“Pse SPAK nuk po heton Ballukun?!”- Berisha: U paguan 130 mln euro për djegësin e Tiranës dhe s’është vënë asnjë tullë! Ku shkuan 80 mln eurot e “Tigrave” të Belindës?!

Kryetari i PD-së Sali Berisha shtroi disa pyetje për Prokurorinë e Posaçme. Teksa renditi disa fakte, që që ai i quajti skandale tha se Prokuroria e Posaçme nuk po heton Belinda Ballukun për 130 mln euro të inceneratorit të Tiranës, apo 80 mln eurot e “Tigrave”.

“Ftoj qytetarët të pyesin SPAK ku kanë shkuar 130 mln euro të djegësit të Tiranës. Të pyesin SPAK pse nuk heton Belinda Ballukun dhe Edi Ramën që kanë paguar 130 mln euro pa vënë asnjë tullë.

Pse nuk është marrë në hetim ose ndjekje asnjëri nga njësia e mbikëqyrjes që kishte detyrën të raportonte për ecurinë e punimeve të djegësit që nuk ekziston.

Të gjitha këto kanë një përgjigje, paratë i mori Edi Rama kryesisht dhe pastaj i ndau me të tjerët.

Të pyetet Skapi ku kanë shkuar 80 mln euro për anijet fantazme, tigrat e famshëm të Belindës. Pse SPAK nuk heton Ramën dhe Belinda Ballukun për këto para të vjedhura”, tha Sali Berisha, i cili theksoi se “60 milionë euro të korrupsionit të Llogarasë, i ndanë së bashku me Lubinë”.