Bota po përgatitet t’i përgjigjet tarifave doganore të shpallura të mërkurën nga Donald Trump nga Kopshti i Trëndafilave në Shtëpinë e Bardhë. I menjëhershëm ka qenë reagimi i BE, i prekur nga tarifa prej 20%.
Advertisements
Presidentja e Komisionit Evropian, Ursula von der Leyen i përshkroi tarifat e vendosura nga presidenti amerikan si një goditje të madhe për ekonominë globale. Në një deklaratë për mediat, ajo tha se tarifat nuk janë zgjidhja, ndërsa shtoi se BE ka qenë gjithmonë e gatshme për të negociuar por në të njëjtën kohë gati për kundërpërgjigje.
Advertisements
“Tarifat do të godasin miliona qytetarë, faturat do të rriten, çmimi i barnave do të rritet. Një goditje për ekonominë globale. Kompanitë e mëdha dhe të vogla do të vuajnë dhe pasojat do të jenë katastrofike. Ne kemi qenë gjithmonë të gatshëm për të negociuar, në të njëjtën kohë jemi gati të përgjigjemi. Jam dakord me Presidentin Trump se të tjerët po përfitojnë padrejtësisht nga rregullat aktuale dhe jam e gatshme të mbështes çdo përpjekje për të përshtatur sistemin e tregtisë globale me realitetet e ekonomisë globale. Por gjithashtu dua të jem e qartë: përdorimi i tarifave si mjeti i parë dhe i fundit nuk do ta zgjidhë problemin. Kjo është arsyeja pse, që nga fillimi, ne kemi qenë gjithmonë të gatshëm të negociojmë me Shtetet e Bashkuara për të hequr barrat e mbetura.”, u shpreh ajo.
Von der Leyen nuk përjashtoi mundësinë e negociatave me amerikanët, ndërsa shtoi se përveç paketës së parë të kundërmasave në përgjigje të tarifave të çelikut të vendosura më parë, po përgatisin kundërmasa të tjera për të mbrojtur interesat dhe bizneset. Ajo tha se do të punojnë për të ulur tarifat, jo për t’i rritur ato.
“Ne po finalizojmë tashmë paketën e parë të kundërmasave në përgjigje të tarifave të çelikut dhe tani po përgatitemi për kundërmasa të mëtejshme për të mbrojtur interesat dhe bizneset tona nëse negociatat dështojnë. Ne gjithashtu do të shikojmë me kujdes se çfarë efektesh indirekte mund të kenë këto tarifa, sepse nuk mund të thithim mbikapacitetin global, as nuk do të pranojmë dumping në tregjet tona. Nuk është shumë vonë për të adresuar shqetësimet përmes negociatave, prandaj komisioneri ynë i Tregtisë, Maros Sefcovic, po angazhohet vazhdimisht me homologët e tij amerikanë: ne do të punojmë për të zvogëluar barrierat, jo për t’i rritur ato”, thotë Ursula von der Leyen.
Ndërkohë, në Azi, tarifat e saposhpallura kanë dhënë edhe efektet e para. Bursa e Tokios ka rënë 5%, ndërsa Indeksi Nikkei qëndron në -4.7%. Sa i përket tregjeve kineze, Hong Kongu Hang Seng ra 2.09%. Në Seul, Kospi ka shkuar me -1.69%. Ndërkohë, në Australi S&P/ASX 200 ra me 1.3%.
Kina tha se i kundërshton me vendosshmëri këto masa ndërsa paralajmëroi se do të hakmerret duke mbrojtur të drejtat dhe interesat e saj. Ministri japonez i Tregtisë, Yoji Muto shprehu gjithashtu keqardhjen për tarifat, ndërsa paralajmëroi se tarifat e reja mund të dëmtojnë investimet e Japonisë në ekonominë më të madhe në botë. Qeveria japoneze gjithashtu vuri në dukje se ofensiva tarifore e SHBA-së mund të shkelë rregullat e OBT-së dhe marrëveshjet dypalëshe midis SHBA-së dhe Japonisë.
Trump, nga Shtëpia e Bardhë, njoftoi se tarifat universale prej 10% për të gjitha importet në SHBA do të hyjnë në fuqi më 5 prill, ndërsa tarifat reciproke për vendet që ai i konsideroi si “shkelësit më të mëdhenj”, më 9 prill. Trump tha se ndaj importeve nga Kina do vendoset tarifë prej 34%, ndaj atyre nga Bashkimi Evropian 20 për qind, Mbretëria e Bashkuar 10% Koreja e Jugut 25% dhe Japonia 24%.