Fermerët e zonës së Dibrës po përballen me një situatë të vështirë për shkak të mungesës së tregut të shitjes për prodhimet e tyre, veçanërisht mollët. Për shumë prej tyre, ky është një problem që përsëritet çdo vit, duke shkaktuar humbje të mëdha ekonomike dhe zhgënjim.
Advertisements
Ylli Farruku, fermer nga fshati Grevë në Njësinë Administrative Melan, tregon se prodhimi i tij i mollëve ka mbetur i gjithë në magazinë, pa mundur ta shesë. Ai shprehet se kjo situatë është tepër dëshpëruese, pasi ndikon negativisht jo vetëm në të ardhurat e tij, por edhe në planet për të ardhmen. “Prodhimi që kam mbetur stok është mundi i një viti të tërë. Pa treg dhe pa mbështetje, gjithçka është e humbur,” shprehet ai.
Advertisements
ProfitSence Logo
Një tjetër problem që theksojnë fermerët është mungesa e infrastrukturës frigoriferike për ruajtjen e produkteve. “Nëse do kishim frigoriferë, mund ta ruanim prodhimin dhe ta shisnim gradualisht. Por në këto kushte, gjithçka kalbet,” shton Ylli, i cili bën apel për ndihmë nga institucionet shtetërore.
Situata bëhet edhe më dramatike për fermerë si Selim Suti, i cili ka nisur të presë pemët e tij frutore të mollëve, pasi nuk sheh më asnjë zgjidhje. Selimi shpjegon se ka bërë të njëjtën gjë me qershitë vite më parë, dhe tani po përsëritet e njëjta histori edhe me mollët. “Prej vitesh prodhimi kalbet. Nuk kemi treg dhe as mbështetje. Të investosh në këto kushte është e kotë,” thotë ai.
Advertisements
Fermerët e Dibrës kërkojnë ndërhyrjen e shtetit për të rregulluar çmimet e produkteve të brendshme dhe atyre të importit. Ata ndihen të pabarabartë në konkurrencë me produktet e importuara, të cilat shpesh dominojnë tregun vendas. “Shteti duhet të ndërhyjë për të na mbrojtur. Nuk mund të lejojë që prodhimet tona të kalben, ndërkohë që tregjet mbushen me produkte të importit,” thotë një tjetër fermer nga zona.
Në Dibër, ku bujqësia është një nga sektorët kryesorë të ekonomisë, mungesa e tregut për shitjen e produkteve është një kërcënim serioz për jetesën e qindra familjeve. Me mungesën e politikave mbështetëse dhe infrastrukturës së nevojshme, fermerët po dorëzohen përballë kushteve të pafavorshme, duke braktisur gjithnjë e më shumë aktivitetin bujqësor.
Fermerët apelojnë për zgjidhje konkrete: ndërtimin e magazinave frigoriferike, subvencione për prodhuesit vendas dhe krijimin e mundësive për eksport. Për ta, këto janë hapat e nevojshëm për të shpëtuar nga një krizë që po rrezikon të zhbëjë traditën dhe punën e një brezi të tërë.
