjejnë njëri-tjetrin në fjalën që politika është diçka e pistë dhe nuk ia vlen.

Por Rama theksoi se pa politikën shoqëria do të gjendej në një situatë barbarie. Ai u shpreh se përsa kohë të rinjtë kanë tërheqje nga politika dhe ambicie për pushtet, ka ende shpresë.

“Njerëzit pa tru, njerëzit pa edukatë, pa kulturë e informacion nga njëra anë, nga ana tjetër njerëz të ditur, të mirë dhe të informuar, bashkohen shpesh në një pikë ku gjejnë njëri-tjetrin në fjalën që politika është diçka e pistë nuk ia vlen, s’duhet të merresh me politikë”, por harrojnë që pa politikën shoqëria gjendet në një situatë barbarie sepse politika e vërtet ka fuqinë të bëjë keq, ka bërë gjëra të tmerrshme, ka pjellë në formën e vet të prekshme nazizmin, fashizmin komunizmin, por ka bërë gjëra të mëdha si BE, SHBA, ka bërë të mundur të përparojnë të drejtat e njeriut, të drejtat e grave, të sistemet e mbrojtjes sociale, nuk do të ndodhnin pa politikën.

Sa kohë ka të rinj që e ndjejnë dhe kuptojnë këtë, kanë tërheqjen ndaj politikës, ka edhe plot që kanë tërheqjen e pushtetit, nxitjen e ambicies për të qenë dikushi, por kanë edhe interesin që nëpërmjet politikës mund të marrësh diçka të shpejtë, në të gjitha rastet ka shpresë, pa shpresë fare do të ishte sikur të rinjtë ta braktisnin plotësisht politikën”, tha kryeministri Edi Rama.

Kreu i PD-së, Sali Berisha, në një intervistë për median greke Liberal, ka folur për vendimin e tij për të rikandiduar si kryeministër i vendit.

Ish-kryeministri u shpreh se “pas çdo rikthimi ka fuqi madhore”, duke theksuar se këtë vendim e mori pas shpalljes non grata nga ana e Amerikës.

“Jo vetëm u dezinjova, por u kërkua që të mos futem në parlament. Atëherë, qendrimi im ishte ky: askush përveç shqiptarëve nuk mund të bëjë listën e deputetëve, përderisa Shqipëria të jetë një vend sovran”, deklaroi Berisha.

Berisha komentoi marrëdhëniet shqiptaro-greke duke u shprehur se vitet e fundit kanë patur edhe përkeqësime krejtësisht për shkak të qëndrimeve, sipas tij, të qeverisë së Edi Ramës.

Kryedemokrati, sa i përket integrimit të vendit në BE, teksoi se Shqipëria nuk plotëson asnjë kriter, përveç pozicionit gjeostrategjik, por shtoi se mbështet procesin.

Intervista për median greke:

“Rama i korruptuar i shkatërroi marrëdhëniet me Greqinë me paraburgimin e Fredi Belerit, me dëshmitarë të rremë, pasi kishte përvetësuar një kanion (të Gjipesë) prej shumë hektarësh dhe iu bind oligarkëve”, thotë për Liberal, Sali Berisha, kreu i opozitës shqiptare. Ai shpjegon pse Shqipëria nuk i plotëson kriteret për anëtarësim në BE dhe flet për mundësitë e bashkëpunimit në Ballkan.

nga Nikolas Tampakopoulos

Z.Berisha, çfarë ju shtyn të jeni kandidat edhe për këto zgjedhje?

Sali Berisha: Historitë e rikthimeve janë ekzotike, nuk janë të shpeshta. Pra, pas çdo rikthimi ka fuqi madhore. Dhe në këtë rast, Sali Berisha 8 vite pasi ishte larguar pothuaj nga skena politike, iu kërkua që të mos hyjë në parlament bazuar në një akt korruptiv. Bazuar në dezinjimin ‘non grata’ të Antoni Blinken, në aktin që vinte nga një lobim korruptiv i Edi Ramës dhe Xhorxh Sorosit.

Pra, jo vetëm u dezinjova, por u kërkua që të mos futem në parlament. Atëherë, qendrimi im ishte ky: askush përveç shqiptarëve nuk mund të bëjë listën e deputetëve, përderisa Shqipëria të jetë një vend sovran. Dhe, meqënëse ish-kryetari im që punonte me ligësi prapa shpinës sime, ishte pjesë e këtij qëndrimi, unë ndërmora procesin e rikthimit. Një proces që kaloi të gjitha etapat dhe që eci me sukses, me gjithë përpjekjet e jashtëzakonshme të qeverisë shqiptare dhe të DASH, diplomatë të cilët, ambasadori në Tiranë dhe i dërguari për rajonin kërkonin arrestimin, i bënin thirrje shqiptarëve të mos më mbështesnin, ajo ndodhi.

Pra, siç e sheh, rikthimi nuk është një akt individual, por është një akt shumë më i gjerë. Shumë njerëz mund të duan të rikthehen, por nuk rikthehen dot.

E provoi Papandreu të rikthehet. Mbeti me 3%. Po jap shembull për të krahasuar se, jo cilido që do mund të rikthehet. Pra, rikthimi është një thirrje, dhe unë iu përgjigja kësaj thirrje të vendit tim.

Si e vlerësoni rrugëtimin europian të Shqipërisë. Pra, rrugëtimin për në BE. Cilat janë reformat që ju do të donit të implementonit?

Sali Berisha: Në mënyrë absolute Shqipëria nuk plotëson asnjë kriter, përveç pozicionit gjeostrategjik, për të cilin unë e mbështes procesin. Por kriteret… Një vend që arreston në vitin elektoral 3 liderë të opozitës, e partive kryesore, një vend që u merr mandate me gjykata kundërshtarëve politikë, se i kontrollon ato, një vend që kontrollon mediat në mënyrë të pamëshirë dhe shpall se do mbyllë rrjetet sociale, Tik Tok-un, një vend që ka të burgosur, ka një drejtësi politike dhe mungesë të një procesi ligjor të drejtë.

Nuk duhet të harroni se në Shqipëri sot, 62% e të burgosurve janë në paraburgim. Se i marrin i plasin njerëzit në paraburgim dhe nuk merret kush me ta. Ky vend, me një shkallë të lartë korrupsioni më të paimagjinueshëm. Me afera korruptive, të cilat shkojnë miliarda. Ky vend, i cili është një narkoshtet. Narkoshteti i parë dhe i vetëm në Europë, ku përfaqësuesit e Sinaloas priten në zyrën e Edi Ramës dhe marrin licensa për kazino dhe resorte me 5 yje.

Nuk ka asnjë lidhje me kriteret që kërkohen për anëtarësimin në BE.

Gjithçka tjetër jashtë gjeopolitikës, jashtë kriterit gjeostrategjik nuk qëndron.

Sa i përket marrëdhënieve shqiptaro-greke si i vlerësoni ato, dhe cilat janë bazat për t’i përmirësuar këto marrëdhënie?

Sali Berisha: Mendoj se, marrëdhëniet shqiptaro-greke kanë bërë progres të ndjeshëm. Por, këto vitet e fundit kanë patur edhe përkeqësime krejtësisht për shkak të qëndrimeve të qeverisë së Edi Ramës.

Po marrim Marrëveshjen e detit. Kishim rënë dakord me qeverinë e qendrës së djathtë dhe të qendrës së majtë të Greqisë, që të shkonim në Hagë. Edi Rama hoqi dorë nga kjo dakordësi dhe deklaroi se do bëjë një marrëveshje më të mirë. Negocioi 2-3 vjet, dhe kur erdhi problemi për të firmosur marrëveshjen, Edi Rama tha se nuk e firmos dot për arsye se ekziston vendimi i Gjykatës Kushtetuese.

Ishte një gjë jashtëzakonisht joserioze. Se ti, në qoftë se uleshe për negociata, duhet t’u thoje që kam këtë vendim, dhe unë jashtë këtij vendimi nuk dal dot. Por jo, të negociosh 3 vite dhe pastaj të thuash: na doli vendimi! Pra, ishte shumë jo serioz.

Së dyti. Akt i pashembullt ishte marrja e mandatit nëpërmjet dëshmitarëve të rremë të Fredi Belerit. Fredi Beleri, anëtar i minoritetit grek në Shqipëri fitoi mandatin, u votua nga qytetarët e Himarës. Sipas Kushtetutës së Shqipërisë, ai ka të drejtë në qoftë se votohet, të jetë dhe president i këtij vendi. Ky është është ligji.

Kurse, Edi Rama i mori mandatin, vetëm e vetëm pse Beleri nuk do të lejonte Ramën të grabisë kanionin e Gjipesë. Kur u arrestua Beleri, unë deklarova publikisht që është arrestim politik dhe prapa këtij arrestimi qëndrojnë interesa mafioze direkte të Edi Ramës. Nuk e dija se, Edi Rama kishte pronësuar, pa asnjë dokument kadastral, pa asnjë dokument konfiskimi nga regjimi komunist, kanionin e Gjipesë, një nga kanionet më të bukura të Jonit dhe të Mesdheut, për nënën dhe kushërinjtë e tij. Kjo doli më vonë.

Sigurisht që, Fredi Beleri nuk mund të bënte kurrë një kompromis të tillë, të lumturonte Edi Ramën me 224 mijë m2 tokë në këtë zonë.

Megjithatë, arriti që të krijojë përshtypjen se Beleri nuk është njeri korrekt. Beleri nuk kishte bërë asnjë faj. Beleri ishte fajtor vetëm se ishte deklaruar anëtar i minoritetit grek dhe duhej që ky të pranonte t’i bënte Edi Ramës favoret mafioze që kërkonte.

Pra, marrin fund këto. As që do ndodhin dhe as kanë për të ndodhur. Çdo qytetar do të trajtohet sipas kushtetutës dhe ligjit. Mund të kemi raste, apo shembuj të tjerë.

Pra, janë një seri aktesh të cilat, sigurisht, nuk është se nuk ndikuan në marrëdhëniet negativisht.

Traktati i Miqësisë, një dokument themelor i firmosur në vitin 1996 u injorua totalisht dhe, faktikisht sot është i skaduar, kërkon të rinegociohet, të rishqyrtohet. Pra, marrëdhëniet me Greqinë u dëmtuan nga interesat mafioze të Edi Ramës.

Cilat janë sfidat dhe mundësitë për bashkëpunimin e vendeve të Ballkanit?

Sali Berisha: Mundësitë janë të mëdha. Së pari, Shqipëria duhet të luftojë me vendosmëri kriminalitetin me zero tolerancë.

Shqipëria ka shkatërruar sistemin e drejtësisë. Dhe në mungesë të një sistemi drejtësie, në mungesë të sigurisë juridike, unë nuk di ndonjë investitor të huaj apo grek serioz që të ketë ardhur gjatë këtyre viteve në Shqipëri. Di me dhjetëra dhe qindra që janë larguar nga Shqipëria.

Pra, kushti i të gjitha kushteve për këtë bashkëpunim është krijimi i një klime miqësore për biznesin. Nuk ka një kompani greke, apo të vendeve tjera që të fitojë në Shqipëri, se i fitojnë të gjitha oligarkët e Edi Ramës. Në një kohë kur, para vitit 2013, kompani greke, italiane, gjermane, amerikane ndërtuan projektet e mëdha dhe i fituan në tendera ndërkombëtare. Absolutisht, asnjë e favorizuar nga Sali Berisha, por me meritën e tyre në mënyrë transparente dhe kanë bërë punë të shkëlqyera.

Ikën. Jo vetëm që ikën, por disa prej tyre u ndanë me gjyqe me këtë qeveri për shkak të abuzimeve të qeverisë.

Të paktën 12 persona janë plagosur nga të shtënat me armë zjarri në Toronto.

Sipas autoriteteve autori i dyshuar i ngjarjes ishte maskuar me kapuç të zi dhe është larguar me automjet nga vendi i ngjarjes.

Autoritetet i ka bërë thirrje qytetarëve që të shmangin lëvizjet në këtë zonë. Ndërsa ekipet e emergjencës kanë mbërritur në vendngjarje për t’i ardhur në ndihmë të plagosurve

Pas pothuajse 10 ditësh hetuesit kanë zbuluar shkaqet e vdekjes së aktorit, Gene Hackman dhe gruas së tij, Betsy Arakawa.

Hackman, 95 vjeç dhe Arakawa, 65 vjeç, u gjetën të vdekur në shtëpinë e tyre në Santa Fe, New Mexico, më 26 shkurt.

Autoritetet lokale zbuluan rezultatet e autopsisë sot. Arakawa vdiq nga sindroma pulmonare hantavirus, një sëmundje e rëndë e mushkërive, sipas Heather Jarrell, kryehetuesja mjekësore.

Ndërsa, Hackman vdiq nga sëmundja kardiake hipertensionale dhe aterosklerotike, me sëmundjen e Alzheimerit si një faktor të rëndësishëm kontribuues në kolapsin e shëndetit të aktorit.

Jarrell tha se nuk kishte asnjë mënyrë për të përcaktuar një kohë specifike të vdekjes. Megjithatë, tha ajo bazuar në faktorë të tjerë të rastit, ishte e arsyeshme të konkludohej se Arakawa vdiq më 11 shkurt dhe Hackman shtatë ditë më vonë, më 18 shkurt.

Trenat për dhe nga Parisi u ndërprenë pas zbulimit të një bombe të pashpërthyer të Luftës së Dytë Botërore herët pranë stacionit të tretë më të ngarkuar të trenave në botë.

Pothuajse 500 trena anuluan udhëtimet dhe ndërprerja preku rreth 600,000 njerëz në Gare du Nord, tha ministri i transportit.

Bomba, e përshkruar nga një zëdhënës i kompanisë kombëtare hekurudhore të Francës SNCF si “me të vërtetë e madhe”, u zbulua nga punëtorët e ndërtimit në një vend për të zëvendësuar një urë hekurudhore. Ajo u gjet 2.5 km jashtë Parisit, përgjatë shinave hekurudhore në qytetin e afërt të Saint Denis.

“Bomba mund të jetë një kërcënim serioz për jetën e njerëzve,” paralajmëroi zëdhënësi. Bomba peshonte 500 kg, duke përfshirë 200 kg eksploziv.

Zbulimi çoi në një ndërprerje të udhëtimeve vendase dhe ndërkombëtare në stacionin e zhurmshëm, Gare du Nord të Parisit, ku rreth 220 milionë vizitorë kalojnë çdo vit. Shërbimet për Londrën dhe Brukselin u goditën rëndë, tha Eurostar.

Ministri francez i transportit Philippe Tabarot tha se shërbimet e trenave do të rifillojnë gradualisht dhe rrugët do të rihapeshin nw orwn 18:00 me orën lokale, megjithëse nuk ishte menjëherë e qartë se si u sigurua apo asgjësua bomba.

“Ne jemi të kënaqur dhe të lehtësuar që të gjitha këto shqetësime kanë marrë fund” tha Tabarot.

Pas zbulimit të bombës, u krijua menjëherë një perimetër sigurie, duke çuar në ndërprerjen e linjave ndërqytetëse dhe periferike nga Gare du Nord, tha policia për CNN.

Më vonë, perimetri i sigurisë u zgjerua në 500 metra, sipas bashkisë së Saint Denis. Të gjitha ndërtesat në afërsi me dritare të drejtuara nga bomba u evakuuan gjithashtu.

Disa qindra pasagjerë ishin brenda Gare du Nord. Atmosfera ishte e qetë, me dhjetëra personel treni dhe personel sigurie që ndihmonin pasagjerët.

Një grua tha, nga jashtë stacionit: “Ne duhej të niseshim për një fundjavë në Londër këtë mëngjes. Shqetësimi është se ne do të humbasim 800 euro dhoma hoteli nëse nuk bëjmë rezervimin, kështu që është pak problem.”

Një grua tjetër tha: “Nuk jepet asnjë informacion në aplikacion, vetëm faqja e Eurostar që thotë se mund të rimbursohen. Përveç kësaj, nuk ka informacion të mëtejshëm.”

Edhe këtë të premte, emisioni i të gjithë shqiptarëve “Për shqiptarët” solli histori që prekin zemrat e të gjithëve.

Në një qytet të vogël, në një shtëpi të vjetër, ku muret e lagështa mbanin erën e mykut e uji pikonte në dhomë sa herë binte shi, jetonte Liljana me bashkëshortin e dy fëmijët e vegjël, Sidorela e Franko.

Liljana u njoh me Ardianin në moshën 35 vjeçare. U njohën me shkuesi por u dashuruan shumë shpejt me njëri tjetrin.

Liljana ishte rritur në një shtëpi të vogël me motrën, vëllain e nënën, pasi babai kishte ndërruar jetë kur ajo ishte vetëm 13 vjeç. E duke u rritur ëndërronte të njihte dikë që do i ndryshonte jetën, dikë që do e ndihmonte të realizonin dëshirën e saj për të jetuar në një shtëpi të madhe e të ngrohtë, bashkë me fëmijët e tyre. Sapo e takoi Ardianin, e kuptoi se ai ishte njeriu me të cilin do e bënte këtë ëndërr realitet.

Ardiani jetonte në Lushnjë në një shtëpi me qira, e shumë shpejt iu bashkua edhe Liljana. U bënë prindër të dy fëmijëve si drita, që i dhanë ndriçim asaj shtëpie të errët e të zymtë.
Ëndrrat ishin të mëdha, por me kalimin e viteve nisën të zbehen. Liljana dhe Ardiani përpiqeshin shumë, por nuk po mundeshin të mblidhnin mjaftueshëm të ardhura sa për të blerë shtëpinë e tyre. Jeta ishte shumë e vështirë. Kur vinte darka, nuk kishte mjaftueshëm ushqim për të shtruar në tavolinë. Shumë herë fëmijët kanë fjetur të uritur, e Liljana i shihte nga pragu i dhomës me zemrën e thyer e duart bosh.

Ardiani lodhej shumë, punonte gjithë ditën e përsëri nuk shihte asnjë shpresë për familjen e tij. Trishtimi, lodhja, mërzia që nuk mund të plotësonte dëshirat e fëmijëve, e vunë poshtë. Gjendja e tij shëndetësore nisi të përkeqësohej dita ditës dhe mjekët e njoftuan se kishte tumor në mëlçi. Qëndroi për 2 javë në spital, por nuk kishte më shpresë. Tumori po përhapej me shpejtësi në mushkëri. Doktorët i sugjeruan Liljanës të ktheheshin në shtëpi, që ditët e fundit Ardiani t’i kalonte pranë fëmijëve.

Për Liljanën kjo ishte një tronditje e madhe.E gjitha ndodhi shumë shpejt, nuk patën kohë as të kuptonin si dhe pse. Pse pikërisht ata duhet ta kalonin këtë vuajtje kaq të madhe?

Liljana i qëndroi Ardianit te koka, teksa ai jepte shpirt çdo ditë nga pak. Sytë e Ardianit shfaqnin vetëm dhimbje, dhimbje që nuk do i çonte dot më fëmijët te lodrat, që nuk do i përqafonte e nuk do ishte aty për t’i këshilluar kur ata të rriteshin e të kishin më shumë nevojë për të.

Ishte data 23 shtator. Momenti që Liljana i druhej erdhi… Ardiani e ndjeu se ishin minutat e fundit. Sidorela dhe Franko donin të qëndronin afër babait. Franko kishte pasur një parandjenjë të keqe dhe nuk donte të largohej nga i ati, por Liljana i gënjeu. Iu tha se babi do ishte mirë prandaj ata duhet të shkonin në shkollë, e kur të ktheheshin ai do ishte aty për t’i pritur.

Kur ata ikën, Ardiani me zërin e dobët nga pafuqia e pyeti Liljanën: “A je bërë gati? I ke lekët për varrimin tim?”

Zemra e Liljanës u copëtua. Edhe në frymën e tij të fundit Ardiani ishte i shqetësuar për ata, e jo për vete.

Ai iku pas me merakun për fëmijët e Liljanën. Iku pa iu lënë një shtëpi të ngrohtë. Nuk e mbushi dot kurrë frigoriferin plot. Nuk i bleu kurrë fëmijëve dhuratat që kërkonin. Iku me një amanet. “Ngopu fëmijëve barkun me bukë”. E ky amanet i rëndon shpirtin Liljanës.

Shtëpia është ende me qira, frigoriferi bosh, faturat nuk ndalen dhe ndonjëherë ajo ndjen sikur po mbytet.

Ajo ka nevojë për ndihmë, sepse e vetme nuk ia del dot.