Detaje të reja kanë dalë në dritë mbi vrasjen e rëndë të studentes shqiptare 22-vjeçare, Ilaria Sula, e kryer nga i dashuri i saj, Mark Samson, në Romë. Gjatë dëshmisë në gjykatë, 23-vjeçari ka rrëfyer se vrasja ndodhi nga xhelozia, pasi kishte zbuluar një mesazh në telefonin e saj, që tregonte se ajo po njihte dikë tjetër.
Advertisements
“Po i çoja mëngjesin në shtrat kur pashë mesazhin. Ajo më pranoi se po dilte me dikë tjetër dhe më humbi mendja. Thika ishte aty, në tabaka, dhe e vrava. Nuk u mbrojt, vdiq menjëherë,” rrëfeu ai.
Advertisements
Ngjarja ka ndodhur mëngjesin e 26 marsit, një ditë pasi viktima kishte shkuar në banesën e tij për t’i kthyer disa rroba dhe kishte vendosur të qëndronte natën atje. Mark pretendon se pas krimit kishte vepruar i vetëm: kishte pastruar skenën, mbështjellë trupin me celofan dhe qese plastike, e kishte futur në një valixhe dhe më pas kishte vazhduar të pastronte gjurmët e gjakut. Ai mohoi të japë detaje për rolin e mundshëm të prindërve, të cilët jetonin në të njëjtën banesë.
Ngjarja ka shkaktuar reagime të forta në opinionin publik italian. Kryetari i Bashkisë së Ternit dhe sekretari i partisë “Alternativa Popolare”, Stefano Bandecchi, ka dalë me një deklaratë të ashpër në rrjete sociale, duke kërkuar rikthimin e dënimit me vdekje në Itali për rastet e feminicidit dhe pedofilisë.
“Nuk ka më justifikime. Çdo ditë vritet një grua. Ky ka therur një vajzë, e ka futur në valixhe dhe pastaj pendohet. Kjo është e papranueshme. Kërkoj që dënimi me vdekje të rikthehet për këto krime,” u shpreh Bandecchi në një video të postuar në Instagram.
Rasti vazhdon të tronditë Italinë, ndërsa hetimet po vijojnë për të zbuluar çdo rrethanë të ngjarjes makabre.
