Category: Lajme

Sekretari i Përgjithshëm i NATO-s, Mark Rutte, theksoi në një intervistë për gazetën gjermane Welt am Sonntag, se Evropës i nevojiten buxhete më të larta për mbrojtjen për të siguruar stabilitetin e kontinentit.

Shefi i NATO-s theksoi se rritja e buxheteve është e pamjaftueshme pa u shoqëruar me një rritje të shpejtë të prodhimit të pajisjeve ushtarake.

“Do të duhet të shpenzojmë më shumë për sigurinë tonë” i tha Rutte gazetës gjermane Welt am Sonntag (WamS).

“Por gjithashtu, duhet të rrisim shpejt prodhimin tonë të mbrojtjes në të dy anët e Atlantikut. Për shumë kohë, kemi prodhuar shumë pak,” tha ai.

NATO, që përfshin shumicën e vendeve evropiane, si dhe Shtetet e Bashkuara dhe Kanadanë, ka theksuar nevojën për municione, anije, tanke, avionë, satelitë dhe dronë. Sipas Rutte, është e domosdoshme që të rritet prodhimi i këtyre pajisjeve për të përballuar kërcënimet e mundshme dhe për të ruajtur sigurinë e Evropës.

Vendet evropiane janë duke ecur me shpejtësi për të rritur shpenzimet e mbrojtjes dhe për të mbështetur Ukrainën në luftën e saj, pas vendimeve të Presidentit amerikan Donald Trump për të ngrirë ndihmën ushtarake për Kievin.

Në këtë kontekst, ligjvënësit gjermanë po shqyrtojnë ndryshime të mëdha në rregullat e huamarrjes shtetërore për të financuar sektorin e mbrojtjes me një fond prej 500 miliardë eurosh. Pas 13 marsit, këto masa pritet të miratohen nga parlamenti që po largohet para formimit të një parlamenti të ri më 25 mars.

Në një takim të fundit të liderëve të Bashkimit Evropian, u diskutua mbështetje për kreditë e përbashkëta të mbrojtjes për vendet anëtare dhe mundësia e lehtësimit të rregullave të buxhetit për të mundësuar shpenzime më të mëdha për mbrojtjen.

Rutte, gjithashtu, tregoi se kishte takuar shumë udhëheqës të kompanive të prodhimit të mbrojtjes dhe kishte kërkuar nga ta që të përgjigjen ndaj kërkesës në rritje për pajisje ushtarake.

Emisioni “Stop” ndodhet në Elbasan, për problemin e krijuar për shkak të një ndërtese 4 katëshe. Leonard Niçe tregon se është trashëgimtar i Pavlinës dhe Jorgjit, të cilët kishin 6 fëmijë. Të gjithë fëmijët ranë dakord, që ta shembnin shtëpinë e vjetër për të ngritur të renë, për të cilën bëhet edhe konflikti.

“Një padrejtësi për kaq vite nga Policia e Shtetit për një objekt 4 katësh ku kam kontribuar bashkë me vëllezërit. Jemi 6 fëmijë dhe të gjithë kemi jetuar këtu kur ka qenë banesa vetëm 1 katëshe. Në vitin 2000 është shembur shtëpia dhe është bërë një banesë 4 katëshe. Për katin e parë ramë dakord që ta bënim lokal dhe ta shfrytëzonim si lokal. Në katin e dytë do të rrinte vëlla Edmond Niçe, në katin e tretë do të jetonte mamaja ime Pavlina Niça me nusen e vëllait dhe fëmijët e vëllait Arjan. Kurse në katin e katërt Leonard Niça, që unë nuk banoj në atë kat. Nuk lejohet më thonë dhe më mohohet kontributi që unë kam dhënë në lokal”, tha denoncuesi.

Fëmijët vendosin, që katin e parë ta bënin lokal për të punuar të gjithë dhe sipër do të banonin. Njëri prej vëllezërve, Edmondi mori 45 milionë Lekë kredi që u shlye me punën e të gjithëve. Problemi nisi, kur Leonardi aplikoi tek Aluizni për të tre vëllezërit, por kuptoi se Edmondi kishte aplikuar më parë vetëm në emrin e vet.

“Unë jam viktimë e kësaj pune sepse paraja që merreshe nga lokali shkonte për të larë kredinë, sado që lokali ishte në emrin tim. Nuk donin të merrnin për katin 4 sepse thoshin që nuk ka rënë puna, u detyrova mora një kredi 18 milionë, kam ndërtuar çatinë bashkë me një pjesë të suvatimeve. Mbaroi kredia mua nuk mu lejua më, pavarësisht se unë kisha taksirat sepse më vdiq ime shoqe dhe s’kisha mundësi të hyja në shtëpi. Pas 5 viteve që doja të hyja në shtëpi nuk mu lejua, sepse më thanë që nuk ke kontribuar. Të gjithë kontributin e merrte sikur e kishte paguar im vëlla. Unë jam trashëgimtar, por këtu ka rol dhe policia. Në polici kemi një nipçe, Dorian Panganika, që mban anën e Edmondit”, tregoi më tej denoncuesi.

“Stop” pati një komunikim me ish-shefin e krimeve në polici, Dorian Panganika.

Ish-shefi i krimeve Dorian Panganika: Janë bërë veprimet nga ana e specialistëve dhe punonjësit e policisë, konform procedurave ligjore, asgjë më tepër!

Gazetarja: Ju si ish-shef krimesh këtu sepse tani më kanë thënë që keni lëvizur në Cërrik keni mbajtur një qasje subjektive, pra duke mbrojtur njërën palë dhe jo tjetrën.

Ish-shefi i krimeve Dorian Panganika: Unë s’jam bërë asnjëherë i anshëm dhe për këtë mund t’ju a vërtetojë kushdo nga punonjësit.

Në këtë pikë, Leonardi u akuzua për falsifikim firme akuzë për të cilën e çuan në prokurori. Ndërkohë procesi i legalizimit nga fëmijët pezullohet. Nga ajo kohë deri më sot Leonardi nuk lejohet të futet në katin e tij.

“Në vitin 2015 unë aplikoj për legalizimin e banesës me të 3 emrat, timit dhe të 2 vëllezërve. Ndërkohë që unë bëj aplikimin del që im vëlla për të gjithë objektin në emrin e vet, na ka përjashtuar të 2 ne të tjerëve. Për këtë gjë pati përplasje dhe për këtë mua më akuzon sot prokuroria më falsifikim firme. Ka shkuar në gjykatë si çështje që nga viti 2021 dhe asnjë nuk e merr përsipër, dosja fle në gjykatë që nga 2021 e deri më sot. Prona është e babait, investimi është i joni dhe unë nuk lejohem që të hy në shtëpinë time. Më kanë akuzuar sikur kam dashur t’i gjuaj sime kunate me kazmë. Sa gjej derën hapur për të hyrë në shtëpi, vjen policia e më shoqëron në komisariat”, tha Leonard Niçe.

Në prezencë të kameras Leonard Niçe shkon në shtëpi, por nipi dhe kunata e përzënë.

Xhaxhai: Hape një çikë derën, se do hyj në brenda në shtëpi!

Nipi: Tani më vjen keq! Kur të bëhen gjyqet!

Xhaxhai: Do më hapësh derën, se unë jam çun shtëpie!

Nipi: Jo, më vjen keq! Domethënë, po të drejtohem ty, se bashkë kemi bërë muhabetet!

Nusja: Unë jam nusja, jam njësoj si mami jot!

Xhaxhai: Jam unë i zoti i shtëpisë.

Nusja: Sa vjeç ke qenë ti Jorgji kur është bërë shtëpia?

Nipi: Zonjë, e ka bërë babai im!

Xhaxhai: Nuk e ka veç babi tat! Po ta dha gjyqi ty masanej dal unë ani.

Nipi: Jo, jo të lutem! Të bëhet gjyqi edhe shikojmë.

Xhaxhai: Jam unë çuni i Jorgji Niçes këtu, nuk je ti!

Nipi: Këtu jetoj unë për momentin!/ TvKlan

Policia e Librazhdit ka arrestuar një 53-vjeçar, i cili kanosi me thikë bashkëfshatarin e tij pasi ky i fundit tentoi ta ndalonte të mos drejtonte automjetin në gjendje të dehur.

Në pranga ka përfunduar shtetasi Maksut Almeta.

Gjatë kontrollit, policia sekuestroi mjetin prerës të përdorur për kanosje, si dhe një tjetër thikë që iu gjet të arrestuarit në automjet.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme.

“Menjëherë pas njoftimit për një rast kanosjeje në fshatin Floq nga një shtetas në gjendje të dehur, shërbimet e Komisariatit të Policisë Librazhd organizuan punën për parandalimin e një ngjarjeje të mundshme kriminale dhe kapjen e autorit.

Si rezultat i reagimit të shpejtë të shërbimeve të Policisë, u bë kapja dhe arrestimi në flagrancë i shtetasit M. A., 53 vjeç.

Ky shtetas u kap teksa drejtonte automjetin në gjendje të dehur. Gjithashtu, ai dyshohet se duke qenë në të njëjtën gjendje, ka kanosur bashkëfshatarin e tij, shtetasin Y. B., 46 vjeç, i cili ka ndërhyrë për të mos lejuar që 53-vjeçari të drejtonte automjetin në këtë gjendje”, thuhet në njoftimin e Policisë.

Kryeministri Edi Rama në podkastin e radhës me të rinjtë e anëtarësuar në PS, u shpreh se 98% e shqiptarëve sot e kanë një banesë në vendin e tyre.

Rama krahasoi Shqipërinë me vendet ku kanë emigrantët shqiptarët, ku tha se kriza e strehimit jashtë është më e madhe.

“Ata që kanë ikur gjatë periudhës së mëparshme edhe mund të vendosnin kapitalin, sot unë sfidoj këdo të ikësh sot është të mos…mund të ikësh, të gjithë kanë të drejtën të ikin, të vijnë, por të ikësh sot duke u nisur thjesht nga pamja e parë e pagave dhe historitë që ke dëgjuar nuk di se çfarë të pret atje.

Nuk është më koha që mund të kursehet përtej atyre që konsumohen dhe që mund të akumulosh kapitale si ato që kanë akumuluar ata që ikën në vitet ‘90, apo dhe deri kur filloi kriza, sepse nuk po u del atyre që janë atje. Gjithë stresi që kanë sot qeveritë sot në europën e bashkuar lidhet me faktin që shtëpitë janë bërë të pakapshme dhe ndërkohë ne kemi një fat shumë të madh sepse jemi vend ii parë në Evropë për pronësi shtëpish. 94% të shtëpive në Shqipëri janë pronë e njerëzve, ndërkohë që jashtë është bërë e pamundur, kriza e strehimit është bërë e theksuar.

Puna e mirëpaguar është bërë problem tjetër i madh. Patjetër që e them gjithmonë, sepse e kam bërë vetë, një njeri ka të drejtën të ëndërrojë fort dhe të kërkojë që ta realizojë kudo qoftë ajo, edhe mbrapa diellit. Por duhet pasur parasysh që nuk ka më emigracion si më parë”, tha Rama.

Një 69-vjeçar ka humbur jetën, pasi ka rënë nga shkallët. Policia bën të ditur se ngjarja ka ndodhur në fshatin Radostinë të Fierit.

Lidhur me këtë ngjarje, uniformat blu thonë se janë referuar materialet në prokurori, ndërsa nuk dihet nëse incidenti ka ndodhur në banesën e të moshuarit apo në një tjetër vend.

“U referuan materialet në Prokurori për vlerësim pasi ditën e djeshme, në fshatin Radostinë, shtetasi S. Sh., 69 vjeç, është rrëzuar aksidentalisht nga shkallët dhe për pasojë ka ndërruar jetë në spital”, njofton policia.