Gazetarja Avrovita Hysaj, e cila u kërcënua nga pronari i një televizioni lokal në Vlorë pas publikimit të lajmit të përdhunimit të një vajze, tregoi se ajo nuk kishte përmendur asnjë emër, por kishte zbuluar se ishin 4 persona që kishin abuzuar.
Advertisements
Sipas saj, kanë qenë portalet e tjera që kanë nxjerrë emrin e djalit të pronarit të TV lokal, çka ka sjellë reagimin e babait të tij që e ka kërcënuar përmes telefonatave dhe më tej duke publikuar një lajm denigrues për të në televizionin e tij.
“Unë kam raportuar se kanë qenë 4 persona, jo 3 siç u tha në komunikatën e parë të policisë, por nuk kam dhënë asnjë emër, portalet kanë nxjerrë emrin e djalit të administratorit të TV lokal. Personi i publikuar në disa portale si personi i katërt ka sjellë reagimin e babait të djalit, që më ka kërcënuar me mesazhe dhe më tej ky televizion ka publikuar një lajm denigrues ndaj meje kështu që situata nuk mund të tolerohej më ndaj bëra denoncim në organet kompetente”, tha Hysaj.
Advertisements
Ajo tregoi se ajo kishte takuar personalisht vajzën e përdhunuar në reanimacion, e cila siç tha nuk ishte në gjendje të fliste. Kjo sipas gazetares e bën të dyshimtë faktin që mund t’i jetë marrë një deklaratë në atë gjendje, për siç thuhet, tërheqje nga denoncimi.
“Edhe personi i katërt është i përfshirë. Në komunikatën e djeshme të policisë ajo konfirmon se është një person i katërt që nuk ka shkuar në dhomë, por ka qenë bashkë me vajzën kur kanë qenë në ambientet e barit”, tregoi gazetarja.
