Një 22-vjeçar është shpallur në kërkim, pasi ka aksidentuar dy ditë më parë një të moshuar dhe më pas është larguar nga vendi i ngjarjes. Gjithashtu Policia e Durrësit ka identifikuar 22-vjeçarin i cili përplasi për vdekje 63-vjeçarin. Po ashtu policia ka gjetur dhe ka sekuestruar automjetin e të riut.
Njoftimi i Policisë: Aksidentoi 2 ditë më parë, në rrugën dytësore “Plepa-Kavajë”, një 63-vjeçar, me pasojë vdekjen, dhe u largua nga vendi i aksidentit, Policia identifikon drejtuesin e automjetit dhe vijon punën për kapjen e tij.
Advertisements
Si rezultat i veprimeve të shpejta hetimore të kryera menjëherë pas aksidentit rrugor të ndodhur rreth orës 01:00, të datës 21.08.2024, në aksin dytësor “Plepa-Kavajë”, ku u përplas me automjet shtetasi L. D., 63 vjeç, i cili si pasojë humbi jetën, në vendngjarje, Policia Rrugore identifikoi dhe shpalli në kërkim drejtuesin e automjetit që shkaktoi aksidentin, shtetasin E. K., 22 vjeç, banues në Tiranë.
22-vjeçari, menjëherë pas aksidentit, u largua nga vendngjarja dhe braktisi automjetin, në fshatin Kodër Arapaj. Automjeti u gjet dhe u sekuestrua nga shërbimet e Policisë, në cilësinë e provës materiale. Vijon intensivisht puna për lokalizimin dhe kapjen e këtij shtetasi. Materialet procedurale i kaluan Prokurorisë së Durrësit, për veprime të mëtejshme.
Advertisements
