‘Ulërima për ndihmë, gjymtyrë të përhapura…’/ Pasagjerët tregojnë tmerrin e tragjedisë ku dy trena u përplasën‘10 – 15 njerëz ranë mbi mua … kur dola, pashë gjymtyrë të përhapura në dhe,’ tha një i mbijetuar.
Vagonët nga tre trena qëndronin mbi njëri-tjetrin në një rrënoje gjigante të spërdredhur.
Disa vagone ishin të rrëzuar në anë, disa të hedhur lart në ajër prej forcës së përplasjes, dhe të shtypur nga forca e rënies në tokë, sipas dëshmive të prezantuara për britaniken The Guardian.Dhjetra trupa të mbuluar me çarçafë janë rreshtuar pranë rrënojës duke pritur për ambulanca, makina ose dhe traktorë, për t’i çuar në spitale, ose dhe shkollat e improvizuara si morg.
Këto janë pasojat e përplasjes më të rëndë hekurudhore të më shumë se dy dekadave në Indi, ku të premten treni i pasagjerëve Coromandel Express, nga Kolkata drejt Bengal, u përplas me një tren mallrash në lindje të rajonit Odisha. Pas përplasjes, treni i mallrave nxorri nga binarët dhe një tjetër tren pasagjerësh që udhëtonte në drejtim të kundërt.
Pasditen e sotme operacionet e kërkimit u mbyllën me një shifër viktimash prej 288 të vdekur e 803 të plagosur, teksa më shumë se 3000 pasagjerë gjendeshin në dy trenat e përfshirë.
Qen shpëtimi dhe prerës metalikë u përdorën për të arritur te të bllokuarit në vagonët e përplasur.
Kryeministri Narendra Modi, vizitoi sot vendngjarjen dhe u takua me të mbijetuar në spital, duke u zotuar se “përgjegjësit do të dënohen rëndë”.
Të afërmit e atyre që gjendeshin në bord kishin nisur vetë kërkimet për të dashurit e tyre, mes të cilave dhe 53 vjeçari Rabindra Shau, që kërkonte djalin e tij Govinda, i cili udhëtonte me Coromandel Express.
“Më ndihmoni të gjej tim bir. Më ndihmoni të gjej të paktën trupin,” thërriste burri pranë trupave në vagonët e shtrembëruar.
35 vjeçari Sheikh Zakir Hussain, tha se përpiqej të merrte lajme të vëllait Abdul Sheikh, të nipit Mehraj Sheikh, 22 vjeçar, dhe të tre fqinjëve, që kishin marrë trenin fatkeq në Shalimar për të shkaur në punë në Chennai.
“Që kur dëgjova për aksidentin, telefonova vëllanë e nipin por nuk mund të kontaktoja . Erdha herët në mëngjes dhe tani po shkoj nga një spital në tjetrin por nuk arrij t’i gjej”.
“Shkova në vendngjarje dhe kontrollova trupat e vdekur aty. Pashë fytyrat e më shumë se 100 njerëzve të vdekur, nuk i gjeta vëllanë, nipërit apo fqinjët e mi”.
Toton Sekh erdhi mëngjesin e të shtunës për të kërkuar nipin e tij 24 vjeçar Abu Taher Shekh, 24, nga Basanti i cili po kthehej nga Chennai. Ai thotë e skena e ngjarjes dukej si një pamje nga ferri, teksa “trupat e të vdekurve po mbaheshin në një shkollë”.
Zyrtarët nuk arrinin të gjenin nipin e tij në asnjë prej spitaleve.
“Ata më thanë se ka ende trupa të bllokuar në rrënoja dhe se do të duhet pak kohë për t’i nxjerrë të gjithë. Unë jam ende duke kërkuar për të. Lutemi që të jetë gjallë diku”.
10 nga 23 vagonët e trenit Coromandel Express janë dëmtuar rëndë në tragjedinë e pazakontë, ndërsa dy vagonë të trenit tjetër të pasagjerëve Hoërah Superfast Express janë përmbysur.
Mes të mbijetuarve, Sayantani Ghosh, i cili qe në tren me të bijën 11-vjeçare, thotë se janë me fat që janë gjallë. Vajza përshkruante sesi në impakt ata fluturuan jashtë sediljeve të tyre para se të dëgjonin një përplasje shurdhuese kur vagoni ngjitur te godiste të tyrin.
“Dëgjonim në vagonet e tjerë njerëz që ulërinin për ndihmë dhe qanin me zë të lartë. Skenat e tmerrit që pamë mbrëmë më dalin përsëri para syve”, thotë e vogla.
Banorët vendas thonë se dëgjuan zhurmën gërryese të frenave dhe më pas përplasjen, para se të niseshin në vend për dhënë ndihmën e tyre.
Spitalet dhe qendrat shëndetësore aty pranë janë të mbushur me të plagosur e trupa viktimash teksa mjekët mezi përballojnë masën e katastrofës.
Një doktor i qendrës shëndetësore SCB në Cuttak tha: “Disa kanë humbur gjymtyrë dhe të tjerë kanë plagë serioze. Rreth 20 të plagosur që u sollën te unë kanë ndërruar jetë para se ne të bënim një ndërhyrje./The Guardian/
