Category: Lajme

Detaje të reja dalin nga hetimet lidhur me sulmin me armë ndaj kompanisë farmaceutike CFO Pharma, ngjarja e ndodhur në orët e para të mëngjesit të së martës (17 Mars).

Pista ku po fokusohet grupi hetimor për sulmin ndaj CFO Pharma është aktiviteti i biznesmenit Nadir Çausholli, i cili dyshohet të jetë i përfshirë në marrjen dhe dhënien e parave me fajde rreth viteve 2019-2022.

Gjithashtu një pistë tjetër ku po hetohet është edhe ajo e konkurrencës. Por, vetë biznesmeni Nadir Çausholli nuk ka dhënë asnjë detaj që mund të ndihmojnë hetuesit në identifikimin e autorëve apo porositësve.

Hetuesit dyshojnë se autorët e sulmit janë paguar nga persona të tretë për të kryer sulmin me armë që ndodhi rreth orës 02:00.

Nga këqyrja e kamerave të sigurisë ende nuk është zbuluar ndonjë provë e rëndësishme që mund të çojë në identifikimin e autorëve. Pamjet e makinës së tyre nuk janë qarta.

SULMI NDAJ CFO PHARMA

Ngjarja e rëndë është shënuar pas mesnatës së të hënës në autostradën Tiranë-Durrës. Nga një automjet që lëvizte në drejtim të Durrësit është qëlluar me breshëri automatiku mbi një godinë e një prej bizneseve më të njohura në kryeqytetet dhe jo vetëm. Breshëria është adresuar në fasadën e xhamtë të depos farmaceutike “CFO Pharma” duke shkaktuar vetëm dëme materiale.

Sulmi sipas të dhënave të policisë ka ndodhur diku rreth orës 02.00, ndërsa autorët janë larguar në drejtim të Vorës, ose të paktën dyshimet janë që mjeti i tyre është fiksuar edhe në afërsi të Vorës pas ngjarjes. Policia u njoftua për ngjarjen rreth 6 orë me vonesë, ndërsa bëri me dije se është ngritur edhe një grup hetimor që do të tentojë të zbardh krimin.

Për orë me radhë policia ka mundur të tregojë vetëm numrin e gëzhojave që ka mbledhur në vendin e ngjarjes, ndërsa është marrë në pyetje i zoti i biznesit, një emër jo pak i njohur në fushën e farmaceutikës dhe të transportit urban.

Nga rrëfimi i tij nuk është mësuar ndonjë detaj, ndërkohë që prokuroria ka nisur hetimet intensive për të mësuar se cili ka qenë qëllimi i atij sulmi me armë.

POLICIA PËR NGJARJEN

Sipas të dhënave të policisë është bërë me dije se për të mësuar se çfarë ka ndodhur pas mesnatës së të hënës janë hapur kamerat e disa bizneseve. Në fakt, ajo rrugë është një nga rrugët më të survejuara në vendin tonë, pasi është e pamundur që ngjarja të mos ketë dëshmitar.

Janë një mori biznesesh që ruhen me roje sigurie në shërbim 24 në 24 dhe se gjithë rruga monitorohet nga kamerat e tyre. Përballë depos së sulmuar policia ka mundur të nxjerrë pamjet nga sulmi ku edhe është dyshuar se në ngjarje kanë marrë pjesë dy persona, ku njëri ka qenë në rolin e qitësit dhe tjetri në rolin e shoferit, pra të drejtuesit të mjetit.

Referuar të dhënave që vijnë nga policia e Tiranës mësohet se po verifikohen të gjitha aktivitetet e biznesmenit, i cili nuk është i njohur vetëm në fushën e tregtimit të barnave, por edhe në atë të shërbimit urban. Jo pak herë emri i tij është lakuar në lidhje me aktivitetin e tij, sidomos pas shpërthimit të pandemisë në vendin tonë.

Megjithatë do të jenë prokurorët e çështjes që do të vijojnë me kërkimin e shkaqeve të atij sulmi me armë që bëri shoshë pjesën e xhamtë të ndërtesës që ndodhet në rrugën dytësore që lidh Tiranën me Durrësin. Hetimet vazhdojnë ndërkohë që priten të merren në pyetje edhe persona të tjerë. Nuk bëhet me dije nëse në ndërtesë ka pasur persona në atë moment dhe madje as rojë, por do të jenë të shumtë personat që do të dëshmojnë.

Gjatë një interviste në ‘Kafe Shqeto’, kandidatja për deputete në zgjedhjet e 11 majit për Qarkun e Tiranës nga PD, tha se Veliaj është i përfshirë në skema të korrupsionit dhe pastrimit të parave, duke përdorur fonde të bashkisë për përfitime personale dhe për të mbajtur në këmbë makineritë elektorale.

Sipas Tabakut, ky abuzim me burimet publike ka ndikuar drejtpërdrejt në manipulimin e rezultateve zgjedhore, gjatë proceseve të kaluara dhe në favorizimin e individëve të lidhur ngushtë me pushtetin.

Ajo kërkoi që ata që janë të përfshirë në këto veprime të dalin para drejtësisë dhe të mbajnë përgjegjësi për veprimet e tyre.

Jorida Tabaku: “Erion Veliaj me atë që ka bërë, me korrupsionin, me pastrimin e parave, sepse tashmë është ekspozuar vetëm një pjesë se si përdoren këto para për përfitime personale të tij, për gjëra shumë të ngushta familjare.

Ndërkohë, makineria elektorale e tij ka ndryshuar rezultatin dhe ajo që ka ndodhur me 5D është e pakonceptueshme. Janë të gjithë në burg, ata, dhe në fakt duhet të ishin dhe të tjerë në burg për këtë çështje.

Ato janë një pjesë e makinerisë elektorale, ashtu si ajo skema e 5D, që janë drejtorët e bashkisë. Të gjithë duhet të shkojnë pas hekurave dhe ka dhe të tjerë që duhet të shkojnë. Jo vetëm për 5D, por edhe për lejen e ndërtimit, për prishjen e Teatrit të Tiranës dhe skema të tjera të tilla që ai i ka mbajtur në këmbë me njerëz që i furnizonte dhe i financonte me fondet e bashkisë, që punonin si makineri elektorale, si zotëria që përmend ti dhe shumë të tjerë që janë përpara drejtësisë.

Unë besoj se sot ai ka një avantazh për njerëzit, për të shprehur vullnetin e tyre të lirë.

Ato që ka bërë Bashkia e Tiranës, pagesat, legalizimet, shpërblimet, strehimet, lejet e ndërtimit, favoret që nuk janë sot në terren, janë një hapësirë e favorshme për qytetarët e Tiranës për të votuar përmes votës së lirë dhe për të mos pasur makinerinë elektorale në terren”.

“Jeta virtuale a është shkak për divorc”? Ishte kjo tema e diskutimit në studion e lajmeve në “Ora News” ku të ftuara ishin avokatja Estela Lalzi dhe sociologia Eva Sinanaj.

Kjo e fundit u shpreh se fenomeni i divorceve vitet e fundit është në rritje në Shqipëri.

“Në fillim jeta virtuale na shërbeu pasi çifte të shumta u njohën nëpërmjet rrjeteve sociale e më pas krijuan familje.

Mesa duket nuk po balancohet jeta reale me jetën virtuale. Nëse na shërbeu për një njohje në fillim, ku ajo është incidicia e parë e një mjedisi virtual, por nuk duhet të vazhdojë më virtualisht pas kësaj marrëdhënia mes partnerëve.

Sepse ndodh që ata janë në të njëjtin mjedis fizik dhe harrojnë të flasin e i shkruajnë njëri-tjetrit në rrjetet e tyre. Kjo është më pas ai absurde që arrijmë të kemi në një marrëdhënie të cilat dobësohen dhe arrijnë deri në divorc”, u shpreh sociologia Eva Sinanaj.

NDIQNI DISKUTIMIN E PLOTË PËR ÇËSHTJEN E DIVORCEVE

Policia e Tiranës ka arrestuar dy vëllezër që kishin kthyer banesën e tyre në Laknas në një “shtëpi bari” për kultivimin e kanabisit.

Shkëlqim dhe Fatmir Matraxhi janë dy vëllezërit e arrestuar për shtëpinë e barit në Kamëz, të cilët katin e tretë të banesës e përshtatën për këtë aktivitet.

Gjithashtu në pranga ka rënë edhe një punonjës i OSHEE-së, (Endrit Paja) nën akuzën për shpërdorim detyre, pasi dyshohet se ka favorizuar këtë veprimtari kriminale duke mos evidentuar lidhjen e paligjshme të energjisë elektrike.

Gjatë kontrollit, policia sekuestroi 20 bimë kanabis rreth 60 cm të larta, një sasi droge të përpunuar, llamba speciale, ventilatorë dhe pajisje të tjera elektrike të përdorura për kultivim në ambiente të mbyllura.

Mësohet se dy vëllezërit më parë ishin marrë me të njëjtin aktivitet të paligjshëm në Angli, përpara se të ktheheshin në Shqipëri për ta vazhduar në Laknas.

Kryeministri Edi Rama, ka zhvilluar sot një takim me socialistët në Elbasan, ku ka folur për zhvillimet e fundit politike. Rama u ndal tek demokratët që i janë bashkuar të majtës, pas pakënaqësive në listat e “kampit blu”, duke thënë se PS e ka derën të hapur për të gjithë.

Rama ironizoi Dashamir Sulën, i cili ka mbetur pa parti dhe nuk ka emrin në lista, duke thënë se duhet të pastrohet para se t’i bashkohet PS-së. Rama nuk kurseu as Lulzim Bashën, me të cilin ka pasur disa replika në distancë kohët e fundit.

“Kemi në listat tona kandidatë që vijnë direkt nga ana tjetër. Dekanen e fakultetit ekonomik të Vlorës, e kemi nga çadra. Rrinte atje, Rama ik, sot është në listën e mbyllur, sepse gjërat evoluojnë. Luli nuk evoluon sepse është i përsosur. I lindur i përsosur. Një njeri që gjumi e do aq shumë sa e mban për vete, është i përsosur. Ka njerëz që lindin me këmishë, Luli lindi me këmishë nate.

PS është një shtëpi e hapur. Nuk duhet të japësh një provim para se të hysh, e di apo jo programin. Kemi të kuq fare, rozë, pak më bojë qielli, duhet të jemi të hapur edhe për blunë. Rendësi ka që njerëzit të kenë dritë në sy për Shqipërinë.

Sot jemi këtu për t’u thënë të gjithëve mirë se të vini, përveç salamandrave të kënetës, kukumjaçkave. Ata nuk kanë vend këtu te ne, kurse Dash Sula duhet të hyjë në një proces, se mund jetë edhe një ditë. Për momentin duhet të dezinfektohet…si bëhet ajo? Kush merret me pulat, që futen në karantinë? Shpendët, se mbajnë shumë shpendët.. Inat mund ta kesh sa të duash, po hakun duhet t’ia japësh. Aty një njeri me ulërima për komunitetin e vetë, se kanë një të dytë. Por duhet të heqë të gjithë morrat e kënetës. Aty të mbyt morri. Tmerr. Kruhen, i mbyt morri. Nuk ulen dot të mendojnë. Çfarë të bësh? Edhe bufi u rri mbi kokë.”- tha Rama.

Operacionet e fundit të Prokurorisë së Posaçme Kundër Korrupsionit dhe Krimit të Organizuar (SPAK) po sjellin zhvillime tronditëse në politikën shqiptare. Burime të sigurta konfirmojnë se hetimet mbi komunikimet e koduara në aplikacionet Sky ECC dhe Matrix kanë zbuluar një rrjet të gjerë korrupsioni dhe lidhjesh me krimin e organizuar. Sipas informacioneve të fundit, disa ish-deputetë dhe ish-ministra janë në listën e të dyshuarve për përfshirje në aktivitete të paligjshme, përfshirë trafik droge, pastrim parash dhe korrupsion të nivelit të lartë. Dje u dhanë sinjalet se përgjimet nga këto aplikacione do sjellin arrestime ish-deputetësh dhe ish-ministrash.

Paralajmërimi i Nuredin Dumanit

I penduari i drejtësisë dhe vrasësi me pagesë Nuredin Dumani ka paralajmëruar se do të ketë zhvillime të forta nga zbërthimi i platformës “Matrix”. Ai ka vijuar dje dëshminë në gjykatë, ku është ndalur te raportet me Talo Çelën. Ndërsa sa i përket vrasjes së Andi Zylyfit, deklaroi se u porosit nga Gim Kabashi, i njohur si Baca, dhe se informator ishte Fatos Gosa. Sipas tij, Gosa informonte me telefon të enkriptuar dhe se ishte Talo Çela që fliste me të. Më tej Dumani tha se kishte bërë biseda për vrasjen e Talo Çelës. “Kel Kamami më ofroi 2 mln euro për vrasjen e Erion Alibej. Me tha do të jap edhe Talon. I thashë, dua 1.5 mln euro, po më sill Talon përpara”.

Diskutimet në seancë

Avokati Përparim Kulluri: Si jeni arrestuar?
Dumani: Isha i plagosur.
Avokati: Keni thënë se do vrisnit Otin? Pse nuk e vratë?
Dumani: Sepse nuk ishte në Elbasan.
Avokati: Pse i thatë Suel Çelës “më vranë” dhe pastaj “më vratë”?
Dumani: Sepse vetëm ai e dinte që unë isha aty.
Avokati: Pse i jeni drejtuar Suel Çelës me fjalën “më vratë” në Sky. Pse ja atribuon tentativën e vrasjes Suel Çelës?
Dumani: Mua më ka nxjerrë në pritë Sueli. Unë kam shkuar atë ditë në Elbasan bashkë me Henrik Hoxhën të vrisnim Ot Kilën. Shkuam me dy makina, por ai nuk ishte fare në Elbasan.
Henriku komunikonte vazhdimisht me Suel Çelën. Unë vetëm pas atentatin i shkruaja. Më pas nuk kam komunikuar më edhe pse ai ka kërkuar. Do zbardhet Matriksi e do dalin.
Avokati: Pse e bëre marrëveshjen me prokurorinë?
Dumani: Se atëherë mu hapën sytë.
Avokati: Çfarë ju ka premtuar prokuroria për marrëveshjen e bashkëpunimit?
Dumani: Asnjë gjë.
Avokati: Kur e njohe Talo Çelën?
Dumani: Fundi i 2009 fillim 2010. Jam njohur nga Ilirjan Feçi.
Avokati: Pse u prishëm marrëdhëniet me Talo Çelën?
Dumani: Ai ka urdhëruar Altin Ndocin të vrasë vëllanë tim.
Avokati: A ka ndenjur makina që u përdor në vrasjen e Andi Zylyfit në garazhin tënd?
Dumani: Po. Ka qenë një makinë që e kishte vjedhur më parë Altin Ndoci.
Avokati: A është përdorur në ngjarje tjetër?
Dumani: Po për një ngjarje tjetër në Spitallë. Porositës ishte Baca, Gim Kabashi.
Avokati: Keni pretenduar se Fatos Gosa ka qenë informator tek vrasja e Andi Zylyfit?
Dumani: Po ka qenë. E kam paguar.
Avokati: Si ka informuar Gosa?
Dumani: Me telefon të enkriptuar. Fliste Talo Çela me të.
Avokati: Kur e ke takuar Talon për herë të fundit?
Dumani: Ngeli puna e kunatit të Mir Haxhisë pa u bërë.
Avokati: Keni thënë që Andi Zylyfi kishte pak kohë që ishte kthyer nga jashtë dhe ishte interesuar për vrasjen e kushëririt të vet, vëllait të Alibeajt dhe Dylgjerit dhe se i bënte karshillëk Kel Kamamit.
Dumani: Po, i shkonte Kel Kamamit paralel me makinë.
Avokati: Kur i ke shkëputur marrëdhëniet me Talon?
Dumani: Takimi i fundit ka ardhur ai tek shtëpia ime. Fund 2019 fillim 2020. Ne kishim debatuar shumë me të.
Avokati: Kur jeni shkruar për herë të fundit?
Dumani: Me Sky, në verë 2020.

Hapet “Kutia e Pandorës”

Kujtojmë se MATRIX, një shërbim mesazhesh i bërë nga kriminelët për kriminelët, u zbulua për herë të parë nga autoritetet holandeze në telefonin e një krimineli të dënuar për vrasjen e një gazetari holandez në vitin 2021. Kështu nisi dhe hetimi! Shumë shpejt u zbulua se infrastruktura e kësaj platforme ishte më komplekse se platformat që tashmë janë të njohura për publikun, Sky ECC dhe EncroChat. Në këtë rast, themeluesit e aplikacionit ishin të bindur se shërbimi ishte superior dhe më i sigurt për t’u përdorur nga kriminelët. Para disa ditësh, profesori i njohur i Kriminialistikës Ervi Karamuço tha se dosjet e aplikacionit Sky Ecc dhe më vonë Matrix do të “djegin shumë politikanë dhe ish-politikanë”. “Ne presim që vettingun e politikanëve ta bëj SPAK sërish. Ndërkohë që SPAK ka dhënë sinjale që është duke hetuar persona konkret. Dhe me ato që na vijnë flukse informacioni paraprake sot, dalin që disa prej këtyre emrave janë sërish në listë.

Ky është detyrim ligjor që duhet ta bëjnë dhe e majta dhe e djathta, që nesër të mos ndodhen para një fakti që e dinin, që ai person që i merr mandatin fillon përsëri SPAK dhe i kërkon heqjen e mandatit. Se ky pastaj është një cikël ku ti këta deputet nuk i quan më pjesë e shpurës politike, por i përdor si një mburojë që të thuash pastaj, ja si më sulmojnë mua. Nuk mund të prodhojmë deputet të rinj për “alibi”, që ja si ma bënë mua ndërkohë që ti e dije. Partia ka filtër shumë të fortë të vetin, kanë dhënë fonde pafund ambasadat dhe organizatat që të forcojnë para-filtrat e partive politike. SPAK do djegë dhjetëra politikanë që kanë dalë në Sky Ecc dhe më vonë në Matrix”, u shpreh ai.

Autoritetet turke zhvilluan mëngjesin e kësaj të mërkure një operacion të madh policor, i cili përfshiu rreth 3,000 forca të rendit dhe kishte si synim arrestimin e kryetarit të Bashkisë së Stambollit, Ekrem Imamoglu.

Operacioni u zhvillua pas një hetimi mbi akuzat për korrupsion dhe lidhje të dyshuara me organizatën e shpallur terroriste, PKK.

Sipas mediave turke, në kuadër të hetimeve janë lëshuar urdhër-arreste për mbi 100 persona, duke përfshirë disa bashkëpunëtorë të afërt të Imamoglu. Në një deklaratë të zyrës së Prokurorisë së Stambollit, thuhet se mes të ndaluarve janë edhe zyrtarët Murat Ongun, Tuncay Yilmaz, Fatih Keles dhe Ertan Yildiz. Hetimet janë fokusuar në aktivitetet e kompanisë Medya AS dhe projektin “Urban Consensus”, për të cilat hetuesit dyshojnë se ka shkelje korruptive.

Në një video të publikuar nga rezidenca e tij pak para arrestimit, Imamoglu u shpreh i vendosur për të mos u dorëzuar dhe e cilësoi operacionin si një përpjekje të qeverisë për të shtypur opozitën. “Një grup njerëzish po përpiqen të përmbysin vullnetin e kombit tonë, duke dërguar qindra policë në shtëpinë time. Dua të bëj të qartë se nuk do të dorëzohem. Besimin tim e kam te kombi,” deklaroi ai.

Pamjet televizve nga mediat turke treguan prani të lartë policore përreth banesës së Imamoglu, si dhe dhjetëra automjete të rendit në zonë. Ndërkohë, zëdhënësi i tij, Murat Ongun, konfirmoi arrestimin e tij përmes një postimi në rrjetet sociale. “Jam në paraburgim. Ata besojnë se mund të na heshtin, por ne do të vazhdojmë të mbrojmë dhe mbështesim Imamoglu. Kombi është me të,” shkroi ai.

Ngjarja vjen në një moment kritik politik për Turqinë, pasi Imamoglu kishte shprehur ambicien për të kandiduar në zgjedhjet e ardhshme presidenciale, duke u pozicionuar si një prej figurave kryesore të opozitës kundër Presidentit Recep Tayyip Erdogan.

Në reagim të parë, kreu i Partisë Republikane Popullore (CHP), Özgür Özel, e cilësoi arrestimin e Imamoglu si një “grusht shteti” kundër demokracisë.

“Kur pushteti tenton të zëvendësojë vullnetin e popullit apo të përdorë forcën për ta ndalur atë, ky është një grusht shteti. Populli është sovran dhe ai do të fitojë,” deklaroi ai.

Millet iradesine darbe vuruluyor. pic.twitter.com/waXHu23ZVN

— Ekrem İmamoğlu (@ekrem_imamoglu) March 19, 2025