Qeveria ka ndryshuar afatet për të gjithë qytetarët që përfitojnë nga ligji për kompensimin e pronave.
Advertisements
Ndërsa duhet të përfundonte në vitin 2024, procesi i trajtimit dhe vlerësimit të kërkesave për kompensim prone do të kërkojë minimalisht edhe tri vite kohë, ndërsa pagesat duhet të mbyllen brenda 2028-ës.
Advertisements
Referuar ligjit të miratuar nga qeveria dhe botuar tashmë në Fletoren Zyrtare, procesi i shqyrtimit të dosjeve, që janë aplikuar përpara hyrjes në fuqi të ligjit nr. 133/2015 “Për trajtimin e Pronës dhe Përfundimin e Procesit të Kompensimit të Pronave” dhe që janë në proces shqyrtimi pranë Agjencisë, shtyhet me 3 vjet dhe parashikohet të përfundojë brenda datës 31 dhjetor 2027, ndërkohë që afati ka qenë data 31 dhjetor 2024. Po ashtu, fundi 2027-ës është afati i ri, sipas ligjit, ku ATPja, vlerëson vetëm financiarisht, të gjitha vendimet përfundimtare të pavlerësuara që kanë njohur të drejtën e kompensimi, duke u shtyrë kështu me tri vite.
NDRYSHIMET LIGJORE
Ndryshimet ligjore përcaktojnë se procesi i pagesës për të gjitha vendimet përfundimtare që kanë të njohur të drejtën e kompensimit do të përfundojë deri më 31 dhjetor 2028. Në vendim citohet se buxheti i shtetit miraton çdo vit buxhetor një fond financiar, jo më pak se 50 miliardë lekë deri në vitin 2028, i cili do të administrohet nga Agjencia e Trajtimit të Pronave për realizimin e procesit të kompensimit të pronave.
Qeveria parashikon shtyrjen e afatit shqyrtimin e mbi 7 mijë dosjeve që janë ende pa vendim nga ana e Agjencisë së Trajtimit të Pronave si kompensimin e mbi 25 mijë vendimeve të arkivuara prej vitesh në institucion.
FONDI
Bashkë me zgjatjen e afatit për ekzekutimin e mbi 25 mijë vendimeve, qeveria ka bërë edhe një rishpërndarje të fondit të paalokuar. Nuk është alokuar ende viti i 10, ndaj vlera që i takon këtij viti është rishikuar duke u shpërndarë në 4 vite, por pa shtuar koston për buxhetin e shtetit. Pra, fondi i kompensimit mbetet 50 miliardë lekë, por vetëm është rishikuar shpërndarja e vlerës së mbetur e pa alokuar.
Problemet e kthimit dhe kompensimit të pronave janë kthyer në një gangrenë shumëvjeçare në Shqipëri, por vitet e fundit, iniciuar edhe nga rekomandimet e Strasburgut, janë bërë disa ndryshime ligjore për ta përmbyllur sa më parë të jetë e mundur. Fatura totale përllogaritet në vlerën e 116 miliardë lekëve.
Sipas statistikave, në dhjetë vitet e fundit janë paguar më pak se 10 për qind e kësaj shume. Por nga ana tjetër janë intensifikuar përpjekjet e qeverisë për të përshpejtuar hapin. Për pesë mijë pronarë, Agjencia e Trajtimit të Pronave zeroi detyrimet në fundin e 2024- ës, ndërsa në listë janë edhe 21 mijë të tjerë që presin të kompensohen.
