Shtatë viktima dhe 711 të plagosur raportohen deri më tani pas tërmetit vdekjeprurës që goditi Tajvanin mëngjesin e sotëm.
Advertisements
Agjencia Kombëtare e Zjarrfikësve të Tajvanit deklaroi se rreth 77 persona mbeten të bllokuar në rrënojat e ndërtesave.
Advertisements
Presidentja e Tajvanit Tsai Ing-wen tha se ushtria do t’u bashkohet operacioneve të shpëtimit dhe u ka kërkuar agjencive qendrore të mbajnë kontakte me qeveritë lokale.
Në një postim në Facebook, Tsai Ing-wen u bëri thirrje banorëve që t’i kushtojnë vëmendje përditësimeve nga zyrtarët dhe të shmangin ashensorët, duke pasur parasysh serinë e pasgoditjeve që ka shkaktuar tërmeti.
Më herët, autoritetet tajvaneze thanë se tërmeti kishte shkaktuar shembjen e ndërtesave në Hualien. Në vendngjarje po bëhen evakuime të shumta. Njerëzit janë bllokuar gjithashtu në katër tunele të ndryshme në Hualien.
Advertisements
Autoritetet kineze dhanë një deklaratë menjëherë pas tërmetit, duke thënë se ishin të gatshëm të ofronin ndihmë në rast fatkeqësie.
Bregdeti lindor i Kinës shtrihet vetëm 180 km nga Tajvani.
“Kontinenti është shumë i shqetësuar për situatën dhe shpreh ngushëllimet e sinqerta për bashkatdhetarët e Tajvanit të prekur nga fatkeqësia,” tha Zhu Fenglian, zëdhënës i Zyrës së Çështjeve të Tajvanit të Këshillit të Shtetit.
Kina dhe Tajvani kanë një marrëdhënie të tensionuar. Tajvani e sheh veten si një vend sovran, por Pekini e sheh atë si një provincë të shkëputur që përfundimisht do të jetë pjesë e vendit dhe nuk e ka përjashtuar përdorimin e forcës për ta arritur këtë.
Nga ana tjetër kryeministri i Japonisë Fumio Kishida ka ofruar “çdo ndihmë të nevojshme për Tajvanin – fqinjin tonë përtej detit – në kohë vështirësish”.
Kishida tha gjithashtu se Japonia ishte mirënjohëse për “mbështetjen që mori nga miqtë e tyre në Tajvan gjatë tërmeteve të mëparshme.
Tajvani ishte një nga kontribuuesit më të mëdhenj të ndihmës financiare pasi Japonia u godit nga tërmeti masiv 9.0 në 2011, dhe gjithashtu mblodhi miliona pasi Gadishulli Noto në prefekturën Ishikawa u godit nga një tërmet më 1 janar.
Tajvani dhe Japonia preken shpesh nga tërmetet dhe është bërë praktikë e zakonshme që drejtuesit e tyre të postojnë mesazhe mbështetjeje në mediat sociale në gjuhët e njëri-tjetrit.
