Përplasi me motor një 27-vjeçar dhe e la të plagosur në rrugë, arrestohet shqiptari në Greqi! Babai i të lënduarit: Iu nënshtrua një operacioni në këmbë, ka plagë edhe në kokë

Një 19-vjeçar shqiptar është arrestuar në Greqi, pasi ka përplasur me motor një 27-vjeçar dhe e ka lënë të plagosur në mes të rrugës.

Sipas mediave greke, i riu thuhet se nuk kishte patentë dhe leje drejtimi. Ngjarja ka ndodhur rreth orës 20.00 pak ditë më parë në Selanik.

Siç tha babai i 27-vjeçarit për protothema.gr, djali i tij është dashur t’i nënshtrohet një operacioni për dëmtimin e këmbës, ndërsa ka plagë edhe në kokë. Sipas babait të viktimës, 27-vjeçari jeton në Holandë dhe ka ardhur në Greqi ditë më parë.

Pasditen e së enjtes, ai doli për tu takuar me miqtë e tij dhe vetëm kur shkoi për të marrë ushqim ndodhi aksidenti tronditës. I riu ka tentuar të kalojë rrugën, por motori i cili po lëvizte me shpejtësi marramendëse, e ka tërhequr zvarrë dhe e ka hedhur rreth dhjetë metra larg.

“Fëmija im u zgjua në spital, nuk e dinte se çfarë ndodhi dhe çfarë e goditi. Siç thonë disa dëshmitarë, në motor kanë qenë dy persona, ndërsa pak metra më poshtë duket se shoferi ka humbur kontrollin dhe ka rënë, por ata janë zhdukur”, tha ai.