Tre vite më parë, Ministria e Bujqësisë hodhi idenë e krijimit të një Akademie për barinjtë në Shqipëri. Nisma që parashikonte cikël trajnimesh për blegtorët ngjalli reagime të shumta duke u bërë virale në rrjete sociale. Asokohe, qeveria i doli në mbrojte ‘Akademisë së barinjve’, por vitet treguan se premtimi ‘avulloi’ bashkë me ish ministren e Bujqësisë Frida Krifca. Në nëntor të vitit 2021, ish ministrja e bujqësisë Frida Krifca hodhi për herë të parë idenë e krijimit të “Akademisë së barinjve”. “Është një profesion që është i vështirë dhe duam ta ruajmë dhe do të nxisim të rinjtë, do shkojmë t’i gjejmë, do bëjmë një akademi për këtë dhe do t’i subvencionojmë vetëm për mbajtjen e tufës”– premtonte Krifca asokohe.
Advertisements
Nisma nuk ish gjë tjetër veçse cikël trajnimesh për blegtorët në mënyrë që tradita të mos shuhej. Dhe si shembull për këtë, sillej Zvicra. “Shkolla e barinjve është pjesë e një cikli trajnimesh të dedikuara për blegtorët, peshkatarët, fermerët dhe bletarët”, argumentonte tre vite më parë Ministria e Bujqësisë, teksa e shtrinte ambicien përtej blegtorëve. Për të mësuar më shumë rreth ecurisë së këtij premtimi, ne kërkuam informacion pranë Ministrisë së Bujqësisë. Në përgjigje të kërkesës sonë, Ministria e hodhi topin në fushën e Universitetit Bujqësor të Tiranës. “MBZHR nuk disponon informacion sepse “Akademia e Barinjve” është në kompetencë të Universitetit Bujqësor të Tiranës”, tha Ministria e Bujqësisë për “Faktoje”. Për çudi, përgjigjet nuk i morëm as nga Universiteti Bujqësor i Tiranës. “Universiteti Bujqësor i Tiranës nuk është i përfshirë në trajnim apo në çdo iniciativë tjetër me emrin “Akademia e barinjve”, u shpreh UBT.
Advertisements
Mesa duket, nga premtimi i bujshëm i tre viteve të kaluara nuk ka mbetur asgjë veç fjalëve. Nisma për shkollimin e barinjve ‘avulloi’ bashkë me ish ministren e bujqësisë Frida Krifca. Nga ana tjetër, statistikisht blegtoria shqiptare po përjeton krizë, pasi numri i krerëve është pakësuar ndjeshëm dekadën e fundit. Sipas të dhënave nga INSTAT, në 2013 në vend numëroheshin 356 mijë lopë. Në fund të 2023 numri i tyre është pakësuar me 124 mijë. Tkurrje të fortë ka pasur edhe tek bagëtitë e imta. Referuar shifrave zyrtare, numri i deleve në shkallë vendi u pakësua me 400 mijë krerë ndërsa numri i dhive ka rënë me 145 mijë krerë gjithsej.
