Tiranë, 25 shkurt 2025 – Trupi i 12-vjeçarit Leo Sadiku, i cili humbi jetën në spitalin e Tiranës më 8 janar të këtij viti, është zhvarrosur sot për t’u nënshtuar autopsisë. Ekspertë të Institutit të Mjekësisë Ligjore, shoqëruar nga prokurorë të Prokurorisë së Tiranës, e cila po heton rastin, kanë kryer procedurën e zhvarrosjes në prezencë edhe të familjarëve të viktimës.
Advertisements
Ekspertët pritet të marrin mostra nga trupi i 12-vjeçarit të cilat më pas do të dërgohen për ekspertim në Institutin e Mjekësisë Ligjore për të zbuluar shkakun e vdekjes.
Advertisements
Në raportin e parë, mjekët e QSUT konkluduan se Leo Sadiku ka ndërruar jetë si pasojë e miokardit akut. Megjithatë, familjarët e viktimës kanë ngritur akuza për neglizhencë në trajtim ndaj mjekëve të QSUT, duke kërkuar që të përcaktohet shkaku i saktë i vdekjes.
Fillimisht, pas vdekjes së 12-vjeçarit, familjarët kishin refuzuar kryerjen e autopsisë, por pas nisjes së hetimeve nga Prokuroria e Tiranës, organi procedues vendosi kryerjen e saj.
Reagimet e familjarëve kanë qenë të vazhdueshme, duke protestuar dhe kërkuar një hetim të plotë për të zbardhur shkaqet e vdekjes së 12-vjeçarit nga fshati Pocestë i Maliqit.
Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin
