“Koka” e trafikut të kok*inës mes Shqipërisë e Italisë, shqiptari gjurmohet dhe kapet i fshehur në Britaninë e Madhe

Një shqiptar i arratisur në Britaninë e Madhe u arrestua për llogari të autoriteteve të drejtësisë në Itali.

Mediat vendase bëjnë të ditur se shqiptari akuzohej si pjesë e një organizate kriminale, për të cilën ishin lëshuar dhe ekzekutuar disa urdhra arresti. Konkretisht grupi ishte i përfshirë kryesisht në trafikun e lëndëve narkotike nga Shqipëria drejt Perugias.

Përgjimet dhe hetimet çuan agjentët deri tek baza e organizatës, ku u gjetën sasi të konsiderueshme droge. Grupi në fjalë drejtonte edhe një biznes ‘të lulëzuar’ të shitjes me pakicë të kokainës, pranë një ndërtese në periferi të Perugias.

Sipas mediave të huaja, një nga anëtarët e grupit i ishte shmangur ekzekutimit të urdhrit. Por vendndodhja e tij u bë e mundur falë zgjerimit të kërkimit në nivel ndërkombëtar.

Shqiptari fshihej prej kohësh në Angli, ku kishte hyrë me dokumente false. Emri i tij nuk bëhet i ditur, për arsye që lidhen me hetimet në vazhdim, por burime hetimore konfirmojnë se ai është një nga drejtuesit kryesorë në menaxhimin e trafikut të kokainës mes Shqipërisë dhe Italisë.