Emisioni “Në Shënjestër” nga gazetarja Klodiana Lala ka trajtuar mbrëmjen e sotme ndërhyrjes në sistemin TIMS që shkaktoi reagime të shumta përfshirë edhe atë të ambasadës amerikane në Tiranë, duke zbardhur me detaje atë çfarë ka ndodhur.
Advertisements
Faktin që Klodian Mazari la zyrën e tij pranë AKSHI-t dhe u mor me ekstraktimin e të dhënave në Drejtorinë e Teknologjisë dhe Informacionit në Policinë e Shtetit, e pranojnë edhe specialistë të këtij sektori si edhe vetë Drejtori i Drejtorisë së Sistemeve. Në këtë rast eprori direkt i Ardit Muço, shefit të dorëhequr të sektorit të IT-së, i cili gjatë orëve të pasdites të datës 2 gusht e kishte parë Klodian Mazarin në ambientet e oborrit të Drejtorisë. Por ai thotë se nuk i kishte dhënë rëndësi qenies së tij aty, pasi kishte pak njohje me të. Edhe pse Klodian Mazari, ishte aty pikërisht për të ndërhyrë në sistemin e të dhënave, ku drejtor në Drejtorinë e Sistemeve, ishte vetë Besjon Tanuzi. Ndërkohë që një tjetër punonjës ka treguar edhe rrethanat se si Klodian Mazari, u thirr në zyrë nga drejtori i madh, Ervin Muça, për t’i dhënë një dorë në kryerjen e back up-it të të dhënave.
Advertisements
“Më datë 2 gusht 2023, rreth orës 18.00 në zyrën tonë erdhi një person i panjohur për mua, por që ishte njohje e drejtorit, ku mesa duket ishte specialist i IT. Ai u ul në kompjuterin e specialistes tjetër dhe bashkë me drejtorin, dhe specialisten A. V filluan të kryenin back up-in. Në orën 19.00 unë u largova nga zyra dhe lashë aty tre specialistët, si edhe personin e panjohur për mua. Ndërsa drejtori ishte larguar disi më herët”, mësohet të ketë thënë specialistja E.H.
Zyrtarja shpjegoi më tej se back-upet e sistemeve bëhen në mënyrë automatike dhe në mënyrë periodike dhe pas përfundimit të procesit, po në mënyrë automatike vjen një email në adresën e personit të autorizuar, në këtë rast shefit të Sektorit. Vetë punonjësi E. H, pranoi për grupin hetues se drejtori i madh, në këtë rast Ervin Muça, u kishte ushtruar presion atyre, që të kryenin veprime të kundraligjshme. Dhe këtë e kishte bërë hapur në sy të të gjithë specialistëve të sektorit që mbulon teknologjinë dhe informacionin. Madje në një moment ai e ka çuar gjuhën edhe më tej, në kërcënime më të rënda, duke u kujtuar specialistëve se nëse nuk zbatonin urdhrin e tij, ata do shkonin të gjithë 200 metra më poshtë. Pra në Prokurori, duke pasur parasysh se godina e serverit të Policisë së Shtetit, ku ruhen të dhëna, është jo më shumë se 200 metra nga godina e institucionit të akuzës.
“Në një moment drejtori filloi të flasë me tone të ashpra, kërcënuese. Ai na kujtoi se nëse nuk zbatonim urdhërin e tij, do të shkonim 200 metra më poshtë, duke nënkuptuar Prokurorinë e Tiranës”, ka dëshmuar E.H.
Të gjitha këto dëshmi që provonin se drejtori Ervin Muça, kishte kryer një operacion që kishte si qëllim eksportimin e të dhënave jashtë serverit zyrtar të policisë, u pohuan edhe nga vetë shefi i sektorit të Teknologjisë dhe Informacionit. Ardit Muço i cili ishte në konflikt të hapur me drejtorin Ervin Muça, që nga momenti që ky i fundit u emërua drejtor i këtij departamenti të rëndësishëm në Policinë e Shtetit, në muajin qershor të vitit 2023.
“Unë punoj prej 12 vitesh në Drejtorinë e Teknologjisë dhe Informacionit. Ku së fundmi kam mbuluar edhe detyrën e shefit të sektorit të Serverave. Pozicion nga ku më datë 1 Gusht 2023, i kam paraqitur dorëheqjen Drejtorit të Përgjithshëm. Në lidhje me një email që unë kam dërguar në adresën e punës, më duhet të informoj se në atë komunikim unë tërheq vëmendjen për eksportimin e të dhënave dhe rrezikun e publikimit të tyre. Kjo edhe në bazë të shqetësimit që më kanë referuar vartësit e mi, të cilëve drejtori Ervin Muça, u ka kërkuar një kopje të bazës së të dhënave të sistemit TIMS”, thotë Muço.
Ai tha më tej për grupin hetues se më datë 2 Gusht 2023, pasi u njoh me shqetësimin e vartësve të tij, të cilët ishin vënë në presion nga drejtori Ervin Muça, për të kryer medoemos eksportin e të dhënave, ai u kishte sugjeruar kolegëve që ta refuzonin kategorikisht një urdhër të tillë. Madje duke u sugjeruar që të mos i jepnin asnjë fjalëkalim, drejtorit Ervin Muça, apo personave të tjerë që do të autorizoheshin prej tij. Por sipas tij, drejtori Ervin Muça, nuk ishte mjaftuar me kaq, por e kishte marrë edhe në telefon.
“Po atë ditë, më datë 2 Gusht 2023, rreth orëve të pasdites, drejtori Ervin Muça më mori në telefon, ku më kërkoi që t’i jepja fjalëkalimet e serverave të bazës së të dhënave të sistemit TIMS. Por unë i kujtova procedurën standarde të punës si dhe rregulloren e Policisë së Shtetit. Ku i thashë se fjalëkalimet mundësohen vetëm ditën që bëhet edhe dorëzimi i detyrës. Dhe kjo në Sekretari, dhe jo nëpërmjet telefonit sikundër kërkonte drejtori Ervin Muça”, thuhet në dëshminë e Muços.
